«Achille, cambia nome!»

Vinars ai 21 di Novembar al è jessût un nestri gnûf articul sul Quotidiano.
Cui che nol à rivât a leilu, cumò lu cjate ancje tal blog.
Buine leture.

2014 o 1934? IGNORANCE E «NAZIONALISIM BANÂL» NO SPARAGNIN NISSUN E A FASIN SIMPRI MÂL AL FRIÛL E AL FURLAN

«Achille, cambia nome!»

Si visaiso di chel sketch di Roberto Benigni, di sù par jù vincjecinc agns indaûr, là che par television il comic toscan al berlave cuintri di Occhetto: «Achille, cambia nome!»? Chês peraulis nus tornin iniments une vore dispès, soredut tai ultins dîs, e no par vie dai vincjecinc agns de colade dal mûr di Berlin o di chei de innomenade «svolta della Bolognina».

La memorie e torne indaûr a chê esibizion di Benigni cuant che o leìn alc che al tocje la «Conferenza episcopale Triveneto» (sic!!) o la «Regione ecclesiastica Triveneto» (sic!!). Za il riferiment al «triveneto» al fâs vignî i sgrisui par so cont, ma se chê peraule e ven doprade di une istituzion di chê fate…
Tant par capîsi, la setemane stade al zirave in rêt, dopleât cun diligjence – ancje masse… – de bande di gjornâi e altris media, un comunicât pe stampe in cont di une schirie di spetacui ispirâts ae figure dal Mickey Mouse disneyan che a varessin vût di jessi fats ator pal «triveneto» e tal specific, tra Gurize, Pordenon, Mestre, Padue e Conean. Nuie di ce maraveâsi: tra une Paperopoli un Topolinia al pues stâi ancje un «triveneto». Però al è un però: che ancjemò tal 2014 la organizazion teritoriâl de Conference episcopâl dal Stât talian (CEI) no rivi a rispietâ un tic di plui la gjeografie storiche e aministrative nus lasse pardabon scaturîts.

A son dôs pussibilitâts: o che la CEI e je restade masse indaûr, sù par jù di otante agns, o ben che e je za proietade indenant, lant daûr di chê propueste mostruose di riorganizazion teritoriâl dal Stât talian fate indenant pocjis setemanis indaûr in Parlament di un deputât roman che – piês cun piês – al fâs part di un partît che al varès di jessi progressist e che, cemût che al salte fûr dal so cognon, al è di divignince furlane.

Al lasse scaturîts il fat che, almancul di ce che si sa, ni dentri des trê diocesis dal Friûl, ni di chês altris che a varessin motîf, a tacâ di Trent e di Bolzan-Persenon, al sedi stât palesât cualchi dubi in cont de coretece e duncje de oportunitât di un non di cheste fate. Cun di plui che la Diocesi di Udin e mostre di vê une cierte atenzion pal Friûl inte sô unitât e cu lis sôs specificitâts.

La setemane passade, par esempli, il diretôr dal sfuei diocesan di chenti al marcave cemût che tra “isontino”, “destra Tagliamento” e “fvg” il Friûl al sedi in pericul di no esisti nancje tant che espression gjeografiche. Par sigûr ancje la idee di «triveneto» e va in chê direzion e no dome di vuê, in linie cun chel che Michael Billig al clame «nazionalisim banâl».

No saressial il câs di domandâi di cambiâ non a chê Conference «regjonâl»? E no saressial il câs di fâ compagn cu la sezion de ‘Targa Tenco’ che e cjape dentri ancje la musiche tes lenghis «altris» dal Stât talian, ma tal so non e fâs riferiment dome ai discs «in dialetto», ancje se cui che le vinç al cjante par sart o par furlan, tant che chest an Loris Vescovo?

EURO FURLAN
eurofurlan@gmail.com

21/11/2014

Indipendentisim virtuâl o autoguvier concret?

Za une setemane indaûr al è tacât il Laboratori di Autonomie, inmaneât de bande di un grup di sindics cu la poie di associazions, dai media indipendents furlans plui impuartants e di un progjet di ricercje de Universitât dal Friûl.

Usgnot a Flaiban, a 8 e mieze sot sere li dal Centri sociâl, al è il secont apontament di chest program di incuintris.

Di cheste iniziative e ancje di chel che al ven clamât referendum pe indipendence dal Friûl al fevele il nestri articul publicât sul Quotidiano di vuê.

Lu metìn sù daurman ancje tal nestri blog.

IL REFERENDUM E IL LABORATORI. DÔS MANIERIS DIFERENTIS DI RESONÂ SUL FRIÛL DI VUÊ E DI DOMAN

Indipendentisim virtuâl o autoguvier concret?

E mancje sù par jù une setemane ae fin dal mês di Otubar e duncje ae conclusion di chê iniziative inviade in internet, che si à presentade tant che referendum pe indipendence dal Friûl. Cun dut che lu vin za frontât ancje dentri dal nestri blog, al merete tornât su chest argoment par vie che, dopo di un ciert scjas sul imprin, chel che no si capìs ben se al è un plebissît, un referendum o dome un scandai di opinion, al è disparît dai media tradizionâi di chenti e in particolâr de stampe.

