La «friulanofobie» e fâs mâl. Si à di curâle

Tal Stât talian e je une incressite continue de intolerance e da prejudizis cuintri de diversitât. Il colôr de piel, la divignince etniche e nazionâl, la lenghe, la religjon, l’orientament sessuâl, magari cussì no, a son mutîf di discriminazion cun peraulis, oparis e omissions. De cuistion, par “merit” – si fâs par mût di dî – di un che al è stât ministri de Republiche taliane e che cumò al è vicepresident dal Senât, si è inacuart ancje l’Alt comissari pai dirits umans de ONU, cemût che o vin viodût pôcs dîs indaûr.

Razisim e intolerance si palesin in diviersis formis: de omofobie ae friulanofobie, cemût che o savìn ancje masse ben.
Tai dîs passâts o vin vude la ocasion di tornâ a lei e sintî cheste vecje e brute cjançon. Sul argoment al è saltât fûr, sul Quotidiano di vuê (www.ilquotidianofvg.it) chest articul, che cumò o podês lei ancje achì di sot.

Passe vincj agns indaûr ator pal Friûl al zirave un sproc antirazist, furlan e a pro dal furlan: «Nô o sin blancs, ma la nestre lenghe e je nere».
Al vâl ancje in dì di vuê. Cun di plui, daûr de gnove cjolte di posizion de bande de Cort Costituzionâl, o podìn zontâ ancjemò une frase: o podìn ricuardâ che «la nestre lenghe e je nere» e che «la nestre lenghe e je une lenghe».

LENGHIS E TUTELE. AL COVENTE LIBERÂSI DI PREJUDIZIS PATOLOGJICS. LU DÎS ANCJE LA CORT COSTITUZIONÂL

La «friulanofobie» e fâs mâl. Si à di curâle

«The song remains the same». No podevin fâ di mancul di vierzi chest intervent cuntune frase par inglês, che tra lis altris e je divierse di «the pen is on the table», ven a dî la uniche che te opinion di cualchidun (ce origjinalitât…) o saressin in stât di dî in tancj di nô. Nol è tant un omaç plui o mancul platât ai Led Zeppelin, cul riferiment al titul di un lôr film e di un lôr disc dal vîf. Pluitost al è un riclam esplicit a cualchidune des plui resintis manifestazions di chê patologjie, avonde difondude in Friûl e inaltrò tal Stât talian, che si pues clamâle «friulanofobie», là che «friulano» nol è il non di un vin, ma il non talian de lenghe furlane.
Cun di fat, in cont di dut chest, o varessin podût scrivi «A contin simpri chê dal ors», ma dopo vê cjapade ancje nô une piçule dose di chel virus, o vin pensât che dome se si scrîf par inglês, si vierzisi al mont…

In chescj dîs chestis e altris «tonterías» (sino o no sino plurilengâi?) si son sintudis e letis ator ben e no mâl.
Par esempli, uns vot dîs indaûr, su lis pagjinis dal “Fatto Quotidiano” («Tu quoque!». Sì, ancje par latin…): il furlan cuintri dal inglês, il furlan che al sarès un «dialetto», il furlan che nol covente, che al sarès une straçarie insegnâlu a scuele e doprâlu in ogni dontri…e chê e simpri chê. Stesse musiche in Consei regjonâl, cu la zonte de contraposizion, pardabon fastidiose, no dome tra lenghis ma ancje tra dirits di fonde: i dirits linguistics cuintri dai dirits dai lavorents («intant che a Ursinins di Çopule la Ideal Standard e siere, achì o fevelìn di furlan») e i dirits linguistics cuintri di chei dai disabii.

In ducj i câs «the song» e reste chê: friulanofobie imbombade di nazionalisim e di ignorance cence timp. Patologjie grâf, massime tal tierç câs, cemût che e mostre ancje la letare là che une conseire regjonâl dal M5S e sclarive lis motivazions, «altis», «modernis», «ecuilibradis» di chel emendament par spostâ inaltrò i bêçs pal furlan a scuele.
Su chel test o tornarìn tal nestri blog (https://eurofurlan.wordpress.com), pal moment si limitìn a un coment in struc: piês il tacon de buse.
E salacor piês ancjemò des peraulis di un sotsegretari dal guvier Monti che al definive la tutele des minorancis «questione di oneri aggiuntivi» e di chei tecnics dal guvier tecnic che un an indaûr te «spending review» a vevin fat fîs e fiastris tra minorancis di serie A e di serie B.

Sun chê robe cence sens si à esprimude ancje la Cort Costituzionâl cuntune sô sentence dade fûr ai 18 di Lui, marcant propit chês sôs cualitâts e il fat di jessi discriminatorie viers de comunitât furlane. Tant a dî che la friulanofobie e fâs tant mâl, ma che si pues vuarî: al baste informâsi e documentâsi, liberâsi di lûcs comuns e prejudizis e meti in vore lis leçs cemût che al covente. Par cognossi e doprâ plui lenghis. Par vê plui dirits. Par jessi plui citadins e plui personis.

