E dopo de Fieste de Patrie, metìn fûr la bandiere dal Friûl ancje pai 25 di Avrîl, pal Prin e pai 9 di Mai

Lu vevin scrit za uns pôcs di agns indaûr e o tornìn a publicâlu cumò, tal 2016, dopo de Fieste de Patrie e pôcs dîs prime de Fieste de Liberazion. Ve chi un articul dal 2011 che al tocje i 25 di Avrîl, il prin di Mai e i 9 di Mai.
Trê fiestis furlanis, pe storie ma ancjemò di plui pe atualitât e pal avignî. Zornadis che si varès di meti fûr la bandiere dal Friûl. Cence dismenteâ nancje il cuarantesim inovâl dal taramot dal 1976

RESISTENCE, LIBERAZION, EUROPE, FRIÛL. CUANT CHE IL LUNARI AL JUDE A CAPÎ

Prin di Mai, 9 di Mai e 25 di Avrîl: fiestis furlanis

Ogni mês si fâs la lune e ogni dì si impare une. Cun di plui, ogni dì, o almancul ogni setemane, a son un inovâl o une ricorence di memoreâ. Il lunari, massime chest an, al ufrìs une schirie di datis che a son pardabon impuartantis, o ben che cussì a vegnin calcoladis.

La ocasion par fâ fieste e soflâ dentri de trombe de retoriche e ven simpri cjapade sù, in cualchi câs ancje cuntun boreç che al somee in chel stes moment masse esagjerât e masse pôc justificât. Chês par ricuardâ, capî, resonâ, discuti, cognossi e pensâ, invezit, si lis cjape sù con mancul facilitât.
Lu vin viodût plui voltis propit in chescj ultins mês. Su chest sfuei o vin za marcât, un mês indaûr, cemût che ancje pai 3 di Avrîl, moment bon par pandi une braure furlane libare, positive e dinamiche, nol è mancjât cui che al è rivât a esprimi il so “Furlan Pride” dome a sotan vie: poleç e no acuile.
No si podeve pratindi miôr cualchi setemane prime, pai 150 agns de proclamazion dal Ream di Italie: anzit, al à fat maravee che al sedi stât almancul un piçul svôl di acuile, ancje se in realtât al jere chel di un dordul.
Par no fevelâ de memorie platade, e tornade a discuvierzi, de “Joibe Grasse” dal 1511. In chel câs la fieste e je stade fate ma la retoriche e je lade inte direzion contrarie e cussì al è stât dit che al jere un fat storic impuartant ma che no si veve di fâ masse scjas par vie di dute chê violence e dut chel sanc. Propit chest an che a massalicis e becjârs ur vegnin garantididis cetantis celebrazions “in pompa magna”!

Une ocasion che e je buine par ricuardâ, resonâ e fâ fieste, cun sintiment e cence pôre, e rive de zornade di vuê. Propit ai 9 di Mai al cole l’inovâl di chel che al ven calcolât tant che l’inviament concret de costruzion de unitât europeane. In chê dì dal 1950 il Ministri pai afârs forescj dal Stât francês, Robert Schuman, al veve sclarît che cul metisi adun si podeve sghindâ il pericul di gnûfs conflits e creâ lis cundizions par un bon disvilup economic e sociâl e pe incressite de democrazie. Un an plui tart e nassè la Ceca (Comunitât europeane dal Cjarbon e dal Açâl) e di in chê volte, pûr tra contradizions e dificoltâts, o sin rivâts ae Union europeane di cumò. Forsit chest nol è il moment miôr pe Europe, cundut achel cheste dimension, che no pues esisti cence pâs, dirits, unitât e diversitât, e reste chê di riferiment pal Friûl di vuê e par chel di doman. Une Fieste de Europe, duncje, che no pues che jessi ancje fieste furlane.

Il lunari, tai dîs passâts nus à lassât ancje la possibilitât di tornâ a pensâ sul taramot e soredut su la ricostruzion: un model di coesion e partecipazion, soredut par vie che al jere ce che e voleve la int di chenti. Altris datis ancjemò: prin di Mai e 25 di Avrîl. E ancjemò altris ocasions par resonâ in particolâr di lavôr, dirits, paritât, autonomiis, tutele des minorancis, justizie, libertât, solidarietât, Costituzion. Cun passion, cun preocupazion, cun cussience, cun atenzion. Tant a dî: Resistence, Europe, Friûl. Storie e avignî.

EURO FURLAN
eurofurlan@gmail.com

09/05/2011

“Furlan pride” e “Furlan sgrisui”

Tes ultimis setemanis l’Udin al somee che al sedi tornât a zuiâ in maniere di sest, intant che il cine fat in Friûl, di Zoran a TIR, al à sucès tai festivals e tal boteghin.
Cun di plui la conclusion dal Premi Friûl ai 30 di Novembar e conferme il stât di salût de creativitât musicâl par furlan, lis potenzialitâts di cheste realtât e la professionalitât e la passion di cui che al lavore in chest setôr, cemût che si lei achì e achì.
A saressin motîfs par fâ fieste e par pandi chê che za timp indaûr le vevevin clamade «braùre furlane» o «Furlan pride».

Però, compagn che in chê volte, a son ancje diviersis cuistions che a fasin vignî marum e avilizion, tra vecjis e gnovis iniziativis «dialetantis» che a fasin dam ae lenghe furlane e ae sô promozion (une di chês e je in program la setemane che e ven, ma o tornarìn a scrivii parsore chi di un pôc) e in spiete che de Regjon e rivi une rispueste di sest ae domande fate indenant de bande dal Comitât-Odbor-Komitaat-Comitato 482 passe dôs setemanis indaûr.

