Atualitât, Sport

Stadio Friuli o Mer…Dacia Arena?

Al è tacât il gnûf campionât di balon, ma plui che di balon zuiât – cundut de vitorie storiche cuintri de Juve di domenie passade aTurin – chi di nô si fevele dal gnûf stadi di Udin e soredut dal so non.
Parcè? Parcè che, lant daûr des resons sacris dal diu business e de mancjance di bêçs tes cassis dal Comun, de bande de Udinese Calcio spa e de aministrazion comunâl e je stade fate indenant la propueste – che cualchidun le calcole tant che une decision bielzà cjapade sù, ancje se cumò si varà di tornâ a pensâi parsore – di cambiâ il non dal implant dai Riçs, che al è stât tornât a fâ sù tal ultin an.

Nus somee un bon motîf par discori, par sustâsi e salacor ancje par incazâsi, cemût che al fâs plui di cualchidun, in place, su lis pagjinis dai gjornâi e un pôc dapardut inte rêt des rêts. Cundut achel la iniziative di clamâ il gnûf stadi di Udin, ‘Dacia Arena’, no nus lasse par nuie scaturîts.

Cun di fat, nol è par sigûr alc di gnûf il fat che i parons e i sorestants de scuadre di balon furlane si movin cence tignî in nissun cont dal Friûl e dai furlans, cundut che i blancs e neris a varessin di jessi la bandiere sportive plui impuartante di cheste tiere e de sô int e che propit i furlans, che a son in Friûl e ator pal mont, a son propit chei che i tegnin di plui ae scuadre.

I parons e i sorestants de societât blancje e nere nus àn mostrât za di tant timp che no si visin dal Friûl e dai furlans – chei in Patrie e chei pal Mont – nancje cun chê, stant che “business is business”, di calcolâju tant che “clients” principâi dal Udin, tal cjamp, in tribune, par television e te compre di gadgets e merchandising.

Cheste mancjance di atenzion si palese in dì di vuê cu la cuistion dal non dal stadi, ma al è za tant timp che di plui bandis al ven domandât ae societât che e fasi alc di furlan, par esempli cu la comunicazion istituzionâl ancje in lenghe furlane o cu la segnaletiche dal stadi par furlan e la rispueste e je simpri chê: nuie!
La situazion e je cussì grivie che salacor al è stât calcolât tant che un grant sucès il fat che la seconde maie de scuadre e sedi zale e blu e no colôr di rose, narançon o a pois…

In confront – a proposit di “business is business” – a àn plui atenzion pai “clients” chei dal Carrefour dal Terminal Nord, che almancul cuntun cartel alì de jentrade dal supermarcjât, cundut che al è scrit cuntun eror («benvignûs» al puest di «benvignûts»…), a palesin un et di rispiet pe specificitât dal teritori dulà che a lavorin e che a vendin.

Si cjatìn in cunvigne cun cui che al proteste e cun cui che la scrîf sui gjornâl, marcant il fat che «l’Udinese si sta progressivamente staccando dal territorio» (Une biele discuvierte! Nus vignarès di dî…).
Cun di plui ‘Dacia Arena’ no nus somee chel non cussì figon: al baste zontâi un «Mer» denant e la robe e scomence pardabon a puçâ…

Però al è un però. Anzit, a’nd è doi.

Il prin al è chest: a proposit de puce, cemût che al salte fûr di une letare di Giuliana Pozzo publicade su UdineseBlog, ancje in cheste ocasion un innomenât politic locâl al à mostrât di vê, soredut cuant che al fevele di furlan e di Friûl, un podê sù par jù compagn di chel di Re Mida, ancje se invezit di stramudâ in aur dut ce che al tocje, al riscje dome di dâi un ciert odôr e un ciert colôr moron.

Il secont al è chest. Insom ‘Stadio Friuli’ al è un non dome par talian. Che al resti cussì o che magari si lu clami – ancje uficialmentri – ‘Stadi Friûl’, che al deventi ‘Dacia Arena’ o in cualsisedi altre maniere (‘Friûl Dacia Arena’? cussì al va al mancul ancje il pericul dal «Mer», che al restarès tal câs di une denominazion taliane…), e je ore che chel implant al mostri di jessi un tic plui furlan e duncje plui internazionâl e che e fasi compagn la Udinese Calcio: cu la segnaletiche in plui lenghis e duncje ancje par furlan, cul sît internet ancje par furlan, cul speaker che al fevele ancje par furlan, e magari cun esibizions di musiciscj furlans prime des partidis, cu la proiezion di videos e vie indenant…
Lu vi za scrit altris voltis: in Europe e inaltrò pal mont si fâs cussì. O pensìn che al sarès content ancje il «main sponsor».

