Atualitât, Dome pal blog, Friulanofobie, Politiche

Lenghe furlane e Regjon: «Debora, fai una cosa di sinistra. Una cosa di civiltà. Una cosa…»

Si visaiso di Nanni Moretti, che tal film ‘Aprile’ al domandave a D’Alema: «Dì una cosa di sinistra. dì una cosa anche non di sinistra, di civiltà. Dì una cosa»? Une robe sù par jù compagne – ancje se in chest câs l’invît al è soredut a fâ e a movisi – e je stade fate ai 25 di Novembar de bande dal Comitât-Odbor-Komitaat-Comitato 482, che al ten dongje associazions e altris entitâts espressions des comunitâts furlane, slovene e gjermaniche dal Friûl.

Intun incuintri public a Udin, al è stât presentât un document là che si marche che magari cussì no la gnove aministrazion regjonâl, almancul fint cumò, no à fat ancjemò nuie tal setôr de tutele des minorancis linguistichis – e in cheste suaze soredut in cont de comunitât di lenghe furlane – e che la sô azion e risulte pericolosamentri in continuitât cun chê di prime che in cinc agns e à maltratât lenghis e dirits linguistics.

La tutele des minorancis linguisitichis e une azion serie metude in vore de bande de Regjon in chest setôr a son une robe impuartante, pe valorizazion de diversitât culturâl, pe garanzie di dirits di fonde e pe metude in vore di une strategjie di disvilup sociâl, economic e politic che e sedi inovative, sostignibile e democratiche.
Al vignarès di dî: une robe di çampe, une robe di sest e une robe juste, in particolâr par cui che si declare progressist.
Plui in gjenerâl, cheste e je une robe di civiltât e di democrazie che e varès di lâ plui innà des divisions tra partîts, coalizions e posizions ideologjichis, stant che e va daûr des previsions de Costituzion e dai indreçaments e dai principis che si cjatin a nivel internazionâl e european, che a son lis fondis di ispirazion de Leç statâl 482/1999 su la tutele des minorancis linguistichis e de Leç regjonâl 29/2007 che e tocje in particolâr la lenghe furlane.

La tutele des minorancis linguistichis e une azion serie de bande de Regjon in chest setôr a son, par dutis chestis resons, une robe impuartantone pe Regjon autonome Friûl-VJ e par cui che le governe, massime cumò: parcè che tai ultins agns cheste, che e je la fonde de autonomie regjonâl e soredut la finalitât di fonde de sô metude in vore, e je stade sbeleade e e je lade al mancul; parcè che, stant che no ven difindude e soredut no ven praticade dal interni, la autonomie speciâl e je menaçade a fuart dal difûr, cemût che si viôt sù par jù ogni dì; parcè che de gnove aministrazion regjonâl si spietâvisi un ategjament diferent, miôr di chel di chê di prime, ancje daûr des cjoltis di posizion che si vevin palesadis vie pe campagne eletorâl e ancjemò plui indaûr tal timp, cemût che si lei achì.

Cussì, il document fat indenant de bande dal Comitât-Odbor-Komitaat-Comitato 482 si à di leilu e si à di tignî cont dai siei contignûts, par vie de sô serietât e dal so jessi precîs e fondât su fats, numars e altris dâts concrets.
Cun di fat, cuant che al denuncie l’imobilisim de Regjon, cuant che al mostre che cui che al comande a Triest e sul Friûl nol à fat nuie o che se al à fat alc al à fat alc di negatîf, tal merit e tal metodi, cu la modifiche in piês de part de Leç regjonâl 29/2007 in cont des televisions intant des variazions di belanç dal mês di Lui, cuant che al mostre la prospetive positive de metude adun di un sisteme scolastic plurilengâl e di cualitât par ducj e cuant che al marche che chê dai tais e de mancjance di strategjie in chest setôr e je une politiche suicide, no lu fâs par fâ polemiche e par vuadagnâ cualchi titul sui gjornâi. Il Comitât-Odbor-Komitaat-Comitato 482 al domande ae politiche di fâ politiche pardabon: di lavorâ pe ‘polis’, pe int, pai dirits di ducj. Parcè che la tutele des minorancis – e i furlans a son tancj, ma propit par chest a son ancjemò plui minorizâts – e zove ancje a cui che al fâs part de maiorance.

Par chest, al covente che cui che al comande a Triest e sul Friûl al lei, al scolti e si movi. Al covente che al mostri di vê let, di vê scoltât e di vê capît.
Cun dut che no je dome une cuistion di bêçs, ma ancje di strategjie e di prospetive in cont di ûs e insegnament dal furlan te scuelis, di educazion plurilengâl, di ûs de lenghe furlane tai media e in ducj i ambits de vite di ogni dì, di valorizazion des profesionalitât e des competencis di cui che al lavore ben in chest setôr dai puescj di vore che a son za e di formazion e di creazion di professionalitâts gnovis pal avignî, al covente fat alc daurman.

Duncje, se cuant che e vignarà fate buine la finanziarie pal 2014, i bêçs pe lenghe furlane a cressaran de cuote di cumò che e rive a pene al 0,02% di dut il belanç de Regjon, al vûl dî che al vignarà fat alc: alc di çampe, alc di democratic, alc di sest.

Il document dal Comitât-Odbor-Komitaat-Comitato 482 si pues leilu e discjamâlu achì: http://com482.altervista.org/comunicats/comst13_06_it.pdf.