Par rindisi cont di cemût che a levin lis robis tal mês di Dicembar dal 2011 e in cualchi maniere ancje de situazion contraditorie dal dì di vuê, o recuperìn un nestri articul di in chê volte.
Buine leture.

CONTRADIZIONS. TANTIS RESONS DI BRAÙRE, MA ANCJE UN TIC DI AVILIZION

Al è il timp dal “Furlan pride”. Anzit: al sarès

Par tancj motîfs i ultins mês di chest an a podaressin vignî calcolâts chei dal «Friulian pride» o «Furlan pride», o miôr ancjemò chei de «braùre furlane». Chest al vâl soredut se si ten cont di une schirie di fats e di iniziativis.

La presentazion de version a stampe dal Grant Dizionari Bilengâl Talian Furlan (Gdbtf) e je stade un di chescj events impuartantons, no dome pal lavôr in sé – che il so valôr sientific e la sô rilevance pe promozion de lenghe furlane pe garanzie dai dirits linguistics si ju cognosseve bielzà inte sô version digjitâl – ma ancje par jessi stade une ocasion par taponâ la bocje ai specialiscj in cjacaris e trombonadis, che in cont dal Gdbtf a nd’ vevin za ditis tantis. Tai dîs prime dal apontament il cuotidian di Triest al veve provât di gnûf a dâ flât a trombis e tormbons, ma dopo di un pôc di tananai in rêt, la robe si è distudade e a son restadis dome lis testemoneancis di gale tant che chês di Tullio De Mauro e de Universitât di Stocolme.

Une buine dose di braùre e je rivade ancje dai dîs dîs di “Suns. Sclesis di Europe”, cuant che Udin e il Friûl a son deventâts il cûr de Europe in graciis di chê che e je la specificitât plui profonde di cheste tiere e de sô int: la diversitât linguistiche e culturâl. La “Mostre dal Cine” e ancjemò di plui il “Liet International” a àn palesât cetant che al veve reson, timp indaûr, chel che al veve scrit suntun setemanâl locâl che la lenghe furlane e je la infrastruture plui impuartante, plui utile e plui ecologjiche pal nestri teritori. Il “Liet International”, in particolâr al à mostrât un nivel une vore alt di snait, di passion e di professionalitât. Di chest si son visâts in dute Europe: sperìn ancje chi di nô, soredut in prospetive.
Cun di fat, ancjemò prime che di braùre, e je une cuistion di cussience.
Magari cussì no, al sucêt ancjemò che a mancjin sei une sei chê altre.

Al è ce che al salte fûr dal fat che chê che e je calcolade la associazion furlane plui impuartante e risulti impegnade a tirâ sù fimis cuintri di Paolo Villaggio. O scugnìn tornâ sul argoment, stant che il disvilup dai fats al conferme lis nestris impressions di in chê volte.
Ce che al à vût scrit Villaggio no nus plâs par nuie e propit par chest nol merete dute cheste publicitât. Nus somee che il so efiet al sedi dome chel che, dongje di un comic che nol fâs ridi, a sedin i furlans che si fasin ridi daûr.
E sì che no mancjin resons plui seriis par mobilitâsi in difese di dignitât e dirits. Cuintri di chei che a sbelein Friûl e furlans cun cuintâi di «piccola patria» e «triveneto». Cuintri di chel, president di une associazion che e dîs di vê a cûr la «friulanità» ator pal mont, che al declare che il furlan nol covente a nuie. Cuintri des autoritâts e dai burocratis che no àn fat nuie par che, daûr de Leç 482/1999 e dal Dpr 18/2009, e fos garantide la prime classe te scuele elementâr di Migjee. Cuintri di ducj chei che par doi francs a jemplaressin il Friûl di scovacis, di ciment e di entimis.

EURO FURLAN
eurofurlan@gmail.com

12/12/2011

Balon, balis e bufulis. Memorie, sperance e avilizion

Ve chi un articul saltât fûr doi agns indaûr, tal mês di Otubar dal 2011.
A son altris timps e no dome par vie che l’Udin al à tacât malut la stagjon, cul pericul di jessi parât vie de Europa League dopo de partide di Joibe stade a Triest cul Slovan Liberec e cu la sconfite patide a Rome cuintri de Lazio.
O viodarìn chi di cualchi setemane se al sarà alc di plui di Friûl e di furlan a Friuli Doc. E se tes scuelis si sintarà ancjemò l’impat de gjestion de scuele fate di cui che al veve chê di cori dentri te galarie tra il Gran Sasso e Gjinevre e dai tecnics e dai politics che no rispietin lis leçs e la Costituzion. O sperìn che al sedi alc di miôr, ma o vin pôre che soredut a scuele la ande e resti chê dai ultins agns. Sperìn in ben.