Advertisements
Standard
Atualitât, Politiche

Italicum: simpri plui «nomen omen»

Passe un mês indaûr o vevin scrit alc in cont dal ‘Italicum’, il progjet di gnove leç eletorâl pal Parlament talian.

Za in chê volte al someave pensât cun chê di limitâ rapresentance, partecipazion politiche e paritât.

Cun di plui, za in chê volte la leç eletorâl in discussion e mostrave di jessi cuintri des minorancis linguistichis e in particolâr dai sarts e dai furlans, salacor in maniere piês des leçs eletorâls za in vore, ven a dî l’innomenât ‘Porcellum’ (un non che al è une garanzie…) e la stesse leç pes elezions europeanis.

Par chel, za in chê volte si varès podût dî che chel progjet di leç eletorâl al jere une altre prove di cemût che la Italie e je «una e incoreggibile». O ben, che in cont dal ‘Italicum’, in maniere sù par jù compagne che pal ‘Porcellum’, si varès podût doprâ la innomenade detule latine «nomen omen».

Magari cussì no, tes ultimis setemanis dut chest al à cjatât gnovis confermis, in particolâr in cont de definizion des circoscrizions eletorâls inte regjon che e ten dongje il Friûl cun Triest.
In struc: l’ ‘Italicum’ al mostre di jessi inmò plui ‘Porcellum’ dal ‘Porcellum’ e, par chel, al mostre di meretâsi simpri plui il coment par latin «nomen omen».

Dut chest al salte fû in particolâr de division dal Friûl-VJ in dôs circoscrizions, sei inte sô prime version che inte ultime fate buine dal guvier talian joibe passade.

Tal prin câs, dongje de citât di Triest e dai cinc comuns de sô provincie si cjatavin dut il Friûl orientâl, di Monfalcon a Tarvis. L’intindiment declarât al jere chel di garantî la rapresentativitât de minorance slovene, tignint dongje intune sole circoscrizion ducj i 32 comun dulà che chê e je presinte.
Al jere un alibi une vore clopadiç, no dome par vie che ancje in chel câs la pussibilitât di elezion di un parlamentâr sloven e sarès stade dome daûr di une concession – inte composizion des listis – de bande dai partîts talians, cemût che al à mostrât a clâr il conseîr regjonâl Igor Gabrovec, ma soredut par vie che, daûr dal articul 6 de Costituzion e dal articul 3 dal Statût speciâl de regjon autonome Friûl-VJ, se si à di garantî une minorance linguistiche (i slovens), si à di fâ compagn ancje cun chês altris.

Ma forsit al è ancjemò cualchidun che al vûl meti cuintri i furlans e i slovens…

Cumò che la circoscrizion triestine e cjape dentri il Friûl gurizan e dute la Basse fintremai al Tiliment, la situazion e je salacor ancjemò piês. Cun di fat, no je plui nancje la unitât de circoscrizion che e cjape dentri i comuns là che e je la minorance slovene, intant che si torne a fâ «carne di porco» dal Friûl e de Furlanie, simpri cul intindiment di meti i eletôrs furlans tes cundizions di scugnî votâ un candidât triestin: triestin no tant pe divignince ma soredut par une cierte vision dal mont e de regjon….

La situazion de regjon che e ten dongje il Friûl e Triest e je particolâr, par cuistions storichis, linguistichis e culturâls. E je une regjon speciâl e par chel e à une autonomie speciâl!
Però ancje in cheste ocasion cui che al varès di savêlu e di fâlu savê – i parlamentârs di chenti e la Regjon – no lu àn fat.

Anzit, plui di cualchidun di lôr, compagn che intal câs de riforme de Rai, al conte chê dal ors: che il principi di tutele des minorancis nol vâl compagn par dutis lis comunitâts che la lôr lenghe e je divierse di chê taliane e che ce che si pues fâ pe Val di Aoste e pal Trentin-SüdTirol no si pues fâ chi di nô.