Al passe il timp, ma a restin dutis lis contadizions e lis ambiguitâts di chê iniziative, sei sul plan des proceduris dal vôt virtuâl sei in cont dai siei contignûts. In chest sens o vin pôre che la robe e sedi plui cuintri dal Friûl che a pro. Si pues calcolâle o tant che la enesime manifestazion dal nivel unevore alt de alienazion culturâl, identitarie e politiche di tancj di lôr in Friûl o ben tant che la ultime azion di mistificazion, di confusion e di «distrazione di massa» metude adun propit par menâ ator il Friûl e la sô int in cont di cuistions tant che chês dal autoguvier, dai dirits e des prospetivis di fâ sù un avignî diferent, juste tal moment che chestis stessis a cjapin sù une rilevance e une impuartance grandononis.

La propueste programatiche fate indenant di chescj indipendentiscj nus somee une vore «dipendente», «dipendentiste» e duncje une vore lontane dal Friûl e des sôs dibisugnis.
Cun dut achel a son ancje elements positîfs.
Cheste iniziative e partìs dal Friûl ocidentâl e cun dut des contradizions za ricuardadis e ven fate indenant in non dal Friûl e nol è mâl nancje il riferiment, cence tabùs, ae «indipendence», ancje se al è grant il pericul di lâ a fruiâ daurman cheste peraule clâf che inaltrò, de Scozie ae Catalogne, e ven doprade cun fuarce e cun sintiment.

In cualsisedi maniere che al finissi, chest referendum si pues calcolâlu tant che une gnove dimostrazion de dibisugne di sierâ cuntun ciert autonomisim autoreferenziâl e lâ plui insot des cuistions par fâ pardabon alc di concret.

Si môf in cheste direzion il Laboratori di Autonomie, inmaneât di un grup di sindics cu la poie di associazions, dai media indipendents furlans plui impuartants e di un progjet di ricercje de Universitât dal Friûl.

Al è un program di incuintris che in maniere operative, propit a tacâ des esperiencis des comunitâts locâls, des dibisugnis concretis e dai problemis dal dì di vuê, al fâs indenant une idee di disvilup sociâl, economic e civic che al partìs dal teritori, de sô int, des lôr risorsis e dai lôr dirits. Il dut al è tacât la setemane stade a Cjarlins e al va indenant par passe un mês. Il secont apontament al è usgnot a Flaiban, a 8 e mieze, li dal Centri sociâl.

Che e sedi rivade la ore di inviâ un vêr percors di autoguvier?

Par savênt di plui: https://www.facebook.com/pages/Laboratori-di-Autonomie/1509633949277094.

EURO FURLAN
eurofurlan@gmail.com
23/10/2014

Furlan a scuele. E je ore di cambiâ e si pues fâlu

Vinars stât a jerin i 26 di Setembar, la Zornade europeane des lenghis. In cont di cemût che la ricorence e je stade memoreade chi di nô, o vevin za scrit alc chê altre dì.

Inte date sielzude de bande dal Consei de Europe cun chê di promovi il pluralisim linguistic tes sôs diviersis espressions al è jessût sul Quotidiano un nestri toc là che o vin vût miôr tornâ a fevelâ di plurilinguisim a scuele e di istruzion in lenghe furlane.
Par cui chel al lei il blog a son robis za scrits e duncje za letis, stant che il toc al tocje la cunvigne che si à davuelte Udin ai 9 di Setembar.

Però, nol è dome chel, parcè che o scrivìn ancje alc in cont dal incuintri che al è stât a Rome in Senât .

Par chest, chê che cualchi dì indaûr e jere une domande cumò e devente une afermazion.

Velu chi.

ISTRUZION PLURILENGÂL. LA ZORNADE DAI 9 DI SETEMBAR E VIERÇ UNE GNOVE PROSPETIVE, CHE NO SI PUES PIERDILE

Furlan a scuele. E je ore di cambiâ e si pues fâlu

Vêso presint chel film di un pôcs di agns indaûr cun Jack Nicholson e Helen Hunt? Il so titul par talian al je ‘Qualcosa è cambiato’. Chel film e soredut chel titul nus àn tornât iniments in ocasion de zornade di formazion inmaneade de bande dal Assessorât regjonâl pe Formazion e pe Istruzion, de Agjenzie Regjonâl pe Lenghe Furlane (ARLeF) e dal Ufici Scolastic Regjonâl dal Friûl-VJ, in cont dal insegnament de lenghe furlane te scuele, che si à davuelte ai 9 di Setembar a Udin. Cun di fat, chê iniziative e à dât pardabon la idee che al è alc che al è cambiât o che al è daûr a mudâ, a svoltâ, a cressi e a vierzi une prospetive divierse pal avignî.

Il tiermin di paragon prin al è chel de Conference regjonâl su la tutele de minorance linguistiche furlane di doi agns indaûr. La sale plene di passe cuindis dîs indaûr, di une bande, e il desert di chê dai 24 di Novembar dal 2012, di chê altre, a son il spieli de situazion: il vueit che al à marcât i ultins agns des politichis de Regjon in cont de lenghe furlane e dai dirits linguistics dai furlans e la rapresentazion fisiche de cjolte di cussience de necessitât di fâ alc di sest de bande sei de ARLeF che almancul di une part dal mont de scuele dal Friûl.

