Articui 2014, Atualitât, Politiche

Furlan a scuele. E je ore di cambiâ e si pues fâlu

Vinars stât a jerin i 26 di Setembar, la Zornade europeane des lenghis. In cont di cemût che la ricorence e je stade memoreade chi di nô, o vevin za scrit alc chê altre dì.

Inte date sielzude de bande dal Consei de Europe cun chê di promovi il pluralisim linguistic tes sôs diviersis espressions al è jessût sul Quotidiano un nestri toc là che o vin vût miôr tornâ a fevelâ di plurilinguisim a scuele e di istruzion in lenghe furlane.
Par cui chel al lei il blog a son robis za scrits e duncje za letis, stant che il toc al tocje la cunvigne che si à davuelte Udin ai 9 di Setembar.

Però, nol è dome chel, parcè che o scrivìn ancje alc in cont dal incuintri che al è stât a Rome in Senât .

Par chest, chê che cualchi dì indaûr e jere une domande cumò e devente une afermazion.

Velu chi.

ISTRUZION PLURILENGÂL. LA ZORNADE DAI 9 DI SETEMBAR E VIERÇ UNE GNOVE PROSPETIVE, CHE NO SI PUES PIERDILE

Furlan a scuele. E je ore di cambiâ e si pues fâlu

Vêso presint chel film di un pôcs di agns indaûr cun Jack Nicholson e Helen Hunt? Il so titul par talian al je ‘Qualcosa è cambiato’. Chel film e soredut chel titul nus àn tornât iniments in ocasion de zornade di formazion inmaneade de bande dal Assessorât regjonâl pe Formazion e pe Istruzion, de Agjenzie Regjonâl pe Lenghe Furlane (ARLeF) e dal Ufici Scolastic Regjonâl dal Friûl-VJ, in cont dal insegnament de lenghe furlane te scuele, che si à davuelte ai 9 di Setembar a Udin. Cun di fat, chê iniziative e à dât pardabon la idee che al è alc che al è cambiât o che al è daûr a mudâ, a svoltâ, a cressi e a vierzi une prospetive divierse pal avignî.

Il tiermin di paragon prin al è chel de Conference regjonâl su la tutele de minorance linguistiche furlane di doi agns indaûr. La sale plene di passe cuindis dîs indaûr, di une bande, e il desert di chê dai 24 di Novembar dal 2012, di chê altre, a son il spieli de situazion: il vueit che al à marcât i ultins agns des politichis de Regjon in cont de lenghe furlane e dai dirits linguistics dai furlans e la rapresentazion fisiche de cjolte di cussience de necessitât di fâ alc di sest de bande sei de ARLeF che almancul di une part dal mont de scuele dal Friûl.

Che tai ultins agns al sedi stât fat pôc o nuie di sest a pro dal furlan e de metude in vore de leç regjonâl 29 dal 2007 tal cjamp de istruzion si lu à viodût ad in plen te relazion presentade de bande des rapresentantis dal Ufici scolastic regjonâl (l’USR), che inte fantomatiche rêt interistituzionâl a pro dal insegnament e dal ûs lenghe furlane metude adun tai altins agns a menzonavin diviers sogjets, ma a ridusevin dut a une sole Provincie e a dismenteavin l’Ateneu furlan.
Une mancjance no di pôc… Lis pussibilitâts a son trê: l’USR no si à inacuart che e esist la Universitât dal Friûl; cheste no à fat nuie par mostrâ che e esist e che, a tacâ di ce che e dîs la sô leç istitutive, e varès di jessi operative propit in chest setôr; ni chel e ni chê altre no àn fat nuie a pro de lenghe, dal so insegnament e dal sô ûs tes scuelis… In cualsisedi maniere: nuie di bon.

E je vere che al è dificil rivâ adore a fâ piês di cussì, ma nol è dome par chest che o pandìn un ciert otimisim. In chê zornade al è saltât alc di gnûf e di bon. Par esempli, si à fevelât dal dirit ae istruzion in lenghe furlane e dal dovê des scuelis di garantîlu te lôr ufierte formative. E ancjemò: la Universitât dal Friûl, adun cun ARLeF e Regjon, e à fat indenant une propueste di un cors di formazion pai insegnants che e somee une robe serie, di nivel almancul di chês imbastidis un pôcs di agns indaûr e po pierdudis pai trois no si sa indulà.

Cumò al covente che soredut la Regjon e sedi coerente cui contignûts che a son saltâts fûr in cheste ocasion e duncje che e passi des peraulis ai fats. Ai 16 di Setembar a Rome, intun incuintri li dal Senât, al è stât sclarît cemût fâ. Si pues e si scuen.

