Atualitât, Friulanofobie

Scuele vierte. Par dut, par ducj ma no pal furlan

Al è timp di “Scuelis viertis”. Dai 15 di Zenâr ai 15 di Fevrâr si à di fâ la iscrizion dai fruts a scuele pal prossim an e par chest dutis lis istituzions scolastichis – de infanzie, primariis e secondariis di prin e secont grât – a inmanein incuintris di pueste par presentâsi ai lôr potenziâi arlêfs e aes lôr fameis.

I apontaments di cheste fate a son une ocasion pes scuelis par vierzisi e par mostrâ cemût che a son e ce che a fasin, tra struturis, risorsis e ufierte formative, servizis e altris iniziativis, intant che gjenitôrs e fruts a varessin di rivâ adore a tirâ dongje i elements che a coventin par sielzi la scuele dulà tacâ l’an scolastic 2015/2016.
Se si cjape part a cualchidun di chescj incuintris o, plui in gjenerâl, se si lei ce che al sucêt in chestis ocasions, si rindisi cont che, magari cussì no, tes scuelis dal Friûl la situazion no je par nuie biele.

Al è emblematic ce che al sucedût cualchi dì indaûr a Pordenon, là che une dirigjente scolastiche, cence pudôr e cence rispiet pes leçs e pai dirits linguistics, e à dit a clâr ai gjenitôrs di no domandâ l’insegnament di furlan e par furlan, parcè che nol covente e al robe timp a chês altris materiis.

La “performance” di une “civil servant” – lu scrivìn par inglês, parcè che cussì al è plui “cool” – che e propon une violazion di dirits di fonde, cu la scuse che si varès di cambiâ l’orari complessîf, e salacor si svante di no meti in vore une leç statâl e une regjonâl, che a divegnin di un principi di fonde de Costituzion, si comente par so cont. Se cualchidun al pensàs di denunciâ chest fat aes autoritâts competentis nol fasarès altri che il so dovê di citadin.
Par intant, si spietìn che a disin alc o la presidente de Regjon o la assessore regjonâl pe istruzion.

Magari cussì no, chel di Pordenon nol è un câs isolât. Al baste lei l’articul dal cuotidian locâl che al à dât fûr la notizie. No dome parcè che al pant une cierte sodisfazion (‘nomen omen’?) pe cjolte di posizion de dirigjente e al palese grampadis di disinformazion ideologjiche cuant che al fevele di «materia che nessuno di fatto richiede» (dulà?? parcè??) e di «beçonons» (cuâi? trops?) metûts de Regjon pal furlan «mentre per gli insegnamenti di base il Ministero tende sempre più a contrarre risorse, soprattutto in termini di docenza». Ma ancje pe realtât che al descrîf, stant che al marche – nancje che e fos une robe juste e normâl – che «quando ci si reca in segreteria per iscrivere i bambini a scuola, è lo stesso personale a dissuadere i genitori dal presentare la richiesta».

Cui che al à fîs in etât di scuele al sa che cheste tindince si le cjate ancje inaltrò, sei tra i dirigjents e i insegnants che tra i funzionaris di segretarie, che evidentementri a ricevin istruzions di cheste fate de bande dai lôr sorestants.

Al sucêt ancje di ca de aghe. Sabide stade, par esempli, un nestri amî al è lât intune scuele medie di Udin, par un apontament di “Scuelis viertis”.
Nus à contât di une presentazion bielonone: un biel powerpoint, bielis fotos, descrizions sioris di cors, servizis e altris ativitâts plui o mancul speciâls (lenghis forestis, musiche, gjitis, concors…) e une insistence sei sul schermi che tes peraulis des insegnantis tal marcâ i principis e indreçaments di fonde de scuele e de sô azion didatiche e formative, a tacâ dal bon acet, dal dialic interculturâl, dal rispiet de diversitât, dal rapuart cul teritori e de legalitât.