LENGHIS. IN EUROPE SI FÂS FIESTE, IN FRIÛL SI DISMENTEE IL VALÔR DI FURLAN, SLOVEN E TODESC

Tutele des minorancis e scuele pierdudis te galarie tra Gran Sasso a Gjinevre

Mancul mâl che al è l’Udin! La scuadre di balon furlane e je prime in classifiche tal campionât e e je ben metude ancje te Europa League. Chescj fats, par lôr cont, a son za alc e ce, ma salacor a deventin ancjemò plui impuartants intal contest gjenerâl.
O savìn che, par doprâ lis peraulis di mister Guidolin, o varessin dut câs di «stâ calmuts» e di pensâ che cumò a mancjaran dome vincjenûf ponts par rivâ a chê «cuote cuarante» che si à di jonzi par restâ in serie A ancje l’an che al ven. Però no podìn fâ di mancul di gjoldisi il moment e il fat che il blanc e il neri udinês, e cun lôr il zâl e il blu furlans – che magari cussì no no si viodin tes divisis di chel che ogni tant nus samee pardabon il nestri Barça o il nestri Athletic Bilbao – a sedin cussì lusints e sflandorôs nus permet di frontâ miôr il grîs che, a pet des cundizions atmosferichis, al è il colôr dominant di chestis zornadis.

O vin iniment, par esempli, il lunc “day after” di Friuli Doc cul dibatiment a tantis vôs, sù par jù compagnis, là che al saltave fûr che al jere stât dut un sbevaçâ e barufâ. Di chest pont di viste, si podarès dî une “no notizie”, stant che di simpri si fevele di cheste kermesse tant che di «Friuli Cjoc». Magari cussì no, no je une novitât che no sin plui bogns, massime cualchidun, di fâ fieste, di stâ insieme, gjoldint dal mangjâ ben e dal bevi bon: lu vin za viodût sei a Friuli Doc sei inaltrò.
Si è dit che e coventarès plui culture: juste, di chê no ‘nd è mai avonde. O crodìn ancje che, in particolâr, al coventi plui Friûl, magari ancje par che al sedi pardabon Doc e un pôc mancul Cjoc. Chest al vâl sei pe forme, cu la publicizazion di dute la manifestazion ancje par furlan, par sloven e par todesc, sei pe sostance, cun events e iniziativis specifichis.
Al va dit che cualchi piçul pas indenant al è stât fat. Par esempli, e jere une postazion mobile di Radio Onde Furlane e i siei gjornaliscj a ziravin ator par stands e taulis a intervistâ la int di ca e di là dai bancuts e te programazion musicâl tra un redivîf Umberto Tozzi e une cover band, a àn cjatât spazi ancje Ulisse e i Ciclopi e i Arbe Garbe. Par sigûr un pas indenant rispiet ae “Notte Bianca”, là che la atrazion plui grande in Place Sant Jacun e jere «la tribute band ufficiale di Lucio Battisti»…

Al è clâr che compagn che pal vin e pal mangjâ ancje pe lenghe e pe culture nol è avonde che a sedin furlans. La lenghe si à di doprâle ben e cu la lenghe si à di fâ alc di bon.
E al è chi che la situazion no je dome grise: e je ancje grivie. In ducj i cjamps, ma soredut te istruzion. L’an scolastic al è partît e par un altri an no si sa cemût che a vignaran metudis in vore lis leçs di tutele, intant che a Migjee e je stade scancelade ancje la prime elementâr, cuintri de leç, de Costituzion e dal bon sens. In ocasion de Zornade europeane des lenghis, però, o vin rivât a capî parcè. Lu à sclarît la ministre Gelmini: lis minorancis linguistichis e la scuele in gjenerâl si son pierdudis te galarie che e va dal Gran Sasso a Gjinevre.

EURO FURLAN
eurofurlan@gmail.com

03/10/2011

No TAV, Sì FUR

Si torne a fevelâ di TAV te Basse Furlane. Achì, compagn che inaltrò, la int e palese di jessi cuintri de grande opare par resons pratichis e no par vie de cussì clamade sindrome NIMBY.
Cun di fat, stant che in Slovenie al somee propit che no si fasarà, si si domandisi parcè si aial di fâ dut chest batibui te tiere tra i flums Livence e Timau: par fâ cori un pôc plui svelts un pâr di trens di Vignesie a Triest, che tra lis altris no fasaressin nancje une fermade par dut il Friûl?

Tra i sorestants di chenti a son chei (pôcs) che lu vuelin parcè che a son convints (ma no si sa ben di ce e parcè) e chei che a disin di volêlu, magari par lâ daûr dai ordins di scudarie che a rivin dal partît o dal sponsor, ma in realtât a’nt fasaressin di mancul. Anzit, chescj (o almancul la plui part di lôr) a saressin convints che nol covente, che al coste masse, che al è di bant e soredut che no son i bêçs par fâlu, ma a scuegnin mantignî une cierte posizion, intant che a sperin che no si fasi nuie e che al massim al vegni fat cualchi alc par potenziâ la linie esistente, che tra lis altris e risulte doprade dome pal 40% de sô potenzialitât.

Che no sedin bêçs e che al sedi une opare che no covente e che sigûr no vâl ce che e coste in tiermins di risorsis invistidis e di savoltament dal teritori lu àn dit za timp indaûr ancje personaçs che si podarès definîju “insospetabii”, cemût che o ricuardavin bielzà ta chest articul, saltât fûr tal Istât dal 2011 su Il Quotidiano (www.ilquotidianofvg.it).

Lu publichìn chi disot parcè che nus somee une vore atuâl. No dome in cont dal TAV ma plui in gjenerâl in cont di cemût che si puedin straçâ o invistî lis risorsis publichis, se si bade ai interès di pôcs o ai dirits di ducj.
Nus somee une vore atuâl ancje se si ten cont dal virus de friulanofobie che in chestis setemanis si palese une vore a fuart e al plate – si fâs par mût di dî – la sô sostance fate di prejudizis, ignorance, provincialisim e nazionalisim esasperât daûr di une muse resoneristiche, economicistiche e sparagnine.
Tant a dî: No TAV, Sì FUR (‘fur’ al è codiç internazionâl ISO 639-3 de lenghe furlane).