Che tai ultins agns al sedi stât fat pôc o nuie di sest a pro dal furlan e de metude in vore de leç regjonâl 29 dal 2007 tal cjamp de istruzion si lu à viodût ad in plen te relazion presentade de bande des rapresentantis dal Ufici scolastic regjonâl (l’USR), che inte fantomatiche rêt interistituzionâl a pro dal insegnament e dal ûs lenghe furlane metude adun tai altins agns a menzonavin diviers sogjets, ma a ridusevin dut a une sole Provincie e a dismenteavin l’Ateneu furlan.
Une mancjance no di pôc… Lis pussibilitâts a son trê: l’USR no si à inacuart che e esist la Universitât dal Friûl; cheste no à fat nuie par mostrâ che e esist e che, a tacâ di ce che e dîs la sô leç istitutive, e varès di jessi operative propit in chest setôr; ni chel e ni chê altre no àn fat nuie a pro de lenghe, dal so insegnament e dal sô ûs tes scuelis… In cualsisedi maniere: nuie di bon.

E je vere che al è dificil rivâ adore a fâ piês di cussì, ma nol è dome par chest che o pandìn un ciert otimisim. In chê zornade al è saltât alc di gnûf e di bon. Par esempli, si à fevelât dal dirit ae istruzion in lenghe furlane e dal dovê des scuelis di garantîlu te lôr ufierte formative. E ancjemò: la Universitât dal Friûl, adun cun ARLeF e Regjon, e à fat indenant une propueste di un cors di formazion pai insegnants che e somee une robe serie, di nivel almancul di chês imbastidis un pôcs di agns indaûr e po pierdudis pai trois no si sa indulà.

Cumò al covente che soredut la Regjon e sedi coerente cui contignûts che a son saltâts fûr in cheste ocasion e duncje che e passi des peraulis ai fats. Ai 16 di Setembar a Rome, intun incuintri li dal Senât, al è stât sclarît cemût fâ. Si pues e si scuen.

EURO FURLAN
eurofurlan@gmail.com
26/09/2014

«Chistionai pagu, traballai meda», ma in Friûl nuie

O vevin chê di scrivi alc in cont dal candidât ae presidence de Federazion taliane dal zûc dal balon (FIGC) e des sôs declarazions in cont di bananis e pedigree, ma o vin lassât pierdi pal aviliment…

Intant a son saltadis fûr lis gnovis in cont dal fantomatic referendum pe indipendence dal Friûl , al è stât il Mittelefest, che di chel o vevin za scrit alc achì e achì
e il Cagliari Calcio al à inviât la sô gnove campagne abonaments, che e fevele ancje un pôc par sart.

Su cualchidun di chescj argoments o vin publicât un articul sul Quotidiano di vuê. Cumò si pues leilu ancje chi disot.

VONDE CJACARIS. I FANTOMATICS INDIPENDENTISCJ, LA PÔRE DI DOPRÂ LIS LENGHIS “ALTRIS” DAL FRIÛL E L’ESEMPLI DAL CAGLIARI

«Chistionai pagu, traballai meda», ma in Friûl nuie

In Friûl si fevele e soredut si tabaie. Cumò a son ancje chei che a tabain di indipendence. Chest argoment, in particolâr, al è saltât fûr tes setemanis passadis par vie che uns pôcs di lôr a àn fat indenant la propueste di fâ un referendum pe indipendence dal Friûl.

Al vignarès di ridi, ma o cirìn dut câs di viodi – se a’nd è… – i aspiets positîfs di cheste operazion. Cul ferâl di Diogjen, forsit si cjate un: si fevele di «indipendence» cence tabûs. Ma magari cussì no, chest al è masse pôc, stant che lis cuistions dal autoguvier e de autodeterminazion, che a son une robe serie, a vegnin frontadis cence sintiment e cence nancje tignî cont di cemût che di passe un secul a son stadis pensadis e fatis indenant tantis rivendicazion di chê fate in Friûl e pal Friûl.

Cun di fat, di ce che si lei ator, i ponts di fuarce dal program di chescj indipendentiscj a saressin la «jeve militâr obligatorie», il «control dal confins» e lis «bariduris doganâls». Isal chest ce nus covente? No, sigûr. La impression e je che la indipendence fate indenant e sedi in realtât une vore «dipendente» e «dipendentiste», par doprâ un concet – «dipendentisim» – che o vevin cjatât timp indaûr sei suntun mensîl furlan
che suntun sît internet de Sardegne .

Cheste maniere di berlâ «Vonde jessi sotans» e samee jessi plene di sotanance: une altre manifestazion de alienazion culturâl, identitarie e politiche di tancj di lôr, in particolâr in Friûl. Simpri che cheste iniziative no le vedin cjapade sù propit cun chê di fâ confusion e «distrazione di massa» su chestis cuistions, simpri plui urgjentis. Nô o pensìn che il Friûl al vedi plui a ce fâ cu la Scozie, cu la Catalogne e cu la Europe che cul referendum venit, il «Triveneto», la «Padania» e lis «bananis» di Tavecchio…

Une altre convinzion che o vin – e le vin palesade sei achì che tal nestri blog – e tocje la impuartance pal marketing e pe promozion dal teritori des lenghis “altris” de regjon Friûl-VJ, di doprâ te publicizazion e te comunicazion istituzionâl sei dai prodots che dai events e des manifestazions di chenti. Si spietavin un segnâl in chest sens de bande de edizion di chest an dal Mittelfest. A son stâts dome i «Segnali» dal sottitul e salacor un segnalut: il fat che il gnûf president di Mittelfest te cerimonie di scree dal program di chest an al à tacât cul saludâ par furlan, par sloven e par todesc.

Alc al è alc e nuie al è nuie? No savìn. Sigûr al è alc di plui di ce che al fâs l’Udin, cun dut che la cuistion dal “cuasi trasferiment” di Scuffet in Spagne e varès di fâ capî trop che al è impuartant il leam cul teritori e cu la sô int.