Propit par rispietâ la autonomie speciâl dal Friûl-VJ, i dirits di ducj i citadins e duncje chei des minorancis linguistichis, ancje chi di nô si varès vût di meti adun circoscrizions uninominâls o ben di fâ dôs circoscrizions: une par Triest e une pal Friûl.
E sarès stade une ecezion, rispiet ae linie gjenerâl dal ‘Italicum’, compagne di chês pal Trentin-SüdTirol e pe Val di Aoste. Une robe speciâl e par chel normâl.

Si podaraie ancjemò dreçâ cheste situazion? Viodarìn: in zûc no son dome lis alchimiis numerichis par vuadagnâ sentis in Parlament, ma a son soredut i dirits des personis, dai citadins, e cun chei la autonomie de regjon che esist dome par garantîju pardabon.

Al è dibant fevelâ di specialitât e di specialitât in pericul se no si le met in vore pardabon e ducj i dîs in maniere normâl…

Standard
Atualitât, Friulanofobie, Politiche

Rai e furlan: la Italie e je «una e incorreggibile»

«L’Italia è una e incorreggibile». No si visìn indulà che le vin sintude pe prime volte, però cheste frase nus somee simpri di grande atualitât, massime cuant che si fevele di (mancjade) tutele des minorancis linguistichis e in particolâr di chê furlane.

La conferme plui resinte in chest sens e rive dal gnûf dissen di leç dal Guvier in cont de riforme de Rai e dal servizi radiotelevisîf public, che al è stât fat bon vinars stât dal Senât.

Par ce che al tocje radio e television publiche e minorancis sei l’esecutîf che senatôrs e senatoris a mostrin un altri viaç di no cognossi ni la esistence dal articul 6 de Costituzion («La Republiche e tutele lis minorancis linguistichis cun normis specifichis»), ni la esistence de Leç 482/1999 (là che a son diviersis «normis di tutele des minorancis linguistichis storichis» e tra chestis al è l’articul 12 che al fevele propit di servizi radiotelevisîf public in maniere clare e precise) e dal DPR 345/2001 (che al è il Regolament pe metude in vore de stesse Leç 482, là che l’articul 11 al zonte ancjemò clarece in cont di cemût che si à di «sigurâ lis cundizions pe tutele des minorancis» in chest cjamp) e nancje il fat che a tacâ dal 2000, e soredut dal 2005 incà, il Comitât di esperts che al sta daûr de metude in vore de Convenzion cuadri pe protezion des minorancis nazionâls, ratificade de bande dal Stât talian ancjemò tal 1997 cu la leç 302, e po ancje il Comitât dai Ministris dal Consei de Europe a continuin a marcâ – un cu lis sôs Opinions e chel altri cu lis sôs Risoluzions – che il Stât talian nol rispiete i impegns che al à cjapât sù cun chê ratifiche propit in cont de tutele des minorancis tal cjamp de radio e de television publiche e in particolâr cun rivuart pes comunitâts furlane e sarde.

Salacor vinars stât al è sucedût alc di piês, almancul se o cjalin la cuistion cun voi furlans. Cun di fat, intant che cualchi senatôr de Sardegne al à presentât almancul un emendament che al comedàs il test dal dissen di leç cun riferiment ae comunitât sarde, ancje se nol à rivât a jonzi nissun risultât, chei elets in Friûl no àn fat nuie e no si àn inacuart di nuie.

I unics che a àn vût alc ce dî, fûr dal palaç, a son stâts i sindics.
Al à tacât il sindic di Cjarlins, che tant che president de Assemblee de comunitât linguistiche furlane, costituide dome cuindis dîs indaûr, al à denunziât la enesime injustizie e il fat che no si pues dâ acet a un test di cheste fate, in rapresentance di chei Comuns che a àn za formalizât la lôr adesion a chel organisim ma plui in gjenerâl di ducj i 175 Comuns di lenghe furlane de regjon Friûl-VJ (e salacor ancje di chei che a son sot Vignesie).
Al à continuât ancje il sindic di Udin, che al à sunât la svearine pai parlamentârs dal Friûl, par che almancul i deputâts si movin e a fasin ce che al covente par dreçâ une situazion che no je plui sostignibile.