ESPERIENCIS E DÂTS A SUGJERISSIN UNE MANIERE DIVIERSE DI PROGJETÂ E FÂ SÙ LIS GRANDIS OPARIS

TAV. Ise cuistion di mobilitât, velocitât o aviditât?

Ai prins di Lui si è davuelte tal Friûl di Mieç une manifestazion di caratar culturâl che e veve chê di meti dongje e di confrontâ la realtât furlane e chê dal Piemont. Tai articui di presentazion di chê iniziative si ricuardavin, diviers elements di colegament tra il Friûl e chê regjon taliane. Par sigûr al è stât dismenteât un altri aspiet che, massime in chescj ultins agns, al ten dongje a fuart e a palês Friûl e Piemont: in ducj doi i câs a son teritoris che a son stâts savoltâts, e a son daûr a tornâ a jessilu, par vie de costruzion di grandis infrastruturis e di gnovis oparis publichis e che e je int che si organize par fâ cuintri a chescj progjets.

A saltin fûr daurman denant dai voi il TAV, il tren a alte velocitât, là vie te Val di Susa, ma ancje chi di nô, te Basse, o lis gnovis autostradis che ogni trop al ven fûr che si varessin di fâ, tra Cimpiel, Secuals e Glemone e tra la Cjargne e il Cjadovri, o ben ancjemò i eletrodots che di nord a sud e di soreli jevât a bonât a varessin di tressâ la Patrie.

Tai dîs passâts e je vignude fûr su internet (http://altofriuli.com/discussioni/la-val-canale-canal-del-ferro—la-nostra-val-di-susa-.htm) une riflession interessante fate di Franceschino Barazzutti, za president de Associazion dai Sindics de ricostruzion dal Friûl, propit su chescj argoments, tornant indaûr ae costruzion de autostrade di Damâr a Tarvis e al rignuviment de linie feroviarie che e passe in Cjanâl dal Fier e Val Cjanâl e e va in Austrie. Al ven fat, in particolâr, un belanç su la ferade, che al è positîf dome in part.
Se si gjave la vision di partence, daûr de prevision dal disvilup de integrazion economiche e politiche cu la Europe centriorientâl, il rest al è falimentâr: pal impat ambientâl e socioeconomic de opare, pal fat che la comunitât locâl e à subît in maniere passive chê infrastruture e soredut pal fat che la linie no je stade mai doprade ad implen.

Cheste prospetive negative e je chê che si palese, magari cussì no, ancje pal TAV. La Val di Susa za cumò e je tressade di une autostrade, di dôs stradis statâls e di une linie feroviarie, ancje chê doprade une vore di mancul di ce che si podarès. Cun di plui a son diviers studis che a mostrin che al è un progjet vecjo, prontât passe vincj agns indaûr, che nol ten cont dai flus di trafic reâi e potenziâi, che al coste une sdrume di bêçs e che al sarà fûr scjale ancje cuant che al vignarà finît. In struc: al coste tant e al rint pôc.

Chel stes al salte fûr ancje chi di nô: a part la mobilitazion popolâr par fâi cuintri, i dams ambientâi e i coscj, daûr dai studis di diviers esperts indipendents, al è stât il stes ad di FS, Mauro Moretti, a declarâ in public, timp indaûr, che il TAV, dopo Vignesie, al sarès dibant, su la fonde di criteris economics. Al sarès pardabon di pensâi parsore, di meti dongje dut ce che al covente par capî e decidi pardabon no dome cemût ma ancjemò prime se si àn di fâ cierts intervents.
Pe vite, pai dirits, pal disvilup e pe mobilitât di ducj. E no dome pe aviditât di cualchidun.

EURO FURLAN
eurofurlan@gmail.com

18/07/2011

La strategjie che e mancje… ancjemò

Al è tacât che nol è tant Mittelefest 2013. Di ce che si viôt e che si lei ator la edizion di chest an de rassegne artistiche e culturâl dedicade ae Mitteleurope e aes sôs espressions plurâls e cjape dentri diviers moments interessants. Cun di plui, la sô scree e je stade un event ancje di un pont di viste politic e diplomatic e daûr di chei che a son i titui tal cartelon, no varessin di saltâ fûr chês polemichis strumentâls che si vevin vudis un pâr di agns indaûr.

Di chês o vevin scrit intal articul che o tornìn a publicâ chi di sot, là che nus somee che si cjatin argoments ancjemò di atualitât e problemis inmò vierts, ven a dî la mancjance di chês altris lenghis de regjon Friûl-VJ (furlan, sloven e todesc) te comunicazion istituzionâl e te promozion di events e iniziativis di ogni sorte (e soredut di chês che a puedin vê un lôr valôr specific, sul plan culturâl e no dome su chel) e la mancjance di strategjie par ce che e tocje la tutele de lenghe furlane, che o vin marcât in plui ocasions ancje tal blog.

Un dai efiets di cheste mancjance di strategjie – o piês, de esistence di une strategjie che, se e esist, e somee vê dome chê di fâi cuintri a lenghe e dirits – si lu à viodût vie pal an scolastic 2012-2013, cemût che al ven segnalât dal Comitât pal rilanç e pe autonomie dal Friûl (http://comitat-friul.blogspot.it/2013/07/lingua-friulana-scuola-regione-se-ci.html), che al domande ae Regjon di meti in vore un cambiament positîf. Se e je vere che chê di cumò e je une Regjon divierse.