Lu àn capît i dirigjents dal Cagliari: cussì la sô gnove campagne abonaments e fevele ancje un pôc par sart.
Un dai sprocs al è «chistionai pagu, traballai meda»: tabaiâ pôc, lavorâ tant. In Friûl nuie ce fâ, almancul par cumò. Cuissà se si movarà alc, magari par Friuli Doc…?

EURO FURLAN
eurofurlan@gmail.com
01/08/2014

Debora, cambia verso

Ancje Euro Furlan al va in feriis. Cumò, però, o sin tornâts, e cussì, par cui che al ves pierdût il nestri articul saltât fûr sul Quotidiano dai 3 di Lui, lu metìn sù ancje tal blog.

Si fevele di autualitât e di Regjon. In chest câs nol covente che la presidente de Regjon e mostri la muse, al baste dome che Zonte e Consei si dedin une dreçade.
Buine leture.

LENGHE FURLANE. SEDIS ENTITÂTS ASSOCIATIVIS DI CHENTI I DOMANDIN AE REGJON DI DÂSI UNE DREÇADE

Debora, cambia verso: fai qualcosa di sinistra

Al è passât zaromai plui di un an di cuant che si à inviade la ativitât de gnove Zonte regjonâl. Cualchi setemane indaûr il guvier de Regjon al à fat indant il so prin belanç anuâl, palesant une buine dose di sodisfazion. E je divierse la valutazion di tancj di lôr, massime tra chei che a vevin votât a pro de coalizion di centriçampe tes elezions dal 2013. Il nivel di sodisfazion dai citadins al è par sigûr plui bas e in tancj setôrs al samee che l’esecutîf al vedi decidût di no decidi e fintremai di movisi in continuitât cu la Zonte di prime.

Si à cheste sensazion in particolâr se si stâ daûr di ce che e à fat – e soredut che no à fat – la Zonte regjonâl tal cjamp de tutele des minorancis linguistichis. Alc dal gjenar lu veve metût in evidence un pôcs di mês indaûr ancje il Comitât/Odbor/Komitaat/Comitato 482. Vinars passât, chel stes comitât e altris cuindis associazions e entitâts culturâls e agregativis di lenghe furlane a àn tornât a bati su chel cantin cu la presentazion di un document che al fotografe la situazion e che al fâs indenant une schirie di propuestis, in maniere clare, serie e documentade.

La domande di fonde pe Zonte e pal Consei regjonâl e je chê di un cambi di mentalitât, a pro di lenghe, culture e dirits, ma ancje a pro de autonomie de Regjon, che in dì di vuê si le difint dome se si le met in vore pe sô reson e pe sô finalitât di fonde: la tutele des minorancis linguistichis (slovens, gjermanics e, apont, furlans). Ta chest an di guvier de Zonte Serracchiani, che si cjatave a gjestî la ereditât penze dal esecutîf di prime, si à viodût cualchi pas indenant, ma la liste dai elements negatîfs e je une vore plui lungje: no son stadis presentadis lis relazions su la metude in vore de leç sul furlan; si àn gjavât ducj i fonts pe cartelonistiche e pe comunicazion istituzionâl; lis sieltis sui sportei linguistics a riscjin di scancelâ esperiencis positivis e di premiâ realtâts che no produsin grancj risultâts; no si àn criteris clârs par assegnâ lis risorsis ai ents impegnâts pe lenghe; si doprin criteris discriminatoris par assegnâ i fonts pe culture; lis politichis pai media a pidimentin propit chei mieçs di comunicazion che di plui e miôr a àn lavorât in chescj agns cun e pe lenghe furlane. Par no fevelâ de istruzion: nuie insegnament curicolâr e nuie formazion sistematiche pai insegnants di/par furlan.

In chest setôr la Regjon e varès di impegnâsi par cjapâ sù la competence primarie e lis risorsis che a coventin par metile in vore. Plui in gjenerâl la Regjon e à di dâsi une dreçade cun politichis linguistichis seriis e cun invistiments di pês: cun cualitât, cun cuantitât e cun continuitât, e no dome cun chel misar 0,02% che la finanziarie regjonâl e da ae lenghe furlane. Si à di «cambiare verso» e fâ «qualcosa di sinistra». E daurman: a tacâ des variazions di belanç e de aprovazion dal Plan Gjenerâl di Politiche Linguistiche.

EURO FURLAN
eurofurlan@gmail.com
03/07/2014

Blanc, Blanc e neri e Mittelfest (ma nissun colibrì)

Vinars stât al è saltât fûr un nestri gnûf articul sul Quotidiano.
Cui che al frecuente par solit il blog si inacurzarà che, almancul te sô prime part, il toc al cjape sù alc che o vevin za scrit cualchi setemane indaûr propit achì.

Però al è ancjemò alc altri, in cont di lenghis, dirits e promozion dal teritori, che al va daûr di cierts resonaments che o vin za fat indenant tai nestris scrits e che si lee cui acjadiments dai ultins dîs.

Inte zornade che l’Udin al presentave il so gnûf alenadôr nus someave just tornâ a fâ indenant une sorte di invît e di richieste, che cuant che tu vâs ator e tu fevelis cu la int tu ti rindis cont che su chel e chê si cjatin in cunvigne tancj di lôr, par che la societât sportive blancje e nere e fasi alc di furlan e par furlan.
Parcè che al è just, al è ben e al conven.