La robe che e fâs vignî i sgrisui e je che cualchi senatôr di chenti al à vût dit che il nivel costituzionâl di tutele de minorance linguistiche furlane e di chê sarde al sarès plui bas di chel di altris comunitâts, tant che i sudtirolês di lenghe todescje de Provincie di Bolzan. E je une argomentazion che no à nissune fonde juridiche: l’articul 6 de Costituzion al vâl par dutis lis minorancis in maniere compagne!

La liende de (fantomatiche e inesistente!!!) diversitât di nivel costituzionâl (sic!!!) tra la tutele di une minorance e chê di une altre e je la stesse che cualchidun al à fat indenant par justificâ il fat che inte regjon autonome Friûl-VJ la riforme de leç eletorâl no ten cont des minorancis linguistichis.

Ancje su chest fat la Assemblee de comunitât linguistiche furlane e à fat sintî la sô vôs, dongje di altris sogjets istituzionâi, politics e de societât civîl.

Par cuintri, ancje intal câs dal vôt dal Senât, al fâs scjas il cidinôr dai vertiçs de Regjon, intant che fintremai il president de Sardegne, Pigliaru, che in tancj di lôr lu calcolin avonde flap massime in cont di lenghe sarde e di tutele, al à fat capî che la robe no va par nuie ben.

Standard
Atualitât, Politiche

Al è un judiç a Berlin. E a nd è un ancje a Rome

Une biele gnove par cui che i crôt ae justizie, ae legalitât e al rispiet pal teritori. E je chê che e je saltade fûr sù par jù dôs setemanis indaûr, cuant che ai 23 di Lui il Consei di Stât al à vût depositât la sô sentence in cont de realizazion dal eletrodot Redipulie-Udin Ovest.

Il Consei di Stât al à valutât ilegjitime la decision dal Ministeri pai bens e pes ativitâts culturâls di autorizâ la costruzion de opare, fasint cuintri al parê de Sorintendence pai ben architetonics e paisagjistics dal Friûl-VJ, che tal 2010 e veve marcât il fat che, cun chei pilons di passe 60 metris di altece che a devastin il paisaç, e varès fat dam ae coletivitât.

La sentence dal Consei di Stât e rive daûr dal gnûf ricors fat indenant di siet Comuns, di un trop di associazions e dal Comitât pe vite dal Friûl rurâl cuintri de pronunzie dal Tar dal Lazi dal mês di Fevrâr dal 2014 che e jere a pro de realizazion dal eletrodot.

Te sô sentence, che in tiermins juridics e je une fermade definitive pe opare, che tai ultins mês e je stade puartade indenant in maniere une vore svelte, cundut che e jere ancjemò “sub judice” (o forsit juste par chel…), il Consei di Stât al à marcât il fat che il Ministeri pai bens e pes ativitâts culturâls, te sô valutazion che e tignive dongje l’impat sul paisaç dal implant e il fat che se al fos stât fat sot tiere al varès costât di plui, al è lât fûr des sôs competencis, che impen a tocjin bens culturâi e paisaç. A Milan a disin: «ofelè, fa ‘l to mestè».

Il pont de sentence al è propit chel: la tutele dai paisaç no pues vignî passade di altris interès di utilitât publiche.

Cumò, daûr de sentence, lis struturis za metudis adun a varessin di jessi gjavadis vie e l’eletrodot, se al covente fat, si à di fâlu passâ sot tiere. Cun dut achel, par plui di cualchidun, massime tes istituzions, tes categoriis economichis, tal sindicât e tai mieçs di comunicazion, cuintri des leçs e des sentencis e varès di valê la regule dal “fatto compiuto”… ae taliane vie.

Viodarìn cemût che e larà a finîle. Par intant al merete marcât il fat che nol è dome un judiç a Berlin, ma a nd è un ancje a Rome. E soredut che – cemût che a dimostrin chei che fint cumò a àn scombatût cheste bataie in non de legalitât, de difese dal teritori e, insom, de autodeterminazion sociâl e economiche dal Friûl e che cumò i fasin cuintri ancje aes gnovis mistificazions teroristichis in cont di energjie, lavôr e economie – no ducj i furlans a son sotans.

Par fâsi une idee su la situazion:

http://comitat-friul.blogspot.it/2015/07/stop-alla-vergognosa-campagna-stampa-di.html

https://www.facebook.com/comitato.friulirurale?fref=ts

https://comitatofriulirurale.wordpress.com/

Dret & Ledrôs 01.08.2015

Standard