Articui 2014, Atualitât

E se i bêçs dal ‘canone’ a lessin a Onde Furlane?

Di ce che si lei ator, la parade dai fenomens e va indenant in plene, in rêt e su la stampe.
Tal Quotidiano di vuê, però, al è ancje alc altri: al è chest articul che al fevele di lenghis, dirits, media e servizi public radiotelevisîf.

Se no lu vês let sul gjornâl, lu cjatais ancje achì.

1954-2014. LA RAI E FÂS FIESTE PAI SESSANTE AGNS DE TELEVISION, MA PE LENGHE FURLANE CUI FASIAL SERVIZI PUBLIC PARDABON?

E se i bêçs dal ‘canone’ a lessin a Onde Furlane?

Dôs setemanis indaûr al è colât il 60esim inovâl de television publiche intal Stât talian. Cun di fat, ai 3 di Zenâr dal 1954 a 11 a buinore a tacavin lis trasmissions televisivis dal ‘Programma Nazionale’. Vie par chê stesse zornade a levin in onde ancje il prin telegjornâl, il prin program di intratigniment e la prime trasmission sportive.

La ricorince e je stade memoreade de bande de Rai cun celebrazions di ogni sorte. Pe ocasion, chê che e je la aziende culturâl plui grande e plui impuartante dal Stât talian, e à marcât la sô impuartance storiche e la sô funzion di servizi public.
Massime di uns vincj agns incà, ae Rai i covente une vore promovi e rilançâ la sô imagjin, soredut tra la fin dal an vecjo e il principi di chel gnûf. Cun di fat, chest al è il moment dal paiament dal abonament pe television e duncje si à di convinci i citadins che chê che formalmentri e je une tasse leade al possès di un aparât televisîf si à di paiâle no dome par chest ma ancje parcè che e covente par mantignî un servizi che si presente tant che “bon” e “just”.

Propit in cont dal servizi, de sô cualitât e de sô ecuitât, in tancj di lôr, cun cjaladuris diferentis, a fasin indenant plui di cualchi dubi. Chest al vâl par esempli in cont de presince e dal ûs de lenghe furlane te programazion de concessionarie dal servizi public radiotelevisîf. Al è un argoment che i politics nostrans a frontin, soredut cualchidun, plui par fâsi propagande che par altri. I risultâts si ju viôt, stant che ce che al è previodût de normative di tutele des minorancis, che su chest cantin e je di une clarece esemplâr, nol ven ancjemò metût in vore.

Il confront cun ce che al sucêt inaltrò al fâs incressi la avilizion, tant che citadins e tant che utents e clients dal servizi public radiotelevisîf. Intant che a Bolzan pal ladin a son nûf gjornaliscj, un cjâf redatôr e doi telegjornâi, cence fevelâ dai programs radio e di chei di intratigniment e aprofondiment par television, chi di nô no je nissune programazion televisive par furlan, no je nissune redazion pal furlan, e duncje no son ni telegjornâi ni ‘gr’. Al è dome alc par radio – ven a dî rubricutis di pôcs minûts cuntune pagjine web sul sît de sede Rai pal Friûl-VJ – e il dut, magari cussì no, al somee fat in maniere precarie e pôc curade.

Ce che nus covente de Rai e je soredut la television, stant che la ufierte privade e je scjarsonone. Ma cheste e reste un tabù, cun dut che slargjant ancje a furlan e todesc la programazion regjonâl de Rai 3 bis si podarès fâ daurman alc di bon.

Cussì, par ce che al tocje la radio, par doprâ inte maniere miôr lis risorsis, al somee tant miôr rinfuarcî cui che al fâs cun continuitât, cun professionalitât e salacor cun passion chest servizi public. E par fâ alc di bon e di just, si podarès ancje dâur a Onde Furlane e a Radio Spazio almancul part dai bêçs dal ‘canone’ paiât de bande dai furlans.