Magari cussì no, si vin cjatâts a fevelâ di lat blanc juste intun moment che al è saltât fûr che al jere ancje lat di altris colôrs…
Ma salacor propit l’ûs des lenghis propriis e il riferiment clâr ae dimension teritoriâl e culturâl dal Friûl a puedin deventâ une strade ancje par saltâ fûr di chestis situazions.

Cun di plui, cualchidun di voaltris, che dongje di lei i nestris articui nus scrîf ancje cualchi messaç di pueste eletroniche, al à osservât che chest articul al è jessût fûr juste intant che al tacave UdinEuropa, une manifestazion a mieze strade tra un marcjât e une sagrone, cun tante robe di mangjâ ator par Udin.
Daûr di ce che si lei e à clamât dongje tancj di lôr. Di ce che si à viodût ancje chest an, però, e je someade une iniziative anonime, un format simpri chel, là che si stentave a viodi sei Udin che la Europe, a part cualchi bandiere.
Se te publicizazion almancul si ves rivât a viodi almancul alc par furlan, ta chês altris lenghis de regjon o par inglês…
Ma cirìn di vodi un aspiet positîf: almancul nol è stât doprât il simbul dal colibrì.

O vin scrit plui voltis (masse??) che e mancje une strategjie: magari chest an, cul gnûf president, il Mittelfest al mostrarà che si pues vêle. Sperìn.

Par intant, cualchi fruçon di vision, in chest sens, al mostre di vêlu cualchidun in Consei regjonâl, cemût che o ricuardavin za doi mês indaûr, in cont de adesion ae rêt europeane NPLD.
Cumò si son inacuarts di chest ancje inaltrò, cemût che si pues lei achì.

A coventin plui Friûl e plui Europe e mancul provincialisim. Buine leture.

LOGOS E LOGO. AL È ALC CHE SI MÔF, MA AL È CETANT CE FÂ, A TACÂ DAL UDIN E DE RASSEGNE DI CIVIDÂT

Blanc, Blanc e neri e Mittelfest

Il lat furlan al è Blanc. Chê de decision dal Consorzi agrari dal Friûl-VJ di batiâ in cheste maniere – Blanc – la sô produzion di lat e je par sigûr une biele gnove. Lassant di bande chei che cumò, impen di domandâ un tai di blanc, a ‘nt domandaran une scudiele…, chest fat al conferme ce che o pensìn e che o scrivìn za di timp: che la lenghe furlane e plui in gjenerâl lis lenghis “altris” dal Friûl e duncje de regjon Friûl-VJ a son un strument impuartant pe promozion dal teritori e dai siei prodots, soredut par vie che a son in stât di fâ conognossi la lôr specificitât e, tal câs dai prodots, la lôr divignince che e varès di jessi une sorte di marcje di cualitât e di origjinalitât.

Chel dal lat nol è l’unic segnâl positîf in chest sens che al è saltât fûr tes ultimis setemanis. Un altri piçul esempli su cemût che – par menzonâ une frase che o vevin let timp indaûr suntun libri – il “logos” al devente “logo” al rive de iniziative de Universitât clamade “Snait Bag”, presentade une setemane indaûr.

La cuistion no tocje dome lis lenghis “altris” di cheste part dal mont che si clame Friûl e il lôr ûs tai nons di prodots, servizis e manifestazions, ma e cjape dentri ancje la produzion culturâl ta chestis lenghis, a tacâ de musiche e dal audiovisîf, che pardabon a podaressin jessi une oportunitât di valorizazion e di promozion dal teritori tant che risorse, prodot e prodot di prodots. Cualchidun al tache a capîlu: par esempli chei di “Sapori di Pro Loco”, che dentri de “sagre des sagris” di Vile Manin, ai 23 di Mai a vevin inmaneât “Tiere di savôrs, Tiere di musiche”, une serade che e presentave une cerce de creativitât in lenghe furlane te musiche e te comunicazion.

Un altri pas indenant – che magari cussì no par cumò nol è cuasi nissun che al mostre di jessi in stât di fâlu – al è chel dal ûs dal furlan, dal sloven e dal todesc ancje tes indicazions testuâls des etichetis dai prodots e te publicizazion e te comunicazion istituzionâl. Ancje chest al è un aspiet che o vin za frontât sei su chestis pagjinis che tal nestri blog (https://eurofurlan.wordpress.com): une maniere par meti in vore ancje l’articul 3 dal Statût de nestre Regjon, cu la garanzie di paritât, di rispiet e di dirits par ducj i citadins, e par promovi il pluralisim linguistic e la tipicitât di chei stes prodots e events, no dome tal setôr culturâl e ta chel enogastronomic, ma ancje tal sport.

Par chest o tornìn a marcâ che dopo dal Blanc nus coventarès il Blanc e neri, cul Udin che al fâs la sô campagne pai abonaments ancje par furlan, che al fâs comunicazion istituzionâl tes lenghis dal Friûl e che al marche di plui il so leam cul so teritori e cu la sô int: al costarès pôc e al valarès tantonon.
In spiete che prin o dopo si movi ancje chel, o pensìn che un esempli di cheste fate al podarès rivâ finalmentri de bande dal gnûf Mittelfest, tal so program e te sô comunicazion. Viodarìn.

