Articui di archivi 2011, Atualitât, Politiche, Storie

E dopo de Fieste de Patrie, metìn fûr la bandiere dal Friûl ancje pai 25 di Avrîl, pal Prin e pai 9 di Mai. Ancje tal 2017

Al è za un pôc di timp che no rivìn a scrivi nuie tal nestri blog. Plui di cualchidun che nus lei nus à scrit e nus à domandât il parcè.
Al è dome un banâl (si fâs par mût di dì…) probleme di timp. Cundut che robis di scrivi tai ultins mês a’nd jerin une vorone, no vin rivât a fâlu. Chi di cualchi setemane lis robis a varessin di lâ in miôr e duncje o varessin di tornâ a meti sù cualchi articul gnûf.

Par intant – stant che la cuistion e je simpri di atualitât – o tornìn a cjapâ sù un articul che o vevin scrit za uns pôcs di agns indaûr e che lu vevin tornât a publicâ tal 2016.

Cun di fat, stant che chest an lis celebrazions de Fieste de Patrie a son stadis metudis adun ancjemò cun plui snait e cun plui cussience che tal passât plui resint e che in tancj di lôr, ancjemò plui di prime, ancje par chel, a àn la bandiere dal Friûl, o tornìn a invidâ dutis e ducj a meti fûr la bandiere dal Friûl, pai 25 di Avrîl, pal prin di Mai e pai 9 di Mai.

La Fieste de Liberazion, chê dal lavôr e chê de Europe a son trê fiestis furlanis, pe storie ma ancjemò di plui pe atualitât e pal avignî. E par chel a van memoreadis a la furlane e cu la bandiere dal Friûl.

RESISTENCE, LIBERAZION, EUROPE, FRIÛL. CUANT CHE IL LUNARI AL JUDE A CAPÎ

Prin di Mai, 9 di Mai e 25 di Avrîl: fiestis furlanis

Ogni mês si fâs la lune e ogni dì si impare une. Cun di plui, ogni dì, o almancul ogni setemane, a son un inovâl o une ricorence di memoreâ. Il lunari, massime chest an, al ufrìs une schirie di datis che a son pardabon impuartantis, o ben che cussì a vegnin calcoladis.

La ocasion par fâ fieste e soflâ dentri de trombe de retoriche e ven simpri cjapade sù, in cualchi câs ancje cuntun boreç che al somee in chel stes moment masse esagjerât e masse pôc justificât. Chês par ricuardâ, capî, resonâ, discuti, cognossi e pensâ, invezit, si lis cjape sù con mancul facilitât.
Lu vin viodût plui voltis propit in chescj ultins mês. Su chest sfuei o vin za marcât, un mês indaûr, cemût che ancje pai 3 di Avrîl, moment bon par pandi une braure furlane libare, positive e dinamiche, nol è mancjât cui che al è rivât a esprimi il so “Furlan Pride” dome a sotan vie: poleç e no acuile.
No si podeve pratindi miôr cualchi setemane prime, pai 150 agns de proclamazion dal Ream di Italie: anzit, al à fat maravee che al sedi stât almancul un piçul svôl di acuile, ancje se in realtât al jere chel di un dordul.
Par no fevelâ de memorie platade, e tornade a discuvierzi, de “Joibe Grasse” dal 1511. In chel câs la fieste e je stade fate ma la retoriche e je lade inte direzion contrarie e cussì al è stât dit che al jere un fat storic impuartant ma che no si veve di fâ masse scjas par vie di dute chê violence e dut chel sanc. Propit chest an che a massalicis e becjârs ur vegnin garantididis cetantis celebrazions “in pompa magna”!

Une ocasion che e je buine par ricuardâ, resonâ e fâ fieste, cun sintiment e cence pôre, e rive de zornade di vuê. Propit ai 9 di Mai al cole l’inovâl di chel che al ven calcolât tant che l’inviament concret de costruzion de unitât europeane. In chê dì dal 1950 il Ministri pai afârs forescj dal Stât francês, Robert Schuman, al veve sclarît che cul metisi adun si podeve sghindâ il pericul di gnûfs conflits e creâ lis cundizions par un bon disvilup economic e sociâl e pe incressite de democrazie. Un an plui tart e nassè la Ceca (Comunitât europeane dal Cjarbon e dal Açâl) e di in chê volte, pûr tra contradizions e dificoltâts, o sin rivâts ae Union europeane di cumò. Forsit chest nol è il moment miôr pe Europe, cundut achel cheste dimension, che no pues esisti cence pâs, dirits, unitât e diversitât, e reste chê di riferiment pal Friûl di vuê e par chel di doman. Une Fieste de Europe, duncje, che no pues che jessi ancje fieste furlane.