EURO FURLAN
eurofurlan@gmail.com

17/01/2014

Advertisements
Standard
Atualitât, Dome pal blog, Musiche, Par ridi (?)

«Abolizione delle province», finalmentri une robe di sest

No savìn ben là che le vin sintude, ma framieç di tantis cjacaris in cont des provinciis, de lôr abolizion, de lôr riorganizazion e vie indenant, za cualchi timp indaûr o vevin cjatât finalmentri cualchi peraule di sest.
Ve lis chi: «Aboliamo ‘la provincia’… dai tescj par talian dai Carnicats».

Standard
Atualitât, Dome pal blog, Friulanofobie

Lenghe furlane. Ogni dì al rive un fenomen

Si visaiso di chê cjançon dai Stadio, ‘Generazione di fenomeni’? Chel toc e in particolâr il so titul nus tornin tal cjâf avonde dispès cuant che o sintìn ce che a disin – o ben cuant che o leìn ce che a scrivin – tancj di lôr in cont de lenghe furlane. Cun di fat za vie pal an passât, in cont di chest argoment o vin viodût il passaç e salacor la esibizion di fenomens di ogni sorte.
A conferme di ce che o vin scrit chê altre dì (An gnûf, cragnis vecjis), la sfilade, che tal 2013 e je stade siore di freaks, geeks, zombies (dait un cuc achì e achì, par esempli), pe plui part specialiscj tal vaî il muart o tal pontificâ sul nuie, e continue: al baste dâ un cuc ae stampe o ae rêt.

Juste vuê al è saltât fûr un articul, che al mostre di fâ indenant une schirie di resonaments e salacor ancje di rivelazions in cont de lenghe furlane, dal fat che e murirà, dal fat che si à di salvâle no cu la metude in vore di politichis strategjichis di pueste, ma ben cul dâ un premi aes fameis par che a coltin la lenghe in cjase e cul inmaneâ lis ‘Furlaniadi’ (ma almancul no podaressial clamâlis ‘Furlaniadis’????) e magari, dopo, cuntun pocje di scuele (volontarie e parziâl), e vie indenant.

L’autôr dal articul, là che tra banalitâts che il stes al definìs «visionariis» e banalitâts che a son banalitâts e vonde (almancul cheste e je la nestre opinion), al è un innomenât gjornalist sportîf di chenti, che di ce che o savìn nô (ma se cualchidun al è in stât di dimostrânus il contrari, o vin plasê di leilu e di scoltâlu) mai e poi mai al à scrit par furlan e mai e poi mai al à palesât un interès viers de lenghe furlane, dal so ûs e de garanzie dal dirit dai furlans di podê doprâle tant che un lenghe normâl, di fevelâ, di scoltâ, di lei, di scrivi.
Al massim, di ce che si lei in rêt, al è lât ator pal mont a promovi la ‘friulanità’ par talian cun chê associazion che il so president timp indaûr al veve declarât che il furlan nol covente a nuie.
In chest sens, si pues preseâ une cierte coerence… Ma no nus interesse jentrâ in polemiche cun nissun. Anzit, nus fâs plasê che de cuistion si interessi ancje cui che no si à mai interessât.

In cont dal articul, o vin miôr frontâ doi aspiets in maniere positive, ancje se se o riscjìn di dî chê e simpri chê.

Il prin al tocje la lenghe e il dirit ae lenghe. La cuistion no je chê di salvâ une lenghe che se di no e mûr o che e je za daûr a murî, ma e je chê di garantî a cui chel vîf in Friûl di cognossi, doprâ e savê doprâ la lenghe furlane, cence discriminazions, cence prejudizis e cence fastidis.
Il fat che – cemût che al ven marcât ancje de bande dal innomenât opinionist – lis fameis e vedin ridusût la trasmission de lenghe furlane (o ben che le vedin evitade dal dut), massime tai ultins trente agns, nol diven tant dal fat che si voleve rompi cul passât e cu la ‘benedete’ antigaie, ma dal fat che il contest sociâl al jere daûr a vierzi gnûf spazis e gnovis formis di comunicazion là che il furlan nol vignive cjapât dentri.
Duncje no si à di dâ premis ae fameis par che a fevelin par furlan in cjase (tra lis altris, al è alc che nol funzione nancje in tiermins aministratîfs), ma si à di garantî che la lenghe e sedi cognossude e doprade tant che lenghe inte societât: te scuele, a vore, par divertîsi, par esprimi creativitât, tal sport….
No si visìn indulà, ma di cualchi bande o vin let in cont des lenghis minorizadis e des fameis, che «non esiste la lingua degli affetti se non è anche lingua degli effetti». Si cjatìn in cunvigne ad in plen.