Une presentazion cussì sflandorose che al nestri amî i veve vignude gole no dome di notâ so fì ma ancje di notâsi lui ta cheste scuele cussì biele e cussì juste!
Un altri gjenitôr, però, si veve inacuart che al mancjave alc e al domandave alc in cont de lenghe furlane, stant che no le veve sintude o viodude di nissune bande. La rispueste e je stade sù par jù cheste: «il furlan nus al domandin in pôcs, cussì no lu proviodìn parcè che se al fos o varessin di taiâ fûr une ore di pueste e ridusi cualchi altre ativitât».

Ce si puedial dî? Un altri biel (????) esempli di “(im)moral” “(dis)suasion”…, “in English, of course”!
O ben, par talian: “alla faccia dell’accoglienza, del dialogo interculturale, del territorio, del rispetto per la diversità e della legalità”!

Advertisements
Standard
Dome pal blog, Par ridi (?), Politiche

Triveneto? No, grazie

Sù par jù doi mês indaûr o vevin publicât un articul che, almancul par cualchidun che nus à scrit, al veve un titul masse «criptic» e «talianon»…, stant che al menzonave un vecjo sketch di Roberto Benigni.

Chel toc – «Achille, cambia nome!» – al veve chê di invidâ cualchi istituzion a cambiâ non e soredut al voleve pandi preocupazions motivadis in cont de fantomatiche denominazion di «triveneto», dal so ûs e de sô difusion e di une propueste di riorganizazion teritoriâl dal Stât che e veve chê di meti adun une regjon aministrative cun chel non.

Magari cussì no, nus tocje cjapâ at che, cundut dal timp passât, chel articul al è ancjemò une vore atuâl.

O podês tornâ a leilu achì.

Standard
Atualitât, Dome pal blog, Editorie, Politiche

Tu quoque, Vita Cattolica

Inte suaze dal panorame gjornalistic e editoriâl di chenti o vin une stime particolâr pe “Vita Cattolica”.
Dal setemanâl de Diocesi di Udin nus plâs soredut la atenzion pal Friûl inte sô unitât e inte sô pluralitât.

Cun di fat, cundut che al cuvierç dome il teritori de Diocesi di Udin, il gjornâl al mostre di vê avonde clâr il fat che il Friûl al è plui grant, des Alps ae Marine de Livence al Timau.
La Vita Cattolica e ten cont ancje de diversitât linguistiche di chenti, cun articui, rubrichis e pagjinis par furlan, par sloven e par todesc e la plui part dai tescj par furlan publicâts e je ancje scrite doprant la grafie uficiâl in maniere corete, cemût che al è just in cualsisedi lenghe.
Cu la coretece e la atenzion che a coventin, i siei gjornaliscj par solit a scrivin ancje il non de regjon inte maniere juste, in coerence cu la storie, cu la gjeografie e cul dirit, ven a dî cu la liniute tra “Friuli” e “Venezia Giulia”.

Al è daûr di dutis chestis considerazions che o sin restâts scaturîts a viodi il “Calendario della Fede. Chiese e pievi del medioevo in Friuli Venezia Giulia” (sic!), lunari dât fûr in zonte dal prin numar di chest an dal setemanâl. Parcè che al è dome par talian, parcè che il non de regjon al è scrit cemût che al è scrit e parcè che par ogni mês e je une detule par furlan che e je scrite cence rispiet pes regulis, cun caratars, acents e apostrofs semenâts cence criteri.
Cun di plui il “Calendario” al permet di fâ ancje cualchi biele discuvierte. Par esempli, che la Fieste de Patrie dal Friûl e cole sei ai 3 di Avrîl che ai 3 di Fevrâr o che il Püst, il Carnavâl rosean, si lu fâs a Mugle.

Tal “Calendario”, dongje dal logo de “Vita Cattolica” al è ancje chel di TurismoFVG…

Standard