Il lunari, tai dîs passâts nus à lassât ancje la possibilitât di tornâ a pensâ sul taramot e soredut su la ricostruzion: un model di coesion e partecipazion, soredut par vie che al jere ce che e voleve la int di chenti. Altris datis ancjemò: prin di Mai e 25 di Avrîl. E ancjemò altris ocasions par resonâ in particolâr di lavôr, dirits, paritât, autonomiis, tutele des minorancis, justizie, libertât, solidarietât, Costituzion. Cun passion, cun preocupazion, cun cussience, cun atenzion. Tant a dî: Resistence, Europe, Friûl. Storie e avignî.

EURO FURLAN
eurofurlan@gmail.com

09/05/2011

Advertisements
Standard
Atualitât, Media, Spetacui, Storie, Taramot

A proposit di ‘Orcolat’. Une domande par Simone Cristicchi

O sin ai 15 di Setembar, tal cuarantesin inovâl de seconde scjassade dal Taramot dal 1976.

La ricorince e ven memoreade cun diviersis iniziativis. In particolâr a Glemone, li dal Domo, al vignarà metût in sene Orcolat, il spetacul di Simone Cristicchi dedicât propit al Taramot in Friûl.

Magari cussì no, si cjatìn lontan de Patrie. Par chel no podarìn jessi a Glemone e viodi e scoltâ Orcolat.

Nus displâs une vore, ancje parcè che o vin let che al cjantarà almancul trê cjançons par furlan: une di Dario Zampa, une di Ennio Zampa e une di Giorgio Ferigo.
O varessin propit gust di sintî ce cjançons che al fasarà. E cemût.

Plui in gjenerâl nus plasarès viodi in ce maniere che al tratarà chel argoment… dopo vê let che al è stât un lavoron di contat, di dialic, di condivision e di intimitât cu la int furlane.
Sal fasarìn contâ di cui che usgnot al sarà a Glemone. O magari o varìn altris ocasions par tornâ a viodilu.

Nus plasarès ancje fâi une domande a Cristicchi.

Nus plasarès domandâi, a lui che al à vût scrit che in Istrie «come dice una vecchia canzone, ‘anche le pietre parlano italiano’»
(Gulp! Ancje i claps? E dome par talian? Isal propit sigûr?): in ce lenghis pensial che a fevelavin – e che a fevelin – no i claps, lis pieris, i modons o i rudinaçs, ma lis personis di chenti?

Post scriptum.
Nus àn contât che chê altre dì par television, in cont des cjançons di Dario Zampa, Ennio Zampa e Giorgio Ferigo, Cristicchi al à declarât che tal so spetacul a son ancje parts «in dialetto».

Eh??? Cemût??? Dialetto???!!!!?????

Che al vedi in cualchi maniere za rispuindût ae nestre domande???

Ancjemò une altre pontade di «Mamma, ho perso il friulano» ???

Standard
Atualitât, Culture, Friulanofobie, Par ridi (?), Storie

Se la Universitât dal Friûl e mostre di no savê dulà (e ce) che al è il Friûl

Chês telenovelas, che si podarès dâur il titul di «Mamma, ho perso il Friuli» e «Mamma, ho perso il friulano» e che o cognossìn avonde ben su chescj schermis za di un pôc di timp, si insiorin di altris gnovis pontadis.

Di une o scrivarìn plui indenant. Chê altre le vin discuvierte inte suaze di Friuli Doc, là che sabide ai 10 di Setembar e je stade fate la sô presentazion.

La iniziative Si clame Inmyland. Indagine su un friulano al di sopra di ogni sospetto e e varès di jessi un scandai su lis ideis che lis personis che a vivin in Friûl a àn di se e de lôr tiere.