EURO FURLAN
eurofurlan@gmail.com
26/09/2014

Standard
Atualitât, Friulanofobie

Di «Mamma, ho perso il friulano» a «Mamma, ho perso il Friuli»

Ai 26 di Setembar e cole la Zornade europeane des lenghis. Cheste ricorence e ven memoreade con tantis iniziativis un pôc dapardut. Propit in chescj dîs a Udin – e probabilmentri nol è un câs – si davuelç la cunvigne internazionâl Lingue in contatto. Contact Linguistics, inmaneade de bande dal Dipartiment di studis umanistics de Universitât dal Friûl e de Società di linguistica italiana.

L’event al à un tai une vore academic e al fâs indenant un program biel penç, cun tantis relazions interessantis, ancje se une vore dispès a somein autoreferenziâls e fatis su misure dome par cui che lis presente.
In particolâr, ce che al salte al voli al è il fat che framieç di ducj chescj intervents no’nd è nancje un che al tocji cualchi aspiet dal contat tra lis lenghis che si cjate in cheste tiere multilengâl, multietniche e multiculturâl che si clame Friûl: propit chel Friûl che la sô Universitât al varès di promovilu e di metilu in relazion positive con se stes e cul rest dal mont.

Nus somee che cheste no sedi une mancjance di pôc. Cussì, cjalant il program, al è pardabon dificil no cjatâsi in cunvigne cun cui che par comentâ chê iniziative al à recuperât lis peraulis dal Conte Lello Mascetti , chel personaç che tal film ‘Amici Miei’ di Mario Monicelli al veve la muse e la vôs di Ugo Tognazzi.

No je la prime volte che, propit là che al covente che a sedin, a vegnin pierdûts pe strade il Friûl, lis sôs lenghis e in particolâr la lenghe furlane. Timp indaûr o vevin comentât un di chescj câs e, tornant a cjapâ sù il titul dal cine «Mamma, ho perso l’aereo», o vevin scrit di une ‘docufiction’ dal titul «Mamma, ho perso il friulano».
In cont de cunvigne sflandorose de Universitât, nus somee legjitim pensâ che e sedi rivade la ore di «Mamma, ho perso il friulano 2».

Magari cussì no, la serie e va indenant. Cussì al è za pront «Mamma, ho perso il friulano 3» e in chest câs no je colpe dai linguiscj.
Cun di fat, juste ai 26 e ai 27 di Setembar, si davuleç a Arnoldstein une biele cunvigne in cont dal gjornalisim e de informazion tra Carinzie, Slovenie e Friûl-VJ, dopo dîs agns de jentrade de Slovenie te Union europeane. L’incuintri al è interessant e al tocje un argoment une vore impuartant.
Cun di plui al cjale indenant e al è viert ancje ai gjornaliscj de Cravuazie. Il titul dal incuintri al è par todesc, par sloven, par talian e, juste par chest, ancje par cravuat. Podìno dî che al varès parût bon che – intune suaze ‘euroregjonâl’ e cuntun spirt european e europeist – il titul de iniziative al fos ancje par furlan?

Il piês, cemût che o savìn, nol à limits. E cussì o leìn sul sît dal ateneu furlan che ai 26 di Setembar intal cjistiel di Udin si fevelarà di Turismo e paesaggio nel triveneto: opportunità di sviluppo economico, culturale e civile (sic! sic! sic!) intune cunvigne dal titul ‘Le Venezie e il turismo del futuro’ (sic! sic! sic! sic!).
Plui che di avignî, o nasìn puce di disorientament (il triveneto? le Venezie?) e di passât: di chel plui brut, massime pe nestre tiere e pe nestre int. Nus torne iniments ancje chê operazion falade e duncje falide de candidature di «Venezia con il Nordest capitale europea della cultura 2019».

E nus ven di dî: «Mamma, ho perso il Friuli!»

Standard
Atualitât, Politiche

Furlan a scuele. Isal finalmentri rivât il moment di cambiâ?

Vêso presint chel film di un pôcs di agns indaûr cun Jack Nicholson e Helen Hunt? Il so titul origjinâl al jere ‘As Good as It Gets’, intant che te sô version par talian al è saltât fûr tant che ‘Qualcosa è cambiato’. Chel film e soredut chel titul nus àn tornât iniments in ocasion de zornade di formazion inmaneade de bande dal Assessorât regjonâl pe Formazion e pe Istruzion, de Agjenzie Regjonâl pe Lenghe Furlane e dal Ufici Scolastic Regjonâl dal Friûl-VJ, in cont dal insegnament de lenghe furlane te scuele, che si à davuelte îr a Udin. Cun di fat, chê iniziative e à dât pardabon la idee che al è alc che al è cambiât o che al è daûr a mudâ, a svoltâ, a cressi e a vierzi une prospetive divierse pal avignî.