EURO FURLAN
eurofurlan@gmail.com

06/06/2014

La Europe o sin ducj nô. Ancje il Friûl

Vuê o sin ai 9 di Mai e, cemût che al è just, si ricuardìn ancje nô de Zornade de Europe.

propit vuê al è jessût ancje un nestri gnûf articul sul Quotidiano, che al è propit dedicât ae Europe, chê che e je e chê che e mancje. Al è un resonament gjenerâl, che propit par chel al tocje ancje chê part de Europe che si clame Friûl. Daûr di une segnalazion di une nestre letore, o vin dât un cuc ancje te direzion di un ciert europeisim che magari cussì no al riscje di fâi cuintri ae idee di Europe ‘unide te diversitât’.

Lu cjatais ancje achì. Buine leture e buine Zornade de Europe.

UE. LA FIESTE DE EUROPE, LIS ELEZIONS, LIS CONTRADIZIONS E LA DIBISUGNE DI PLUI «UNITÂT TE DIVERSITÂT»

La Europe o sin ducj nô. Ancje il Friûl

Vuê e je la Zornade de Europe: une ocasion speciâl di fieste, di riflession e di cognossince in cont dal procès di integrazion continentâl e de citadinance europeane. Cheste date e je stade sielzude ancjemò tal 1985 par vie che propit ai 9 di Mai dal 1950 il ministri pai afârs forescj dal Stât francês, Robert Schuman, al fevelà a Parîs di pâs e di Europe, inviant in cualchi maniere chel cantîr che al è inmò in vore, compagn di chel de Sagrada Familia di Barcelone.

La idee pandude te “Declarazion Schuman” e jere sei semplice che e impegnative: par vê la pâs i Stâts europeans, i protagoniscj principâi dai doi conflits mondiâi de prime metât dal Nûfcent, a vevin di metisi adun, a tacâ de colaborazion tal cjamp economic e po ancje ta chei altris setôrs, cun chê di fâ sù istituzions politichis comuns e intune prospetive di unitât federâl.

Dopo tancj agns no si pues dineâ che chê idee e jere juste: cun dut des tantis contradizions che a àn segnât la costruzion de unitât europeane e che si palesin soredut di un pôc di timp incà, no podìn fâ di mancul de Europe.
Però nus covente une Europe divierse di chê che masse dispès e somee jessi dome “des bancjis e dai burocratis”.
Nus covente une Europe, là che a contin di plui i citadins e mancul i Stâts e là che a valin di plui lis personis, i teritoris, lis comunitâts e mancul la finance, i interès e i afârs di pôcs di lôr: une Europe plui unide, plui solidarie e plui europeane.

Di cheste Europe a fevelin in pôcs, almancul tra i candidâts aes elezions dai 25 di Mai, stant che di une bande si stente in gjenerâl a viodi la Europe tai programs e te propagande e di chê altre, se l’argoment al ven frontât, e je une polarizazion tra un antieuropeisim vecjo, ideologjic, nostalgjic e ipernazionalist e un ciert europeisim che si mostre superficiâl, e masse “cjacaris e distintîf”, tra bandierutis blu e sprocs disvuedâts di sostance.

Cussì, ae idee e ae prospetive de unitât de Europe no ur fasin cuintri dome l’antieuropeisim e lis contradizions de UE, ma in maniere plui o mancul cussiente ancje tancj di chei che a disin di jessi a pro. Un esempli – daûr di une segnalazion che nus à rivade di une nestre letore – al è chel di “Beurope”: e je une biele iniziative che si davuelç in chescj dîs a Udin propit cun chê di promovi, massime tra i plui zovins, la cussience europeane e la cognossince de Europe, a tacâ de sô dimension multiculturâl, però e somee dismenteâsi che in cheste dimension plurâl al esist ancje il Friûl cu lis sôs lenghis.

Forsit, daûr de Europe “unide te diversitât” e dopo dai manifescj par furlan pai 25 di Avrîl e des declarazions dal sindic sul furlan “lenghe de Resistence”, la nestre letore si spietave publicitât bilengâl e riferiments specifics ae nestre realtât tal chel program, che impen al somee jessi chel stes che al sarès a Mantova o a Foggia.

Cun dut achel, la Europe o sin ducj nô. E ancje il Friûl.

EURO FURLAN
eurofurlan@gmail.com

Italie, Europe e minorancis. Rapuart gnûf, problemis vecjos

Par cui che no lu ves let chê altre dì, o publichìn il nestri articul saltât fûr ai 10 di Avrîl sul Quotidiano.
Al fevele dal gnûr Rapuart presentât dal Guvier talian al Consei de Europe e di une iniziative interessante cjapade sù de bande dal Ufici di presidence dal Consei regjonâl de Regjon autonome Friûl-VJ che e tocje la adesion ae NPLD.
Il rapuart si pues cjatâlu achì.
Buine leture (dal articul e dal document).

MINORANCIS. IL STÂT TALIAN AL STENTE TE TUTELE, MA CHÊ ADESION DE REGJON AE NPLD E JE UNE BUINE GNOVE

Consei de Europe. Rapuart gnûf, problemis vecjos

La Europe e clame e la Italie e rispuint come simpri, a taliane vie. Magari cussì no, no je une biele robe e soredut no je une novitât, sei in gjenerâl sei cun riferiment specific ae tutele des minorancis.
Une conferme in chest sens e rive propit dal cuart Rapuart su la metude in vore de Convenzion di suaze pe protezion des minorancis nazionâls presentât de bande dal Guvier talian al Consei di Europe sù par jù un mês indaûr.