Daûr di ce che o vevin scoltât, la ricercje, metude adun dal Laboratori di Sociologjie dal Dipartiment di Lenghis e leteraturis, comunicazion, formazion e societât de Universitât dal Friûl, nus someave une vore interessante.
Chê stesse impression positive e vignive confermade dal sottitul, cun chel riferiment esplicit al mitic film di Elio Petri cun protagonist Gian Maria Volontè, che tra l’altri al fâs vignî daurman la voie di cjantuçâ il teme principâl de sô bande sonore componude di Ennio Morricone.
Però al jere alc che no nus convinceve: il titul nol prometeve nuie di bon.

Magari cussì no, cul savê di dopo, nus tocje dî che chel al jere just il spieli di ce che o varessin cjatât, cul lâ sul sît .

Cun di fat, o vevin gole di viodi, di cognossi e di capî. O vin cjatât une biele homepage, ma al jere daurman alc che nol leve.

Forsit o sin masse esigjents o fintremai sofisticâts, ma o pensìn che se e je une robe che e tocje il Friûl chê e varès di jessi ancje par furlan, par sloven e par todesc. Soredut se e je une robe che e ven fate di chel Ateneu che al è stât metût dongje cun chê di «di contribuire al progresso civile, sociale e alla rinascita economica del Friuli e di divenire organico strumento di sviluppo e di rinnovamento dei filoni originali della cultura, della lingua, delle tradizioni e della storia del Friuli».

E impen: nuie ce fâ, compagn di milante altris voltis.

Cundut achel, o sin lâts dilunc e o vin viert la pagjine dal Cuistionari, là che o vin cjatade la prime domande.
E je la classiche domandute par tacâ – «Quando sei in Friuli stai bene?» – là che lis pussibilitâts di rispueste son dome che dôs: o sì o no.

Dopo vê rispuindût di sì, o sin lâts indenant e o vin cjatât la seconde e in chel moment o vin vût… pôc ben.

Parcè? Parcè che la domande e je cheste:
«Secondo te, il Friuli coincide con la provincia di Udine?»
(E za li:… no comment!)

E chestis a son lis rispuestis pussibilis:
«Sì
Sì, ad eccezione delle Alpi Carniche e delle Alpi Giulie
No, include anche parte della provincia di Pordenone
No, include anche parte della provincia di Gorizia
No, include sia parti della provincia di Pordenone che di Gorizia
No, include tutta la regione
No, include tutta la regione e anche altri territori (ad esempio Sappada)»
.

Al è evident che al mancje alc. Prin di dut no je – tra lis opzions – la rispueste che e varès di jessi: la definizion di Friûl, in tiermins obietîfs, storics e gjeografics, daûr di une tradizion lungjonone, di duments e di studis, che i studiâts de Universitât a varessin di cognossi. Ven a dî che il Friûl al è chel toc di Europe e di mont che al sta tra lis Alps e l’Adriatic, la Livence e il Timau e che al cjape dentri lis provinciis di Udin, di Gurize, di Pordenon, il mandament di Puart e Sapade.

Cun di plui nol è nancje un spazi in blanc par podê scrivi chê rispueste o altris ancjemò.

Cussì, stant che, se no si rispuint no si va indenant, in chês cundizions non podevin rispuindi in nissune maniere e duncje o vin scugnût molâ, cul marum di vê sperimentât «one more time» (dit par inglês…) che la Universitât dal Friûl e mostre di no savê dulà (e ce) che al è il Friûl.

Magari cussì no, si podarès calcolâle tant che la discuvierte de aghe cjalde…

Massime se si ten cont che tra chei che i àn lavorât daûr al è ancje cui che timp indaûr al scriveve, cun grande cunvizion, che i Nazionalisti friulani a jerin nazionaliscj furlans cence inacuarzisi che a son dome nazionaliscj «italianissimi» in Friûl.

I vûl studiât e i vûl sa(v)ût. E no dome par fâ scliçôts.

Standard
Atualitât, Storie

26 di Lui. Ricuardâ? Sì. Fâ fieste? Nancje fevelâ

Vuê o sin ai 26 di Lui, inovâl dai 26 di Lui dal 1866.