Il secont aspiet al tocje propit il sport, argoment che l’innomenât autôr al cognòs cetant ben. Plui che inmaneâ lis ‘Furlaniadi’ (magari lis ‘Furlaniadis’ sì…, ma dopo vê metude in vore la legjislazion di tutele, massime in cont di istruzion e ûs public), si podarès tornâ a sugjerîi al Udin e a chei altris sogjets impegnâts tal sport che si metin pardabon a fâ comuncazion sportive par furlan. Al zovarès ae lenghe, ai dirits e ancje al sport e ae economie.

Standard
Atualitât, Dome pal blog

An gnûf, cragnis vecjis

Se il fum al va a soreli a mont, cjape il sac e va pal mont. Cussì, de plui part dai pignarûi, des fogheris e dai panevins dal Friûl, al salte fûr che pal 2014 al sarà cetant di scombati.

Par dî la veretât, cence gjavâi nuie ae tradizion, nus somee che a sedin altris i segnâi negatîfs.

Al bastave dâ un cuc in rêt. Tal sît internet di chel cuotidian di chenti che al à il non forest, tai prins dîs dal an, tra articui in cont dal brut timp e dal sport, si cjatavin diviers esemplis di chê fantagjeografie ideologjiche che e je sei un imprest che un spieli di alienazion e che e calcole il Friûl dome che la provincie di Udin, intant che chel di soreli a mont al sarès ‘Destra Tagliamento’ e chel Gurizan al ven clamât ‘Isontino’.
Par no fevelâ dal mantra dal ‘derby triveneto’ Udin-Verone: une definizion falade che e puarte sfighe ancje sul plan sportîf, cemût che si à viodût lunis.

Magari cussì no, al è ancjemò alc altri che al fâs vignî i sgrisui: par cualchidun dome une gnove lete su gjornâl pôcs dîs indaûr, par altris un çavariament preocupant che si palese za di timp inte rêt. O tornarìn sul argoment.

Par no fevelâ de cuistion ‘Latterie Friulane’ e dai siei ultins disvilups. O ben, di chê dal Palio studentesco, là che però – cu la mobilitazion che si à inviade – al vignarès di dî che nol è un mâl che nol sedi un ben, cun dut che al displâs une vore che si rindisi cont di cetant che a valin lis robis impuartantis dome cuant che a son in pericul di vite. E al displâs ancjemò di plui viodi cemût che pai sorestants dal Friûl al è facil fâ polemichis ‘ex post’, intant che no si fâs nuie di sest cuant che al covente e anzit si reste a cjalâ fis cence capî o magari no si rive nancje a viodi o si fâs fente di nuie e si cjale di chê altre bande, in maniere cuasi patologjiche, compagn de protagoniste dal gnûf cine di Woody Allen, Blue Jasmine.

Il 2014 al tache cun avilizion e preocupazion, ma ancje cuntun tic di sperance, stant che propit in cont de gjeografie mediatiche, al merete ricuardât che almancul intun câs che il Friûl di soreli a mont al ven clamât ‘Friuli occidentale’ !!!!

Cun dut achel, si pues dî che l’an al è gnûf ma lis cragnis a son vecjis. Dut câs, chest nol vûl dî che si scuen acetâlis in maniere passive. Anzit!

Ancjemò auguris.

Standard