EURO FURLAN
eurofurlan@gmail.com

26/07/2013

La strategjie che e mancje… ancjemò

Al è tacât che nol è tant Mittelefest 2013. Di ce che si viôt e che si lei ator la edizion di chest an de rassegne artistiche e culturâl dedicade ae Mitteleurope e aes sôs espressions plurâls e cjape dentri diviers moments interessants. Cun di plui, la sô scree e je stade un event ancje di un pont di viste politic e diplomatic e daûr di chei che a son i titui tal cartelon, no varessin di saltâ fûr chês polemichis strumentâls che si vevin vudis un pâr di agns indaûr.

Di chês o vevin scrit intal articul che o tornìn a publicâ chi di sot, là che nus somee che si cjatin argoments ancjemò di atualitât e problemis inmò vierts, ven a dî la mancjance di chês altris lenghis de regjon Friûl-VJ (furlan, sloven e todesc) te comunicazion istituzionâl e te promozion di events e iniziativis di ogni sorte (e soredut di chês che a puedin vê un lôr valôr specific, sul plan culturâl e no dome su chel) e la mancjance di strategjie par ce che e tocje la tutele de lenghe furlane, che o vin marcât in plui ocasions ancje tal blog.

Un dai efiets di cheste mancjance di strategjie – o piês, de esistence di une strategjie che, se e esist, e somee vê dome chê di fâi cuintri a lenghe e dirits – si lu à viodût vie pal an scolastic 2012-2013, cemût che al ven segnalât dal Comitât pal rilanç e pe autonomie dal Friûl (http://comitat-friul.blogspot.it/2013/07/lingua-friulana-scuola-regione-se-ci.html), che al domande ae Regjon di meti in vore un cambiament positîf. Se e je vere che chê di cumò e je une Regjon divierse.

EVENTS CULTURÂI. PLUI TERITORI, MANCUL PROVINCIALISIM E NISSUNE STRUMENTALIZAZION

Lenghe furlane: i vûl strategjie e no cjacaris

Mittelfest 2011 al è finît e al è stât un grant sucès. Lu vin sintût e let un pôc dapardut intai dîs passâts. La gnove, passade – si podarès dî – “a media unificâts”, nus fâs une vore plasê. Par almancul doi motîfs: in gjenerâl, parcè che o sin convints che lis manifestazions culturâls a à un potenziâl diret e indiret pardabon impuartant ancje in tiermins economics; in particolâr, par vie che intant dal festival o vin vude une impression divierse. Magari al è stât l’unic câs, ma al è sucedût di viodi un spetacul là che il public nol jere plui di une desene di lôr. Cun di plui, lant ator par Cividât la atmosfere no someave cuissà cetant vivarose, ma ben flape, cence chê relazion positive tra event, public e teritori, che si veve preseade ad implen cualchi an indaûr.

Nus fâs plasê che lis nestris sensazions a jerin faladis. Impen, no crodìn di falâ se si visìn che, un mês indaûr, la presentazion dal Mittelfest a pene finît e jere stade compagnade de polemiche leade ae mancjance di spazi pe lenghe furlane. Nus samee che cui che al veve denunziât chel fat al vedi, in chel stes timp, sei reson sei tuart.
Lis resons a son claris: a son tancj i câs, chi di no, che iniziativis e events di caratar culturâl – e no dome, par dîle dute – che si fasin chenti no tegnin in nissun cont dal fat di vignî fatis achì, intun Friûl che al à plui lenghis, che al messede culturis e tradizions diferentis, che propit su chestis fondis al viôt cressi creativitât e esperiencis preseosis, de musiche al cine, dal teatri ae leterature. Su chest cantin Mittelfest nol è di bessôl: Pordenonelegge.it, par fâ un esempli, si presente ancje chest an biel e siôr di apontaments e iniziativis, ma ancjemò une volte al samee che al sarès di plante fûr compagn se invezit di jessi a Pordenon al fos a Frosinone o a Pizzighettone.

E coventarès dute une altre strategjie: te comunicazion – e lu vin za scrit su chestis pagjinis – l’ûs normâl ancje di furlan, sloven e todesc in programs, manifescj e sîts web; tai contignûts, atenzion par ce che za si môf chenti e azions di pueste par che si movi ancjemò alc altri di gnûf. Al è ce che al è mancjât, par ce che al tocje la lenghe furlane, in ocasion dal ultin Mittelfest. Se no si à une strategjie di cheste fate e no si le met in vore, berlâ tal ultim cemût che al è sucedût ai prins di Lui al è dibant e al stramude la reson in tuart. Tal câs specific, si pues zontâ ancjemò cualchi domande: la Provincie di Udin, che il so president al veve protestât pe “mancjance dal furlan”, no aie un so rapresentant tal cda dal Mittlefest? E chel no si jerial visât par ordin di cheste buse? E se si è visât, parcè no aial fat nuie par jemplâle?

