Atualitât, Dome pal blog

Un Friûl diferent, un Friûl resistent, un Friûl “Friûl”

Un piçul pas par un sindic, une riparazion storiche pe lenghe furlane e par dut il Friûl, che e tocje la memorie, la cussience civiche e la prospetive democratiche pal avignî. Intant che a Pordenon lis autoritâts a vevin vude la pensade gjeniâl di improibî la esecuzion di ‘Bella Ciao’ in ocasion de manifestazion pai 25 di Avrîl (par fortune a àn fat marcje indaûr…, ma la brute figure e je restade), a Udin la fieste de Liberazion dal nazifassisim e je stade segnade di une biele novitât: pe prime volte il Comun, par iniziative dal sindic, Furio Honsell, al à metût fûr i manifescj dai 25 di Avrîl ancje par furlan.

Intun puest normâl, intune citât che a non di dut il Friûl e je Medaie di aur pe lote di liberazion, al varès di jessi normâl che il manifest pe ricorence fondative de fin de vuere di liberazion de ditature fassiste al fos almancul ancje te lenghe proprie di chê comunitât. Magari cussì no, a Udin, in Friûl, tal Stât talian, nol è mai stât cussì. Par chest la iniziative dal Comun di Udin – che par so cont e je une robe buine e juste – e devente cussì impuartante.
Des bandis di place dal Lionel al somee che lu vedin capît. Cun di fat il sindic di Udin al à vût declarât che stant che chê furlane e je stade par sigûr une des lenghis de Resistence al è just memoreâ la lote di liberazion ancje par furlan.

Cun di plui e je une altre motivazion, che forsit e meretave ancje marcade un tic di plui. Il dirit ae lenghe e il dirit ae diversitât, che a son stâts tibiâts dal nazifassisim, propit su la fonde de esperience de Resistence si cjatin a jessi tra i principis di fonde de Costituzion de Republiche taliane, cemût che o vevin za ricuardât timp indaûr.
Chest al tocje in particolâr i furlans, i slovens e i gjermanics dal Friûl, sei cjalant ae storie – chê de ditature e di ce che al à puartât a chê ditature; chê de lote di liberazion – sei cjalant ae atualitât.

Magari cussì no e je une atualitât – al baste pensâ al za ricuardât diviet di Pordenon e salacor ancje al moto di Honsell par fâi sbassâ il pugn sierât a un vecjo partigjan – là che a cjatin puest tendencis vecjis e gnovis di revisionisim e di fanatisim nazionalist, che si palesin in diviersis formis, des cjançonutis ai intervents su la stampe e in rêt e fintremai a cierts spetacui teatrâi che a stramudin la propagande in storie e art e a une cierte ande che impen di ricuardâle par pensâ ae pâs e par fâ sù un mont miôr e volarès celebrâ (sic!) la prime vuere mondiâl tant che moment gloriôs di redenzion (Ma di cui? Di ce? Parcè?).

Par chest al è just memoreâ la Liberazion par furlan e fâ compagn ancje pal Prin di Mai o par chês altris datis impuartantis, a tacâ de Zornade de Europe, che e cole ai 9 di Mai.
Par chest – lu vin za scrit e o tornìn a fâlu – al è ben e al conven ancje tirâ fûr in dutis chestis ocasions la bandiere dal Friûl, cemût che a àn fat chei dal Comitât pe Vite dal Friûl rurâl a Udin ai 25 di Avrîl.

In non dal Friûl di îr, di vuê e di doman: un Friûl diferent, un Friûl resistent, un Friûl “Friûl”.

Advertisements
Standard
Articui 2014, Atualitât, Politiche

Italie, Europe e minorancis. Rapuart gnûf, problemis vecjos

Par cui che no lu ves let chê altre dì, o publichìn il nestri articul saltât fûr ai 10 di Avrîl sul Quotidiano.
Al fevele dal gnûr Rapuart presentât dal Guvier talian al Consei de Europe e di une iniziative interessante cjapade sù de bande dal Ufici di presidence dal Consei regjonâl de Regjon autonome Friûl-VJ che e tocje la adesion ae NPLD.
Il rapuart si pues cjatâlu achì.
Buine leture (dal articul e dal document).