Ve chi un piçul ricuart di chei timps, un toc de letare scrite di Quintino Sella (commissari dal re di Italie pal Friûl) al president dal Consei dai Ministris, Bettino Ricasoli:

“Udine, 11 ottobre 1866
Signor Barone. Già le feci sapere come la notizia della pace sia stata dapprima accolta con freddezza in Udine e dintorni.
(…)
Indi non vi era la più piccola traccia di manifestazione, come se si fosse trattato di una pace fra la China ed il Giappone.
Questa freddezza mi inquietava, giacché mi dava ragion di temere che il plebiscito riuscisse svogliato e poco frequentato…”

Se no vevin fat fieste in chê volte, parcè varessino di fâ fieste cumò?

Standard
Atualitât, Media, Politiche, Storie

La Fieste de Republiche a Udin e il “chimerico bronzeo cavallo”

Îr in dut il Stât talian o vin fat fieste. E o vin fat ben, parcè che e jere une zornade impuartante.
Al jere il setantesim inovâl des elezions pe Assemblee Costituente e dal Referendum su la forme dal Stât (Republiche o Monarchie).

Al è propit par chel che chê date e je stade sielzude tant che Fieste de Republiche.

Dongje dai 25 di Avrîl, chê di îr le calcolìn tant che la fieste plui impuartante pai citadins dal Stât talian. O marchìn la peraule “citadins”, cun chê di marcâ che e je une fieste “civiche”: di citadins, cun dirits e cun dovês; di personis che a vivin adun e che il lôr vivi cun chei altris al è fondât suntun sisteme di principis e di normis che a regolin e a judin chel stes vivi adun, la convivence civîl.

Chê dai 2 di Jugn e je la Fieste de Republiche. Di chê Republiche che e je nassude de Resistence cuintri dal nazisim e dal fassisim. Di chê Republiche che si declare «fondade sul lavôr». Di chê Republiche che «ripudia la guerra». Di chê Republiche che te sô Costituzion, a tacâ dai siei principis di fonde, e marche a fuart la impuartance de paritât, de avualiance, de democrazie, des autonomiis e de tutele des minorancis linguistichis.

Ben! Tes setemanis passadis la citât di Udin si à preparade pe Fieste de Republiche intune maniere che si pues definîle pardabon particolâr…

Cun di fat, fûr e dentri dal Consei comunâl si à fevelât – e si à votât – in cont di statuis e di res. Cuntun vôt traversâl – e par fortune ancje cun cualchi posizion critiche – in Comun a àn decidût che la statue di Vittorio Emanuele II, che si cjate tai zardins Ricasoli, e à di jessi metude in Place dai Grans – Place XX di Setembar.
Parcè? Ve chi lis motivazions: parcè che chê place e je masse vueide e si à di jemplâle cun alc; parcè che il monument di chel che cualchidun lu clame (ancjemò??) «padre della patria» (cuâl? Di cui?) e che si dîs che al sedi stât soredut pari naturâl di diviers di lôr, in bande dai siei fîs e fiastris uficiâi, no pues jessi lassade alì che e je cumò; parcè che al covente rinfuartî “il sentimento patriottico”.

Nus somein argomentazions discutibilis e salacor ancje piês.
In cont de prime nus saltin fûr un dôs domandis. No saressial il câs di jemplâ lis placis di int, che si cjate adun, che si da dongje, che e discor, che e resone, che e fâs fieste? E duncje no saressial il câs di creâ situazions di socialitât e magari di creâ ancje lis cundizions urbanistichis e architetonichis par che la int si dedi dongje, ancje fûr di une logjiche dome di consum?

Rispiet a chês altris, nus vignarès di metilis in relazion cu lis notizionis sparadis dal cuotidian di chenti in cont dai spaçadôrs di droghe che a son te capitâl dal Friûl. Cence jentrâ masse in detai – in particolâr su lis droghis e su ce droghis che a son… – o pensìn che se a son i spaçadôrs a saran ancje i consumadôrs, E ce che o vin sintût e let nus al conferme a plen.