EVENTS CULTURÂI. PLUI TERITORI, MANCUL PROVINCIALISIM E NISSUNE STRUMENTALIZAZION

Lenghe furlane: i vûl strategjie e no cjacaris

Mittelfest 2011 al è finît e al è stât un grant sucès. Lu vin sintût e let un pôc dapardut intai dîs passâts. La gnove, passade – si podarès dî – “a media unificâts”, nus fâs une vore plasê. Par almancul doi motîfs: in gjenerâl, parcè che o sin convints che lis manifestazions culturâls a à un potenziâl diret e indiret pardabon impuartant ancje in tiermins economics; in particolâr, par vie che intant dal festival o vin vude une impression divierse. Magari al è stât l’unic câs, ma al è sucedût di viodi un spetacul là che il public nol jere plui di une desene di lôr. Cun di plui, lant ator par Cividât la atmosfere no someave cuissà cetant vivarose, ma ben flape, cence chê relazion positive tra event, public e teritori, che si veve preseade ad implen cualchi an indaûr.

Nus fâs plasê che lis nestris sensazions a jerin faladis. Impen, no crodìn di falâ se si visìn che, un mês indaûr, la presentazion dal Mittelfest a pene finît e jere stade compagnade de polemiche leade ae mancjance di spazi pe lenghe furlane. Nus samee che cui che al veve denunziât chel fat al vedi, in chel stes timp, sei reson sei tuart.
Lis resons a son claris: a son tancj i câs, chi di no, che iniziativis e events di caratar culturâl – e no dome, par dîle dute – che si fasin chenti no tegnin in nissun cont dal fat di vignî fatis achì, intun Friûl che al à plui lenghis, che al messede culturis e tradizions diferentis, che propit su chestis fondis al viôt cressi creativitât e esperiencis preseosis, de musiche al cine, dal teatri ae leterature. Su chest cantin Mittelfest nol è di bessôl: Pordenonelegge.it, par fâ un esempli, si presente ancje chest an biel e siôr di apontaments e iniziativis, ma ancjemò une volte al samee che al sarès di plante fûr compagn se invezit di jessi a Pordenon al fos a Frosinone o a Pizzighettone.

E coventarès dute une altre strategjie: te comunicazion – e lu vin za scrit su chestis pagjinis – l’ûs normâl ancje di furlan, sloven e todesc in programs, manifescj e sîts web; tai contignûts, atenzion par ce che za si môf chenti e azions di pueste par che si movi ancjemò alc altri di gnûf. Al è ce che al è mancjât, par ce che al tocje la lenghe furlane, in ocasion dal ultin Mittelfest. Se no si à une strategjie di cheste fate e no si le met in vore, berlâ tal ultim cemût che al è sucedût ai prins di Lui al è dibant e al stramude la reson in tuart. Tal câs specific, si pues zontâ ancjemò cualchi domande: la Provincie di Udin, che il so president al veve protestât pe “mancjance dal furlan”, no aie un so rapresentant tal cda dal Mittlefest? E chel no si jerial visât par ordin di cheste buse? E se si è visât, parcè no aial fat nuie par jemplâle?

Chestis protestis a somein strumentâls: par vê titul e foto sul gjornâl e no fâ nuie di plui e di miôr. Une strumentalizazion che si fâs in particolâr su la “piel” de lenghe, de culture e dai dirits linguistics. Sperìn che nol sedi compagn cumò che finalmentri si inacuarzisi che o vin insegnants di furlan cuntune formazion universitarie di pueste ma il Ministeri no ju ricognòs.

EURO FURLAN
eurofurlan@gmail.com

01/08/2011

TAV, F-35 e la gnece di Mubarak

A son argoments che a son e che a àn di restâ tabù, che no puedin vignî frontâts e metûts in discussion nancje là che a varessin. La conferme plui resinte in chest sens e somee rivâ de cjolte di posizion dal Consei suprem di difese dal Stât talian in cont dai cjacebomardîrs F-35 e des competencis dal Parlament par ce che al tocje lis spesis militârs.
Nol è l’unic argoment di cheste fate. Par chest nus somee che l’articul, jessût passe doi agns indaûr i ocasion de Zornade Furlane dai Dirits, al sedi ancjemò di atulitât. Velu chi!

27 DI FEVRÂR. DIRITS DI FONDE, TERITORI, PARTECIPAZION: CUISTIONS DI ATUALITÂT ANCJE FÛR DAL FRIÛL

TAV, lis domandis che no cjatin rispueste

Lunis stât, ai 27 di Fevrâr, al è colât l’inovâl dal riviel de Joibe Grasse dal 1511. 501 agns indaûr si impiave a Udin la faliscje de rivolte popolâr plui grande de storie dal Friûl. Par tant timp la memorie di chei fats e je stade platade, par no dî scancelade dal dut, e a son dome un pôcs di agns che si è tornât a scuvierziju.
Ricercjis di pueste a àn mostrât che i contadins furlans a vevin rivât adore a imbastî fintremai une sorte di rêt “politiche” e a tratâ la lôr poie militâr daûr dal rispiet dai dirits e dai ûs tradizionâi. Lis resons di chê lote e la “sogjetivitât politiche” dai furlans di in chê volte, che Vignesie e scugnarà ricognossi, tal 1533, cu la istituzion de Contadinance, a valin ancje in dì di vuê. Al è par chest motîf che la date dai 27 di Fevrâr e ven memoreade cun diviersis iniziativis e che une part dal mont associatîf di chenti e à fintremai tornât a batiâle “Zornade Furlane dai Dirits”.