Il tiermin di paragon prin al è chel de Conference regjonâl su la tutele de minorance linguistiche furlane di doi agns indaûr. La sale plene di îr, di une bande, e il desert di chê dai 24 di Novembar dal 2012, di chê altre, a son il spieli de situazion: il vueit che al à marcât i ultins agns des politichis de Regjon in cont de lenghe furlane e dai dirits linguistics dai furlans e la rapresentazion fisiche de cjolte di cussience de necessitât di fâ alc di sest de bande sei de ARLeF che almancul di une part dal mont de scuele dal Friûl.

Cun di plui, la iniziative, inmaneade in Regjon e ancje de bande de stesse Regjon (Assessorât regjonâl pe Formazion e pe Istruzion) un pôc masse a regjonâl vie (chel l’invît fat dome par talian…!), e je stade utile soredut pe Regjon.
Almancul fin cumò, il gnûf guvier regjonâl nol à rivât adore a mostrâ di jessi masse diferent di chel di prime, cemût che o vin marcât in plui ocasions .
Îr nus à someât che la assessore Panariti e vedi discuviert un mont gnûf, che no lu cognosseve tant e salacor che lu calcolave ancjemò di mancul.
La propueste di un cors di formazion pai insegnants fate indenant di ARLeF, Regjon e Universitât dal Friûl e conferme che al è alc che finalmentri si môf e inte direzion juste, dopo agns di inativitât o ancjemò piês. Sperìn in ben.

Che tai ultins agns al sedi stât fat pôc o nuie di sest a pro dal furlan e de metude in vore de leç regjonâl 29 dal 2007 tal cjamp de istruzion si lu à viodût ad in plen te relazion presentade de bande des rapresentantis dal Ufici scolastic regjonâl (l’USR), che inte fantomatiche rêt interistituzionâl a pro dal insegnament e dal ûs lenghe furlane metude adun tai altins agns a menzonavin diviers sogjets, ma a ridusevin dut a une sole Provincie e a dismenteavin l’Ateneu furlan.
Une mancjance no di pôc… Lis pussibilitâts a son trê: l’USR no si à inacuart che e esist la Universitât dal Friûl; cheste no à fat nuie par mostrâ che e esist e che, a tacâ di ce che e dîs la sô leç istitutive, e varès di jessi operative propit in chest setôr; ni chel e ni chê altre no àn fat nuie a pro de lenghe, dal so insegnament e dal sô ûs tes scuelis… In cualsisedi maniere: nuie di bon.

Ta chê stesse relazion al è saltât fûr alc di interessant: al è stât ricuardât il dirit di sielzi di vê l’insegnament de lenghe furlane tes scuelis (però nol è dome chel: al è ancje – e soredut! – il dirit di ducj i citadins di cheste regjon che e ten dongje il Friûl e Triest di esercitâ il dirit ae istruzion ancje tes lenghis ‘altris’ di chest teritori: par furlan, par sloven e par todesc) e il dovê des scuelis di garantîlu. Magari cussì no, a son dirits e soredut dovês che masse dispès a son stâts dineâts, se no piês, intune situazion là che par plui di cualchi insegnant o dirigjent la autonomie scolastiche e je stade dome chê di no meti in vore ‘in autonomie’ la legjislazion di tutele…

Alc di interessant al è saltât fûr ancje ta chês altris relazions, a tacâ de reazion di une part de sale cuant che pe formazion dai insegnants si à fevelât di une verifiche des competencis te lenghe scrite: un altri segnâl di cemût che a son ladis lis robis tai ultins agns…

Tal dopomisdì a son stâts laboratoris di aprofondiment, cuntune grande partecipazion ancje chei, intant che vie pe buinore – propit par fevelâ di scuele, di dirits e di lenghis di une regjon cun plui lenghis – e je saltade fûr un altri viaç chê che e somee jessi la cuistion di fonde.

Cun di fat, se si ten cont dal fat che – e si lu à viodût ancje îr – pal Ministeri pe istruzion la tutele des minorancis daûr de leç 482 dal 1999 e je dome la realizazion di progjetuts, magari ancje in rêt, ma nuie che al vedi une sô continuitât reâl, no je altre strade di fâ che chê che la Regjon si cjapi sù la competence primarie in materie di istruzion, a tacâ de formazion dai insegnants e de ufierte formative, par che e rispieti pardabon ce che a disin i articui 2, 3, 6 e 9 de Costituzion e l’articul 3 dal Statût regjonâl.

Su chest cantin, magari cussì no, la posizion de Zonte regjonâl no somee ancjemò masse clare. In cont dal fat che la lenghe furlane e vedi di jentrâ tes scuelis in maniere serie e concrete, invezit, daûr des declarazions de assessore Panariti, di cualchi ore incà al somee che no vedi plui dubis. Finalmentri.

Standard