MINORANCIS. IL STÂT TALIAN AL STENTE TE TUTELE, MA CHÊ ADESION DE REGJON AE NPLD E JE UNE BUINE GNOVE

Consei de Europe. Rapuart gnûf, problemis vecjos

La Europe e clame e la Italie e rispuint come simpri, a taliane vie. Magari cussì no, no je une biele robe e soredut no je une novitât, sei in gjenerâl sei cun riferiment specific ae tutele des minorancis.
Une conferme in chest sens e rive propit dal cuart Rapuart su la metude in vore de Convenzion di suaze pe protezion des minorancis nazionâls presentât de bande dal Guvier talian al Consei di Europe sù par jù un mês indaûr.

Il document al varès di presentâ la situazion des minorancis tal Stât talian e ce che lis autoritâts statâls e regjonâls a àn fat (o mancul) pe lôr tutele daûr des legjislazions statâl e regjonâl e dai impegns cjapâts sù di Rome cu la ratifiche de Convenzion di suaze pe protezion des minorancis nazionâls, fate cu la leç 302/1997.
La relazion e tocje la situazion tai ultins cinc agns di rom e sinti e des dodis comunitâts (tra chestis a son i furlans, i slovens e i gjermanics dal Friûl-VJ) destinatariis di tutele daûr de leç 482/1999.
Il Rapuart al cîr di marcâ i fats positîfs e di sghindâ, par ce che si pues, lis cuistions plui griviis.
Di une bande nol pues fâ di mancul di frontâ i temis che a tocjin rom e sinti – stant che al è un dai argoments là che il Consei de Europe i veve za tirât lis orelis al Stât talian – ancje se lu fâs in maniere parziâl e nebulose; di chê altre al cîr di no tocjâ masse in profonditât cuistions di fonde che a tocjin l’insegnament des lenghis des minorancis tes scuelis e il lôr ûs de bande de concessionarie di servizi public radiotelevisîf.
Chescj a son altris cantins là che il Consei di Europe al veve za marcât lis mancjancis talianis e al è une vore probabil che a Strasburc a vedin alc ce dî ancje chest viaç.

Che la situazion e sedi almancul plene di contradizions – se no piês – al ven fûr dai documents fats indenant de bande di cualchi istituzion regjonâl e di cualchi associazion e organizazion no governative, che si cjatin in zonte dal rapuart. Al è il câs des relazions, in cont de comunitât furlane, prontadis de bande de ARLeF (Agjenzie regjonâl pe lenghe furlane) e dal Comitât/Odbor/Komitaat/Comitato 482.

Dâts e elements concrets a saltin fûr soredut di chest test. Di une bande lei cemût che tai ultins agns la leç 482/1999 e la leç regjonâl 29/2007 no sedin stadis metudis in vore al fâs vignî i sgrisui. Di chê altre al fâs plasê viodi che almancul cualchidun chi di nô al cjale lis robis in muse, lis clame cul lôr non e lis presente in maniere documentade e ecuilibrade. Al ven di pensâ che se no fossin chescj tescj zontâts il gnûf Rapuart talian al sarès inmò plui debul.

Si puedial dî che il Friûl e la Regjon a rispuindin un tic miôr ae clamade de Europe? Forsit sì. Une conferme e rive de decision, cjapade sù ai 9 di Març stâts, de bande dal Ufici di presidence dal Consei regjonâl di aderî ae NPLD, la rêt europeane pe promozion de diversitât linguistiche. Un piçul pas te direzion juste.

EURO FURLAN
eurofurlan@gmail.com

Standard
Atualitât

Spara Pieri Spara

Buine Fieste de Patrie dal Friûl a ducj!

La creazion dal stât patriarcjâl, che al è esistût par trê secui e mieç, e je stade determinante par definî il Friûl, intindût tant che comunitât teritoriâl unitarie, tant che “Patrie”, cemût che al sarà clamât par tancj secui.
Par chest si à di memoreâ la zornade dai 3 di Avrîl-
Cheste date – lu vevin za scrit timp indaûr – e je soredut une ocasion par resonâ intor dal Friûl di vuê e di chel di doman.

Par fortune lis ocasions, di ce che si lei ator , no mancjin.

Par sigûr no mancjin nancje lis motivazions par fâ un pensament di cheste fate.
Di une bande e je la dibisugne di jessi Friûl e, tant che Friûl, di vê a ce fâ in maniere positive cul mont. Di chê altre al è di sgrisulâsi, tra derivis neocentralistis e ipernazionalistis e fantomatichis iniziativis indipendentistis che a tocjin lis regjons
de Italie dal Nord e che a saltin fûr ancje in Friûl.

Magari cussì no, e je ancje la ocasion par che la proporzionalitât invierse si stramudi intune vere e proprie incontinence.

Standard