In cheste suaze, e je zaromai deventade une tradizion la programazion dute speciâl prontade pe ocasion di Radio Onde Furlane cun trasmissions di aprofondiment su dirits e teritori. Protagoniscj de “Zornade” , setemane passade, a son stâts i dirits linguistics, i diritis dai lavoradôrs e lis resons de oposizion aes cussì clamadis “grandis oparis” che a àn di vignî fatis in Friûl: dal dopleament de centrâl di Somplât ae autostrade Secuals-Glemone, fintremai al eletrodot Redipulie-Udin e ae Tav.
Al è stât un aprofondiment ad in plen “dentri de notizie”. Par esempli, intant che tal etar si sintive la vôs dal segretari regjonâl de CGIL, Franco Belci, a Cividât doi operaris cence paie ancjemò dal mês di Otubar a jerin montâts sù suntune gru par domandâ ce che che ur spiete. Par no fevelâ des peraulis di Giancarlo Pastorutti che al motivave lis posizions cuintri de Tav in Friûl e a pro di un traspuart feroviari di personis e marcjanziis che al funzioni pardabon: tant a dî, fermâ chel tren par che a corin di plui e miôr ducj chei altris.

In chescj dîs propit chel de Tav, cun riferiment ae Val di Susa, al à tornât a jessi l’argoment plui frontât dai media a nivel talian.
Daûr dal “rumôr” mediatic, massime su la Turin-Lion, a son cuistions che a meretin atenzion: i studis di esperts di traspuart e di economie che a mostrin che pe rêt europeane al è avonde il colegament che al esist bielzà, cence savoltâ il teritori e straçâ bêçs par di bant; la int che si mobilite, ancje riscjant la vite, e che e volarès jessi scoltade.

Intun moment di crisi de politiche no saressial il câs di dâ valôr a cheste partecipazion e vierzi un spazi di dialic e di confront che al sedi miôr dai “osservatoris” e des “taulis” fatis fin cumò? E cumò che al è un guvier di tecnics no saressial il câs di provâ a motivâ lis posizions “sì-Tav” cun argoments plui specifics – e tecnics – par gjavâ a ducj il dubi che si ledi a fâ une robe cence sens?

Chê altre dì Monti al à mostrât che chestis no son domandis di fâ. Al è un pecjât: cussì la sô posizion no je centant divierse di chê dai parlamentârs che un an indaûr a vevin votât che Ruby e podeve jessi la gnece di Mubarak.

EURO FURLAN
eurofurlan@gmail.com

05/03/2011

Metìn fûr la bandiere dal Friûl ancje pai 25 di Avrîl, pal prin e pai 9 di Mai

Chê altre dì Debora Serracchiani e la coalizion di centriçampe a àn vinçût lis elezions regjonâls dal Friûl-VJ.
O tornarìn in curt su cheste che o calcolìn une buine gnove. Intant, in ocasion de Fieste de Liberazion, o tirìn fûr un articul dal 2011 che al tocje i 25 di Avrîl, il prin di Mai e i 9 di Mai.
Trê fiestis furlanis, pe storie ma ancjemò di plui pe atualitât e pal avignî. Zornadis che si varès di meti fûr la bandiere dal Friûl

RESISTENCE, LIBERAZION, EUROPE, FRIÛL. CUANT CHE IL LUNARI AL JUDE A CAPÎ

9 di Mai e 25 di Avrîl: fiestis furlanis

Ogni mês si fâs la lune e ogni dì si impare une. Cun di plui, ogni dì, o almancul ogni setemane, a son un inovâl o une ricorence di memoreâ. Il lunari, massime chest an, al ufrìs une schirie di datis che a son pardabon impuartantis, o ben che cussì a vegnin calcoladis.

La ocasion par fâ fieste e soflâ dentri de trombe de retoriche e ven simpri cjapade sù, in cualchi câs ancje cuntun boreç che al somee in chel stes moment masse esagjerât e masse pôc justificât. Chês par ricuardâ, capî, resonâ, discuti, cognossi e pensâ, invezit, si lis cjape sù con mancul facilitât.
Lu vin viodût plui voltis propit in chescj ultins mês. Su chest sfuei o vin za marcât, un mês indaûr, cemût che ancje pai 3 di Avrîl, moment bon par pandi une braure furlane libare, positive e dinamiche, nol è mancjât cui che al è rivât a esprimi il so “Furlan Pride” dome a sotan vie: poleç e no acuile.
No si podeve pratindi miôr cualchi setemane prime, pai 150 agns de proclamazion dal Ream di Italie: anzit, al à fat maravee che al sedi stât almancul un piçul svôl di acuile, ancje se in realtât al jere chel di un dordul.
Par no fevelâ de memorie platade, e tornade a discuvierzi, de “Joibe Grasse” dal 1511. In chel câs la fieste e je stade fate ma la retoriche e je lade inte direzion contrarie e cussì al è stât dit che al jere un fat storic impuartant ma che no si veve di fâ masse scjas par vie di dute chê violence e dut chel sanc. Propit chest an che a massalicis e becjârs ur vegnin garantididis cetantis celebrazions “in pompa magna”!