Il document al varès di presentâ la situazion des minorancis tal Stât talian e ce che lis autoritâts statâls e regjonâls a àn fat (o mancul) pe lôr tutele daûr des legjislazions statâl e regjonâl e dai impegns cjapâts sù di Rome cu la ratifiche de Convenzion di suaze pe protezion des minorancis nazionâls, fate cu la leç 302/1997.
La relazion e tocje la situazion tai ultins cinc agns di rom e sinti e des dodis comunitâts (tra chestis a son i furlans, i slovens e i gjermanics dal Friûl-VJ) destinatariis di tutele daûr de leç 482/1999.
Il Rapuart al cîr di marcâ i fats positîfs e di sghindâ, par ce che si pues, lis cuistions plui griviis.
Di une bande nol pues fâ di mancul di frontâ i temis che a tocjin rom e sinti – stant che al è un dai argoments là che il Consei de Europe i veve za tirât lis orelis al Stât talian – ancje se lu fâs in maniere parziâl e nebulose; di chê altre al cîr di no tocjâ masse in profonditât cuistions di fonde che a tocjin l’insegnament des lenghis des minorancis tes scuelis e il lôr ûs de bande de concessionarie di servizi public radiotelevisîf.
Chescj a son altris cantins là che il Consei di Europe al veve za marcât lis mancjancis talianis e al è une vore probabil che a Strasburc a vedin alc ce dî ancje chest viaç.

Che la situazion e sedi almancul plene di contradizions – se no piês – al ven fûr dai documents fats indenant de bande di cualchi istituzion regjonâl e di cualchi associazion e organizazion no governative, che si cjatin in zonte dal rapuart. Al è il câs des relazions, in cont de comunitât furlane, prontadis de bande de ARLeF (Agjenzie regjonâl pe lenghe furlane) e dal Comitât/Odbor/Komitaat/Comitato 482.

Dâts e elements concrets a saltin fûr soredut di chest test. Di une bande lei cemût che tai ultins agns la leç 482/1999 e la leç regjonâl 29/2007 no sedin stadis metudis in vore al fâs vignî i sgrisui. Di chê altre al fâs plasê viodi che almancul cualchidun chi di nô al cjale lis robis in muse, lis clame cul lôr non e lis presente in maniere documentade e ecuilibrade. Al ven di pensâ che se no fossin chescj tescj zontâts il gnûf Rapuart talian al sarès inmò plui debul.

Si puedial dî che il Friûl e la Regjon a rispuindin un tic miôr ae clamade de Europe? Forsit sì. Une conferme e rive de decision, cjapade sù ai 9 di Març stâts, de bande dal Ufici di presidence dal Consei regjonâl di aderî ae NPLD, la rêt europeane pe promozion de diversitât linguistiche. Un piçul pas te direzion juste.

EURO FURLAN
eurofurlan@gmail.com

Il «monalinguismo» nol à confins

Tai dîs passâts o vevin vût scrit in cont di chel che al ven clamât «monolinguismo isterico».

Par vie dal nivel alt di isterisim e di stupiditât o vin pensât che si podarès clamâlu ancje «monalinguismo».

O sin tornâts su chescj argoments vinars stât tal nestri articul che al salte fûr une volte al mês te pagjine 6 dal Quotidiano, tornant a cjapâ sù alc di ce che o vevin za scrit tal blog e zontant alc altri.

La idee che dentri dai confins di un stât e vedi di esisti dome une lenghe e someave jessi alc di une vore tipic talian.
Lis gnovis che a rivin dal Stât spagnûl nus permetin di dî che nol è cussì.
No savìn se chest al sedi un ben o un mâl…

Buine leture.

LENGHIS. SI FÂS FIESTE PE ZORNADE INTERNAZIONÂL E DUCJ I DÎS A SON CHEI CHE A ÀN PÔRE DE DIVERSITÂT

Ancje il «monalinguismo» al è cence confins

Cualchi setemeane indaûr, ai 21 di Fevrâr, e je stade memoreade la Zornade internazionâl de lenghe mari. Cheste ricorence e je stade proclamade de bande de Conference Gjenerâl de UNESCO par promovi il valôr de diversitât linguistiche e il dirit di doprâ la lenghe proprie.

La impuartance de cuistion e salte fûr ad in plen de date sielzude. Cun di fat, ai 21 di Fevrâr al cole l’inovâl di une grande manifestazion fate tal 1952 dai students de Universitât di Dhaka a pro dal ricognossiment de lenghe bengalese (‘bangla’) tant che lenghe uficiâl. In chê dì diviers manifestants a forin copâts de bande des fuarcis di polizie dal Pakistan, che in chê volte al cjapave dentri ancje il Bangladesh, deventât indipendent dome tal 1971.

Magari cussì no, si scuen scombati ogni dì par chest dirit. E ogni dì a vegnin fats indenant ostacui e prejudizis di ogni sorte cuintri di chest dirit e plui in gjenerâl cuintri dal pluralisim linguistic. Chest al sucêt ancje in Friûl, cemût che o savìn ancje masse ben. Un esempli di cheste situazion lu vevin segnalade tal nestri blog (https://eurofurlan.wordpress.com), tirant dongje la testemoneance cjatade su Facebook di doi gjenitôrs che a Udin, tal 2014, une mestre di scuele ur veve dit che a vevin di fevelâ cu la lôr fie dome par talian.

Al vignarès di ridi se nol fos di vaî. Cun di fat, l’aspiet ridicul al è chel che par solit chei che a son cuintri dai ûs publics de lenghe furlane e dal so ûs e dal so insegnament a scuele a disin che il furlan al va ben dome in cjase, in famee. E alore? No ise une biele prove di schizofrenie? Plui in gjenerâl e je une des tantis manifestazions di chel ategjament, che magari cussì no al è une vore presint propit tal Stât talian, che al ven definît za di cualchidun tant che «monolinguismo isterico».