Se di no, e se no tignin cont dal dal fat che in gjenerâl in Friûl no sin dome produtôrs ma ancje consumadôrs di vin, di bire e di sgnape, al somee pardabon dificil capî il parcè di dut chest spiticâsi in cont de statue dal cussì clamât “re galantuomo», in cont dal «sentimento patriottico”, in cont de (presumude) necessitât di spostâ la sô statue tal centri de citât e fintremai di meti il «chimerico bronzeo cavallo» no in Place dai Grans ma in Place Libertât, cemût che al volarès cualchidun altri ancjemò.

In chescj câs la domande e je «Chi è il pusher?», impen che la esortazion juste e je «Mole il bevi», parcè che al è facil passâ in curt dal “bronzeo” al “sbronzo”.
O ben, paradossalmentri, si podarès dî che dute cheste ferbince “patriottica” e “sabauda” e sedi une forme di omaç al Friûl, ai patiments di cheste tiere par vie des vueris dai res di Savoia, al so jessi plurâl par storiis, lenghis, culturis e identitâts e al fat che, in chê che tal 1946 e jere la provincie di Udin, passe il 63% di lôr a vevin votât a pro de Republiche…

Cun rispiet pe storie – là che, ben o mâl, a son oviementri ancje Vittorio Emanuele II e la sô statue – o pensìn che chel monument al stedi ben là che al è, ta chel Zardin che al è dedicât a Ricasoli, che al va benon par memoreâ i prins agns dal Ream di Italie, ancje chei cuant che nissune part dal Friûl a’ndi faseve ancjemò part.

Al è stât ancje cui che al à comentât cheste discussion cul fevelâ di rivocs (neo)monarchics.
Al pues stâi. In cualsisedi maniere nus somee soredut une monade, in chel istès gnove e vecje.

Standard
Atualitât, Politiche, Storie

6 di Mai, une ocasion par cjapâ cussience e par palesâle cun dignitât e cence sotanisims

Vuê al cole il cuarantesim inovâl dai 6 di Mai dal 1976, di chê gnot segnade des scjassadis violentis dal taramont, de distruzion, de muart, de disperazion.

In tancj di lôr in chescj dîs a scrivin, a contin, a ricuardin, a pensin a ce che al è stât in chê gnot e a ce che al è vignût dopo: la muart, la distruzion, il corot, la pôre, ma ancje la cussience, la dignitât e la volontât di tornâ a tirâsi sù e di tornâ a fâ sù ce che al jere stât sdrumât, scjassât, disfat.

In tancj di lôr a scrivin, a contin, a ricuardin e a pensin robis une vore bielis e profondis. Cun dut che si dîs “repetita iuvant” o vin miôr di no tornâ a ripeti, magari in maniere mancul fuarte e crodibile, robis che su chei fats e su chel argoment a son za stadis scritis e ditis cul cûr e cul sintiment. Lis scoltìn e lis leìn cun rispiet, cun atenzion, cun amirazion, cun condivision e salacor cuntune cierte braùre.

Cundut achel, a cjalâ cemût che e cor la a machine des celebrazions, magari cussì no, si à la impression che e sedi ancje une vore di retoriche vueide e fofe, cun personaçs che di chê a son autentics professioniscj e che si jemplin la bocje di orcolats in chê stesse maniere che in altris ocasions si le àn jemplade di fufignis e macacadis (e cul pericul di stramudâ une robe serie, grande, teribile e impuartantone intune ocasion di autopromozion, intun spetacul clopadiç, intune overdose di autoreferenzialitât e di lûcs comuns).

La zornade di di vuê e ufrìs une ocasion grandonone par no pierdi di viste la impuartance di chescj dîs di memorie e di riflession e duncje par no sbrissâ te (auto)celebrazion vueite.
Chi di pôc al rive in Friûl il president de Republiche Taliane, Sergio Mattarella. Al sarès ben che al mancul cualchidun dai sindics, dai sorestants regjonâi e di chês altris personalitâts che lu incuintraran, a Glemone, a Vençon, a Udin o inaltrò, i dessin il lôr benvignût ancje par furlan e tes altris lenghis “altris” dal Friûl.

E sarès une maniere di palesâ cussience e dignitât. E sarès une ocasion par palesâ – e par domandâ – rispiet.