Une ocasion che e je buine par ricuardâ, resonâ e fâ fieste, cun sintiment e cence pôre, e rive de zornade di vuê. Propit ai 9 di Mai al cole l’inovâl di chel che al ven calcolât tant che l’inviament concret de costruzion de unitât europeane. In chê dì dal 1950 il Ministri pai afârs forescj dal Stât francês, Robert Schuman, al veve sclarît che cul metisi adun si podeve sghindâ il pericul di gnûfs conflits e creâ lis cundizions par un bon disvilup economic e sociâl e pe incressite de democrazie. Un an plui tart e nassè la Ceca (Comunitât europeane dal Cjarbon e dal Açâl) e di in chê volte, pûr tra contradizions e dificoltâts, o sin rivâts ae Union europeane di cumò. Forsit chest nol è il moment miôr pe Europe, cundut achel cheste dimension, che no pues esisti cence pâs, dirits, unitât e diversitât, e reste chê di riferiment pal Friûl di vuê e par chel di doman. Une Fieste de Europe, duncje, che no pues che jessi ancje fieste furlane.

Il lunari, tai dîs passâts nus à lassât ancje la possibilitât di tornâ a pensâ sul taramot e soredut su la ricostruzion: un model di coesion e partecipazion, soredut par vie che al jere ce che e voleve la int di chenti. Altris datis ancjemò: prin di Mai e 25 di Avrîl. E ancjemò altris ocasions par resonâ in particolâr di lavôr, dirits, paritât, autonomiis, tutele des minorancis, justizie, libertât, solidarietât, Costituzion. Cun passion, cun preocupazion, cun cussience, cun atenzion. Tant a dî: Resistence, Europe, Friûl. Storie e avignî.

EURO FURLAN
eurofurlan@gmail.com

09/05/2011

Il Far East Film Festival ancje par furlan. Une (piçule) cerce di normalitât

Dai 19 ai 27 di Avrîl si davuelç la edizion numar 15 dal Far East Film Festival, la rassegne di cine asiatic plui impuartante e plui innomenade de Europe. Par vot dîs Udin e torne a jessi la capitâl europeane dal cine dal Orient plui lontan.

Inte suaze di “Udin par furlan” – il progjet di comunicazion par furlan dal Comun di Udin – il plui grant festival european di cine asiatic al sarà contât ancje par furlan cun diretis, incursions, intervistis e aprofondiments trasmetûts su lis frecuencis di Radio Onde Furlane (sui 90.0 Mhz e vie streaming sul sît de emitente). Plui in detai, dopo de direte de dì de scree, vinars ai 19 di Avrîl, e vignarà fate une altre ta chê de sierade, sabide ai 27 di Avrîl tra sîs e mieze sot sere e vot (18.00 – 20.00). Altris spazis informatîfs in direte a son po in program, inte fasse orarie tra dîs e mieze e undis di matine (10.30 – 11.00), intes zornadis di sabide ai 20, lunis ai 22, martars ai 23, miercus ai 24, vinars ai 26 e sabide ai 27 di Avrîl.

Che la lenghe furlane e vegni doprade te comunicazion e te informazion che e tocje iniziativis di innomine internazionâl che si davuelzin in Friûl al varès di jessi alc di normâl. Par cumò nol è cussì, cun dut che al sarès ancje alc di bon e di just (pe lenghe, pai dirits linguistics, pe promozion des specificitâts dal teritori ancje di un pont di viste turistic e plui in gjenerâl economic). E alore si scuen contentâsi. Cemût che al sucedeve za un pâr di agns indaûr, simpri cun alc che al veve a ce fâ cul Far East Film Festival e cul Comun di Udin.
O tornìn a recuperâ chel articul, saltât fûr ai 23 di Mai dal 2011, cun chê che si rivi a passâ des ecezions ae normalitât.

DIRITS, CULTURE E TERITORI. SI MÔF ALC ANCJE IN FRIÛL, MA CE CHE AL È NORMÂL AL RESTE UNE ECEZION

Alc al è alc, però la Scozie e je lontane

Alc al è alc e nuie al è nuie. Cheste detule furlane nus jude un pôc a preseâ chel “alc” di bon che al salte fûr e un pôc a contentâsi di cemût che a van lis robis in chestis setemanis. Se si cjale ce che al è stât intant dai ultins cuindis dîs, a son plui di cualchi motîf par cirî alc di bon e rinfrancjâsi. Cu la spiete, la sperance e la voie che al sedi ancje alc di miôr.

Si è sierade che nol è tant la edizion 2011 dal “Far East Festival”. Ancje chest an l’event al è stât un sucès, pe partecipazion dal public e pe cualitât e pe varietât dai films e dai incuintris presentâts. Cun di plui e je stade la prime volte che il program di sale al è stât dât fûr ancje par furlan. Il fat al à colpît tancj di lôr, al à mot curiositât, maravee e simpatie.
Ise une iniziative straordenarie? CEC e Comun di Udin a àn fat dome une robe juste e, almancul in teorie, normâl: il festival si fâs a Udin, in Friûl; a Udin e in Friûl e esist, e si dopre, ancje la lenghe furlane; la manifestazion no je un “ufo” rispiet a chest teritori; une part dal public al à tant che lenghe proprie il furlan e ancje cence lâ a discomodâ leçs di tutele e dirits linguistics al è just che chest fat al vegni ricognossût e rispietât.