Chestis protestis a somein strumentâls: par vê titul e foto sul gjornâl e no fâ nuie di plui e di miôr. Une strumentalizazion che si fâs in particolâr su la “piel” de lenghe, de culture e dai dirits linguistics. Sperìn che nol sedi compagn cumò che finalmentri si inacuarzisi che o vin insegnants di furlan cuntune formazion universitarie di pueste ma il Ministeri no ju ricognòs.

EURO FURLAN
eurofurlan@gmail.com

01/08/2011

TAV, F-35 e la gnece di Mubarak

A son argoments che a son e che a àn di restâ tabù, che no puedin vignî frontâts e metûts in discussion nancje là che a varessin. La conferme plui resinte in chest sens e somee rivâ de cjolte di posizion dal Consei suprem di difese dal Stât talian in cont dai cjacebomardîrs F-35 e des competencis dal Parlament par ce che al tocje lis spesis militârs.
Nol è l’unic argoment di cheste fate. Par chest nus somee che l’articul, jessût passe doi agns indaûr i ocasion de Zornade Furlane dai Dirits, al sedi ancjemò di atulitât. Velu chi!

27 DI FEVRÂR. DIRITS DI FONDE, TERITORI, PARTECIPAZION: CUISTIONS DI ATUALITÂT ANCJE FÛR DAL FRIÛL

TAV, lis domandis che no cjatin rispueste

Lunis stât, ai 27 di Fevrâr, al è colât l’inovâl dal riviel de Joibe Grasse dal 1511. 501 agns indaûr si impiave a Udin la faliscje de rivolte popolâr plui grande de storie dal Friûl. Par tant timp la memorie di chei fats e je stade platade, par no dî scancelade dal dut, e a son dome un pôcs di agns che si è tornât a scuvierziju.
Ricercjis di pueste a àn mostrât che i contadins furlans a vevin rivât adore a imbastî fintremai une sorte di rêt “politiche” e a tratâ la lôr poie militâr daûr dal rispiet dai dirits e dai ûs tradizionâi. Lis resons di chê lote e la “sogjetivitât politiche” dai furlans di in chê volte, che Vignesie e scugnarà ricognossi, tal 1533, cu la istituzion de Contadinance, a valin ancje in dì di vuê. Al è par chest motîf che la date dai 27 di Fevrâr e ven memoreade cun diviersis iniziativis e che une part dal mont associatîf di chenti e à fintremai tornât a batiâle “Zornade Furlane dai Dirits”.

In cheste suaze, e je zaromai deventade une tradizion la programazion dute speciâl prontade pe ocasion di Radio Onde Furlane cun trasmissions di aprofondiment su dirits e teritori. Protagoniscj de “Zornade” , setemane passade, a son stâts i dirits linguistics, i diritis dai lavoradôrs e lis resons de oposizion aes cussì clamadis “grandis oparis” che a àn di vignî fatis in Friûl: dal dopleament de centrâl di Somplât ae autostrade Secuals-Glemone, fintremai al eletrodot Redipulie-Udin e ae Tav.
Al è stât un aprofondiment ad in plen “dentri de notizie”. Par esempli, intant che tal etar si sintive la vôs dal segretari regjonâl de CGIL, Franco Belci, a Cividât doi operaris cence paie ancjemò dal mês di Otubar a jerin montâts sù suntune gru par domandâ ce che che ur spiete. Par no fevelâ des peraulis di Giancarlo Pastorutti che al motivave lis posizions cuintri de Tav in Friûl e a pro di un traspuart feroviari di personis e marcjanziis che al funzioni pardabon: tant a dî, fermâ chel tren par che a corin di plui e miôr ducj chei altris.

In chescj dîs propit chel de Tav, cun riferiment ae Val di Susa, al à tornât a jessi l’argoment plui frontât dai media a nivel talian.
Daûr dal “rumôr” mediatic, massime su la Turin-Lion, a son cuistions che a meretin atenzion: i studis di esperts di traspuart e di economie che a mostrin che pe rêt europeane al è avonde il colegament che al esist bielzà, cence savoltâ il teritori e straçâ bêçs par di bant; la int che si mobilite, ancje riscjant la vite, e che e volarès jessi scoltade.

Intun moment di crisi de politiche no saressial il câs di dâ valôr a cheste partecipazion e vierzi un spazi di dialic e di confront che al sedi miôr dai “osservatoris” e des “taulis” fatis fin cumò? E cumò che al è un guvier di tecnics no saressial il câs di provâ a motivâ lis posizions “sì-Tav” cun argoments plui specifics – e tecnics – par gjavâ a ducj il dubi che si ledi a fâ une robe cence sens?

Chê altre dì Monti al à mostrât che chestis no son domandis di fâ. Al è un pecjât: cussì la sô posizion no je centant divierse di chê dai parlamentârs che un an indaûr a vevin votât che Ruby e podeve jessi la gnece di Mubarak.

EURO FURLAN
eurofurlan@gmail.com

05/03/2011