Advertisements
Standard
Articui 2013, Atualitât

Sino speciâi o sino dome cocâi?

E va un grum di mode chê dal «caro estinto». O ben, par jessi plui precîs: chê dal «caro (quasi) estinto». Magari al è par vie a son stadis che nol è tant la Gnot dai Muarts o – al dipent dai guscj… – chê di Halloween, ma al è dut un vaî il muart: la autonomie speciâl de Regjon Friûl-VJ; l’Ufici Scolastic Regjonâl; la lenghe furlane.

In cont de lenghe, «in vie di estinzion» daûr dai risultâts di une tesi di lauree presentade cualchi dì indaûr e deventade un câs mediatic za vie pal Istât, o tornarìn a scrivi in curt.
In chê ocasion o viodarìn ancje di cierts zombies che a son ator.

A proposit: cemût mai che il president dal organisim di politiche linguistiche pe lenghe furlane si inacuarç dome cumò che dal 2009 in cà la Regjon e à ridusût i bêçs a disposizion pal furlan?
O provìn a rispuindi. Al pues stâi che al fos masse cjapât a coordenâ lis operazions par meti adun il Plan gjenerâl di politiche linguistiche, pensant che al fos cuincuienâl par vie che a àn di coventâ cinc agns par fâlu e no parcè che al à di cuvierzi cinc agns.

Vuê sul Quotidiano al è saltât fûr chest nestri articul in cont dal pericul de disparizion dal Ufici Scolastic Regjonâl. La cuistion e je serie e no tocje dome la scuele o il furlan a scuele.
Su chest argoment, a viodi cemût che si compuartin cierts sorestants di chenti, al vignarès di dî: «chi è causa del suo mal, pianga se stesso». Pecjât che il mâl al è nestri e la responsabilitât no je di ducj noaltris (magari di tancj, ma no di ducj). Buine leture.

SCUELE E AUTONOMIE. LA SPECIALITÂT DE REGJON NO SI DIFINT A PERAULIS, SI LE MET IN VORE CUI FATS

Sino speciâi o sino dome cocâi?

La svearine e torne a sunâ: rivarìno a dismovisi? Cheste considerazion e diven de gnove saltade fûr tai ultins dîs de sopression dal Ufici Scolastic Regjonâl (USR) pal Friûl-VJ. La decision fate indenant de bande dal Ministeri de Istruzion di fâ un USR unic a Vignesie che al vedi competencis sei sul Venit che su la nestre regjon e jere tal aiar za di timp. Cumò si le viôt scrite, neri su blanc, dentri dal stampon dal Decret dal President dal Consei dai Ministris che al tocje la riorganizazion dai uficis ministeriâi.
Daûr di une tradizion consolidade i tais a tocjin dome la periferie e no ancje i uficis centrâi e duncje al ven avonde facil berlâ cuintri dal «centralismo romano», soredut tes sôs cuincis plui resintis là che prassi e ideologjie si platin daûr de sante scugne di sparagnâ e des etichetis de «spending review» e de «razionalizazion».

I politics di chenti – tra Regjon e Ents locâi– a àn fat sintî la lôr vôs. Lu à fat la Zonte regjonâl, lu àn fat conseîrs regjonâi di ducj i colôrs e no àn mancjât di vierzi bocje ancje chei altris specialiscj tes declarazions altitonantis. Si son zontâts ancje i sindicâts, segnalant diviers pericui: si pierdin puescj di vore tal setôr de istruzion, la scuele di chenti e funzionarà piês e i coscj, invezit di calâ, a cressaran ancjemò. Ducj cuancj, dentri e fûr dai palaçs, a àn marcât soredut une robe, ven a dî che chest al è un atac ae autonomie speciâl de nestre Regjon.

Chest argoment di fonde e ancje chês altris preocupazions che a son stadis pandudis a àn mani, a son justis e salacor sacris e santis. Cun dut achel a saltin fûr altris domandis in cont des scuelis e de specialitât regjonâl: chi di nô lis scuelis fasino ad in plen ce che a varessin di fâ? E ce robe ise cheste specialitât? Cemût ise? A ce coventie? Par fâ ce?
Cjalant in muse la realtât, si cjatin rispuestis che no son tant bielis, ni in cont di scuelis e USR ni par ce che al tocje la autonomie de Regjon e la maniere che cheste e ven doprade. Al è fintremai cui che al pense che nol è un mâl che nol sedi un ben, stant che no je diference tra Vignesie e Triest e che il gnûf ufici interregjonâl si clamarès dome «Veneto e Friuli».

La cuistion e je plui serie e la situazion des lenghis minoritariis e di chê furlane in particolâr te scuelis le sclarìs ad in plen, Su chest cantin, tai ultins agns, dutun cui sorestants regjonâi di prime e cun chei di cumò che no si àn ancjemò mots, l’USR nol à fat nuie e il Plan par fâ jentrâ il furlan tes scuelis, za clopadiç par so cont, nol è mai jentrât in vore.

Cussì, plui che difindi la autonomie regjonâl al covente metile in vore. Plui che difindi l’USR al covente contindi al Stât la competence primarie su la istruzion parcè che a une regjon speciâl e covente une scuele speciâl.

La Regjon e varès di movisi in cheste direzion, cemût che al à dit ancje cualchi conseîr regjonâl. Si movaraie? O sino dome cocâi speciâi?

EURO FURLAN
eurofurlan@gmail.com

15/11/2013

Standard