In Friûl – e plui in gjenerâl in dute la regjon – par chestis resons i materiâi di comunicazion e informazion di dutis lis iniziativis che a vegnin fatis chenti a varessin di jessi simpri ancje par furlan e par sloven e par todesc, soredut chei che a àn une rilevance che e va ancje fûr dai nestris confins. Impen, cundut che al è propit il fat di vê cuatri lenghis nestris che nus fâs “gente unica”, cemût che nus definive il vecjo sproc de promozion turistiche regjonâl, chest nol sucêt mai, ni pal “Mittelfest”, ni par “Folkest”, ni par “èStoria”, ni par “pordenonelegge.it”, pe rivade di chestis bandis dal Zîr di Italie o pai concierts che cumò a vegnin marcâts “LIVE”, tant par fâ cualchi esempli a câs. E nancje par “Vicino/Lontano” o “Festintenda”, che però – alc al è alc – almancul a fasin publicitât su Radio Onde Furlane.

Al à fat ben, alore, Enrico Ghergetta, tornât a jessi elezût President de Provincie di Gurize, a fâ il so zurament ancje ta chês altris lenghis propriis dal Friûl orientâl, ven a dî par furlan e par sloven. Alc al è alc.
Une biele gnove e je ancje chê de mobilitazion dal Comun e de int di Migjee. Cuant che ur àn dit che undis fruts notâts pe prime elementâr a jerin masse pôcs par meti adun une classe, daûr dal cussì clamât “Decret Gelmini”, si son visâts che chel stes decret al previôt che tes areis gjeografichis là che si cjatin minorancis linguistichis la cuote minime par une classe e je dome di dîs fruts e cumò a domandin la metude in vore complete di chês normis. Viodarìn cemût che e larâ a finîle.

La Scozie des elezions di cuindis dîs indaûr e je lontane, compagn de Sardegne là che la setemane stade il referendum cuintri dal nucleâr al è stât un grant sucès, ma su dirits e teritori al è alc che si môf ancje chi di nô. Alc al è alc.

EURO FURLAN
eurofurlan@gmail.com

23/05/2011

Publicât tal 2011, ma ancjemò bon in dì di vuê

“FIESTE DE PATRIE”. UN INOVÂL IMPUARTANT PAL FRIÛL DI VUÊ E DI DOMAN. TRA PROSPETIVIS E PERICUI

3 di Avrîl. Sino acuilis o poleçs?

“Siamo uomini o caporali?” al jere il titul di un film dal 1955 cun protagonist Totò, il princip talian de ridade. “Sino acuilis o poleçs?”, invezit, e podarès jessi la domande di fâsi in chescj timps, tra celebrazions, declarazions e gnovis di ogni sorte.

A son passâts juste pôcs dîs dai 3 di Avrîl. Dai prins dal mês un pôc di ogni bande dal Friûl al è stât fat alc par memoreâ l’inovâl numar 934 de nassite dal Stât patriarcjâl. Chê de investidure feudâl dal patriarcje Siart e je par sigûr une date impuartante pal nestri teritori, no par une cualsisedi nostalgjie de Ete di Mieç, ma ben par cjalâ indenant, al Friûl di vuê e a chel di doman. Cun di fat, i passe trê secui di vite di chê istituzion, di in chê dì dal 1077 fintremai al 1420, a son stâts determinants pe definizion de unitarietât teritoriâl dal Friûl, dal so profîl multietnic e multilengâl e de fisulumie de lenghe furlane: propit i elements di fonde che a marchin, ancjemò in dì di vuê, la identitât e il potenziâl di cheste tiere e de sô int. A varessin di jessi chestis lis motivazions di chê che e ven clamade “Fieste de Patrie” e duncje al è pardabon di preseâ il fat che a son tancj di lôr chei che si impegnin te celebrazion di cheste ricorence.

Inte suaze dai tancj apontaments dai dîs passâts a mertin ricuardadis lis fiestis di zoventût e musiche che son stadis a Udin e Muçane, là che si à rivât a vê in concret un sens di presint e di avignî, a sintî che il Friûl al esist e al pues esisti e resisti, ancjemò e ancjemò miôr.
E ce dî de leture complete de Bibie par furlan? Magari chi di un pôc cualchidun al scrupularà che e je stade dome un event “spot” o adiriture une occasion pierdude, ma par intant al è un fat: 1127 letôrs si son interçâts par 134 oris continuis par lei ognidun une part des Scrituris (e altris 400 di lôr a àn scugnût contentâsi di dâ la lôr disponibilitât pes sostitutuzions eventuâls).
Cuistion di identitât, di culture, di lenghe, di religjon? Al sarès interessant fâ un scandai sociologjic par profondî l’argoment.
Par sigûr a vevin iniment chescj diviers aspiets chei che a vevin fat la imprese di voltâle, la Bibie, par furlan. Se e je vere che Pre Checo Placerean al diseve che “Un popul cu la Bibie inte sô lenghe al è un popul cul cjapiel sul cjâf ”, al vûl dî che un dai intindiments al jere chel di dâ dignitât ae lenghe e ae int che le dopre.

Cussì, daûr di chês peraulis, si reste scaturîts, intant che si lei sui gjornâi che ancjemò tal 2011 par fevelâ dai 3 di Avrîl al è cui che, magari cu la acuilute sul golâr e cun chê di pandisi tant che l’erêt di Marquart o Beltram, nol va plui innà di “piccola patria” e “salt, onest, lavoradôr” e al gjave vie intun colp sei il cjapiel che il cjâf. E a vegnin i sgrisui a viodi chel percors comun di fufignis e mistificazions, fier e ciment, gjavis e asfalt, tarlìs e capanons.
Ce diference tra il svualâ di une acuile e il sgjarpedâ di un poleç.

EURO FURLAN
eurofurlan@gmail.com

11/04/2011