Cheste tindince si palese ancje in altris contescj. Par esempli, tropis voltis vino sintût: «lassait pierdi il furlan, miôr l’inglês»? Ben: in tantis universitâts dal Stât talian a àn tacât di un pôc di timp a fâ lezion in cheste lenghe, però in cualchi câs – par esempli a Milan – i professôrs i àn fat cuintri a cheste decision e a son stâts ricors e ancje sentencis in difese de lenghe taliane.

La cuistion e je interessante e di chê a’nt saltin fûr altris dôs. Di une bande, che a son fîs e fiastris tra i dirits e tra lis lenghis. Di chê altre, che – se i criteris a son chescj – e pues esisti simpri une lenghe che e je plui “utile”, plui “internazionâl”, plui “moderne” de tô…

Plui che di «monolinguismo isterico», si podarès fevelâ di «monalinguismo».

E je une malatie che si cjate ancje inaltrò: tal Stât spagnûl, par esempli, là che il zuiadôr dal Barcelona, Carles Puyol, al à fat savê che ae fin de stagjon al mole di zuiâ. Lu à fat par catalan e par chest une part dai «opinion leaders» spagnûi i àn fat cuintri cun ducj i mieçs.

Ancje il «monalinguismo» al è cence confins.

EURO FURLAN
eurofurlan@gmail.com

Une candidature falide, une candidature falade

Al jere za un pôc di timp che o vevin chê di scrivi alc in cont de candidature di «Venezia con il Nordest capitale europea della cultura 2019». La ocasion e je saltade fûr dome cumò, cun chest articul publicât vuê sul Quotidiano.

Cemût che o podês lei, si fevele di chei che par nestri cont a son i limits di fonde di chê inziative. Al è alc che al vâl ancje par altris iniziativis, che a mantegnin chel stes ategjament e chê stesse vision, che in teorie e in pratiche a dismentein il Friûl o lu dinein dal dut.
Buine leture.

2019. NUIE CE FÂ PAR VIGNESIE E PES REGJONS DAL “NORDEST” «CAPITÂL EUROPEANE DE CULTURE»

Une candidature falide, une candidature falade

Si visaiso de candidature di «Venezia con il Nordest capitale europea della cultura 2019»? Tra la fin dal 2010 e l’imprin dal 2011 i rapresentants istituzionâi des Regjons dal Venit e dal Friûl-VJ, des Provinciis autonomis di Trent e di Bolzan e dal Comun e de Provincie di Vignesie a vevin firmât un protocol di intese di pueste e po a vevin metût adun un comitât specific, che di in chê volte al à tacât a inmaneâ une schirie di iniziativis par sapontâ chê candidature. Par sù par jù doi agns, a son stadis fatis centantis azions di informazion e promozion, sei a nivel teritoriâl che cjalant difûr e su la candidature a àn investît un pôcs ducj i ents teritoriâi des trê regjons di chel che a clamin “Nordest”.

Il percors al è stât imbastît cun mistîr, cun mieç potents e cun tancj events e soredut cuntun grant lavôr par ce che al tocje la comunicazion. Cun di fat, ducj i apontaments e dutis chês altris azions metudis adun dal comitât promotôr e dai siei orghins diretîfs e operatîfs a àn gjoldût simpri di un rivoc mediatic fuart e positîf. Tra il 2011 e il 2013 stampe, radios, televisions e gnûfs media, tal dâ notizie di ognidun di chei events e incuintris plui o mancul publics, a vevin marcât cuntune vôs uniche lis «sorti progressive» de candidature, la sô validitât e cuasit ancje la sigurece di sucès. Impen e je lade a finî intune altre maniere, stant che ai 15 di Novembar, pocjis oris dopo de audizion a Rome de delagazion dal comitât promotôr, al è saltât fûr che la candidature e vignive boçade aes preselezions.

A pet di dut il scjas mediatic des diviersis fasis de promozion de candidature, chê gnove clamorose dai 15 e dai 16 di Novembar dal an passât e je passade une vore a cidin. E al è un pecjât, parcè che lis motivazions fatis indenant de comission di valutazion a meretin cognossudis e su chês al merete fat un pensament.
La candidature e je stade fermade par un probleme di abondance, stant che il riferiment a une citât cun trê regjons aministrativis e almancul cinc ambits teritoriâi al leve une vore innà des dimensions de “citât capitâl”.
La cuistion no je dome formâl, cemût che a àn marcât i “supporters” de candidature, ma e à une valence sostanziâl, in tiermins no dome di abondance ma ancje di mancjance, in particolâr cuntune cjaladure furlane.

Chest al è par vie che cun dut des declarazions in cont di pluralisim teritoriâl, culturâl e linguistic – si cjatave ancje un riferiment al fat che ta chestis tieris a vivin dongje «italiani, tedeschi, ladini, friulani, sloveni…» – masse dispès te comunicazion e saltave fûr une idee vecje e pôc rispietose dal pluralisim e de realtât. La stesse che si viôt in ciertis propuestis di riorganizazion des regjons dal Stât talian che a zirin in chescj dîs: chê des “Venezie”, dal “Triveneto” e dal “Nordest” «uno e trino», là che nol è puest par chê part de Europe e dal mont che si clame Friûl.

EURO FURLAN
eurofurlan@gmail.com

14/02/2014