Rivaraial a fâlu cualchidun? O sperìn propit di sì, ancje parcè che nol è cussì dificil. Al jere za sucedût cualchi an indaûr, e di chel o vevin scrit, cemût che podês lei achì da pît.

FORME E SOSTANCE. IL “BEAU GESTE” DI SHAURLI CUN NAPOLITANO: UNE OASI TAL DESERT?

Ats simbolics, documents e «cjacaris e distintîf»

«Sâr President, benvignût in Friûl. Gospod Predsednik, dobrodošli v Furlaniji. Sehr geehrter Herr Präsident, willkommen in Friaul». Il President de Republiche Taliane al è vignût in Friûl e lu àn saludât in tancj di lôr: la int e i sorestants. Nol sarès stât mâl che cualchidune des autoritâts di chenti e ves dât il benvignût ae cjarie plui alte dal Stât ancje par furlan, par sloven e par todesc.
Al varès parût bon sei par pandi in maniere plui cjalde e plui rapresentative il bon acèt pal ospit de bande de nestre int, sei par fâi onôr ae persone e ae istituzion e mostrâ che la plui part di nô – lu confermin ancje i scandais fats in chescj ultins agns cul jutori de aministrazion regjonâl – o sin di lenghe furlane, di lenghe slovene o di lenghe todescje e cun chest o volin jessi citadins talians cun dignitât e dirits compagns di chei altris, daûr di ce che e dîs la Costituzion, a tacâ dai principis di fonde che si cjatin tai siei articui 2, 3 e 6. E ricuardâ ancje che cheste specificitât, in dì di vuê ancjemò di plui che tal passât, e je la fonde de autonomie speciâl de regjon Friûl-VJ, intant che par chest la nestre int e à vût patît a fuart la ditature fassiste ma e à ancje scombatût, cun fuarce e cun soference particolârs, pe liberazion e pe costruzion de Republiche che vuê Giorgio Napolitano al è il so president.

Magari cussì no, a Udin, a Glemone, a Dieç, a Cjargnà e a Pordenon, nissun dai sorestants al à rivât a fâ un pensament e duncje une azion di cheste fate. Par fortune, impen, a Faedis al è sucedût. Cun di fat, il sindic al à ricuardât, doprant ancje furlan e sloven, la specificitât dal so Comun (e o pensìn che se al fos stât sindic di Tarvis o Malborghet, al varès saludât ancje par todesc).
Cristiano Shaurli al à fat ancje alc di plui, sei cul so discors, coret te analisi storiche e te prospetive, sei cul fat che i à consegnât a Napolitano un document, prontât dal Comitât/Odbor/Komitaat/Comitato 482, che al ten dongje associazions e altris entitâts des minorancis linguistichis furlane, slovene e gjermaniche dal Friûl. Te sô letare vierte, il Comitât al domande l’intervent dal president, tant che “garant de Costituzion”, par che a vegnin metudis in vore ad in plen lis leçs di tutele e duncje par che a vegnin garantîts pardabon chei dirits ricognossûts in tiermin formâi de Leç fondamentâl de Republiche e di ches altris normis specifichis, cemût che a domandin ancje in Europe.

Chel di Faedis al è un at piçul, ma al devente grandonon denant dal cidinôr e de cjacaris di tancj di lôr.
In chescj dîs, par esempli, al è tornât a saltâ fûr il câs de precarietât di Onde Furlane, che e fâs un servizi public unic tal cjamp de culture e de informazion par furlan e par chest e varès di vê un jutori garantît de bande des istituzions e no lu à.
Un câs che al mostre che ancje chi nô no mancjin chei che a son dome «cjacaris e distintîf», soredut se il distintîf al è chel de acuile dal Friûl.

EURO FURLAN
eurofurlan@gmail.com

01/06/2012

Standard
Articui 2011, Atualitât, Politiche, Storie

E dopo de Fieste de Patrie, metìn fûr la bandiere dal Friûl ancje pai 25 di Avrîl, pal Prin e pai 9 di Mai

Lu vevin scrit za uns pôcs di agns indaûr e o tornìn a publicâlu cumò, tal 2016, dopo de Fieste de Patrie e pôcs dîs prime de Fieste de Liberazion. Ve chi un articul dal 2011 che al tocje i 25 di Avrîl, il prin di Mai e i 9 di Mai.
Trê fiestis furlanis, pe storie ma ancjemò di plui pe atualitât e pal avignî. Zornadis che si varès di meti fûr la bandiere dal Friûl. Cence dismenteâ nancje il cuarantesim inovâl dal taramot dal 1976

RESISTENCE, LIBERAZION, EUROPE, FRIÛL. CUANT CHE IL LUNARI AL JUDE A CAPÎ

Prin di Mai, 9 di Mai e 25 di Avrîl: fiestis furlanis

Ogni mês si fâs la lune e ogni dì si impare une. Cun di plui, ogni dì, o almancul ogni setemane, a son un inovâl o une ricorence di memoreâ. Il lunari, massime chest an, al ufrìs une schirie di datis che a son pardabon impuartantis, o ben che cussì a vegnin calcoladis.

La ocasion par fâ fieste e soflâ dentri de trombe de retoriche e ven simpri cjapade sù, in cualchi câs ancje cuntun boreç che al somee in chel stes moment masse esagjerât e masse pôc justificât. Chês par ricuardâ, capî, resonâ, discuti, cognossi e pensâ, invezit, si lis cjape sù con mancul facilitât.
Lu vin viodût plui voltis propit in chescj ultins mês. Su chest sfuei o vin za marcât, un mês indaûr, cemût che ancje pai 3 di Avrîl, moment bon par pandi une braure furlane libare, positive e dinamiche, nol è mancjât cui che al è rivât a esprimi il so “Furlan Pride” dome a sotan vie: poleç e no acuile.
No si podeve pratindi miôr cualchi setemane prime, pai 150 agns de proclamazion dal Ream di Italie: anzit, al à fat maravee che al sedi stât almancul un piçul svôl di acuile, ancje se in realtât al jere chel di un dordul.
Par no fevelâ de memorie platade, e tornade a discuvierzi, de “Joibe Grasse” dal 1511. In chel câs la fieste e je stade fate ma la retoriche e je lade inte direzion contrarie e cussì al è stât dit che al jere un fat storic impuartant ma che no si veve di fâ masse scjas par vie di dute chê violence e dut chel sanc. Propit chest an che a massalicis e becjârs ur vegnin garantididis cetantis celebrazions “in pompa magna”!

Une ocasion che e je buine par ricuardâ, resonâ e fâ fieste, cun sintiment e cence pôre, e rive de zornade di vuê. Propit ai 9 di Mai al cole l’inovâl di chel che al ven calcolât tant che l’inviament concret de costruzion de unitât europeane. In chê dì dal 1950 il Ministri pai afârs forescj dal Stât francês, Robert Schuman, al veve sclarît che cul metisi adun si podeve sghindâ il pericul di gnûfs conflits e creâ lis cundizions par un bon disvilup economic e sociâl e pe incressite de democrazie. Un an plui tart e nassè la Ceca (Comunitât europeane dal Cjarbon e dal Açâl) e di in chê volte, pûr tra contradizions e dificoltâts, o sin rivâts ae Union europeane di cumò. Forsit chest nol è il moment miôr pe Europe, cundut achel cheste dimension, che no pues esisti cence pâs, dirits, unitât e diversitât, e reste chê di riferiment pal Friûl di vuê e par chel di doman. Une Fieste de Europe, duncje, che no pues che jessi ancje fieste furlane.

Il lunari, tai dîs passâts nus à lassât ancje la possibilitât di tornâ a pensâ sul taramot e soredut su la ricostruzion: un model di coesion e partecipazion, soredut par vie che al jere ce che e voleve la int di chenti. Altris datis ancjemò: prin di Mai e 25 di Avrîl. E ancjemò altris ocasions par resonâ in particolâr di lavôr, dirits, paritât, autonomiis, tutele des minorancis, justizie, libertât, solidarietât, Costituzion. Cun passion, cun preocupazion, cun cussience, cun atenzion. Tant a dî: Resistence, Europe, Friûl. Storie e avignî.

EURO FURLAN
eurofurlan@gmail.com

09/05/2011

Standard