Atualitât, Dome pal blog, Friulanofobie

Simpri plui isteric, simpri plui mone

Pôcs dîs indaûr o vin memoreât ta chest blog
la Zornade internazionâl de lenghe mari.

E je stade la ocasion par ricuardâ lis origjinis e lis motivazions di cheste ricorence e par marcâ il fat che pai dirits linguistics a i vûl scombatût ducj i dîs.

Ai dirits e al pluralisim linguistic, in particolâr tal Stât talian, ur ven fat cuintri cuntun ategjament che al ven definît za di cualchidun tant che «monolinguismo isterico».

Si cjatìn ad in plen in cunvigne cun cheste definizion, massime denant de situazion di chescj dîs.
Il câs, za ricuardât, de mestre che ur domande ai gjenitôrs di une frutine di fevelâi dome par talian e no par furlan e par catalan, al è emblematic. Ma cui che al è cuintri dai ûs publics de lenghe furlane e dal so ûs e dal so insegnament a scuele no disial che il furlan al va ben dome in cjase, in famee?
E alore? E je une biele prove di isterisim e di schizofrenie.
Ce disêso?

No je la uniche. Juste chê altre dì, sul sît internet di un cuotidian di chenti, al saltave fûr un sondaç la che si domandave se al fos just o mancul insegnâ il furlan ai fruts.
Denant di une domande di cheste fate al sarès stât di spietâsi o trê pussibilitâts di rispueste une vore viertis e gjenerichis («sì», «no», «non so») o ben une rieste siore di rispuestis motivadis e articoladis. Impen lis opzions a jerin trê, avonde sieradis e une vore cjamadis di prejudizis e di indreçaments.
Al someave chel spot di un innomenât detersîf, là che si domandave a la int se e veve miôr doi fustins di un prodot cence marcje e implicitementri di valôr scjars o un di chê marcje innomenade.

Cun di fat lis opzions di rispueste a jerin: «a) Sì, la cultura e la lingua delle proprie radici devono essere coltivate e insegnate alle nuove generazioni; b) No, in un mondo globale è meglio privilegiare l’insegnamento di altre lingue utili all’inserimento nel mondo del lavoro; c) Non ho un’opinione precisa sull’argomento proposto».
Ven a dî: di une bande la lenghe “vecje”, “ des lidrîs”; di chê altre lis «lingue utili» (e duncje il furlan nol coventarès, al sarès di masse e par di bant). E duncje par cui che – al è il nestri câs – al pense che la lenghe furlane e sedi un dirit, un patrimoni e une oportunitât «utile», no jere la pussibilitât di rispuindi. Par no fevelâ dal fat che e tornave a saltâ fûr la contraposizion tra furlan e inglês.

A proposit di inglês e di cetant che al è impuartant cognossilu, no si pues dismenteâ che in tantis universitâts dal Stât talian a àn tacât di un pôc di timp a fâ lezion in cheste lenghe.
In cualchi câs al è saltât fûr che i professôrs i àn fat cuintri a cheste decision e a son stâts ricors e ancje sentencis in difese dal talian cuintri de presumude prepotence dal inglês
e de violazion dai dirits e des libertâts di lenghe sei dai arlêfs che dai docents.

La cuistion e je interessante e di chê a’nt saltin fûr altris dôs.
Di une bande, che a son fîs e fiastris tra i dirits e tra lis lenghis.
Di chê altre, che – se i criteris a son chescj – e pues esisti simpri une lenghe che e je plui “utile”, plui “internazionâl”, plui “moderne” de tô…

Il «monalinguismo» al è simpri plui isteric e simpri plui mone.

PS. A proposit di dirits: vuê e je une zornade particolâr.
E alore: Buine Zornade Furlane dai Dirits a ducj!

Advertisements
Standard
Atualitât, Dome pal blog, Politiche

«Quanto è bbuono ‘o cafè…»

Formalmentri al riscje za di deventâ “ex”,
ma di cemût che si môf al mostre di volê jessi confermât ancje de bande dal guvier Renzi tant che president de Comission paritetiche tra Stât e Regjon Friûl-VJ.

Daûr di ce che si lei sui gjornâi e in rêt, Riccardo Illy al à tornât a fâur sunâ la svearine ai “nestris” sorestants regjonâi.

Lu vevin notât za cualchi timp indaûr,
ma al merete tornât a dîlu: «Quanto è bbuono ‘o cafè».

Standard
Atualitât, Dome pal blog, Friulanofobie

Zornade internazionâl de lenghe mari. Ocjo al «monalinguismo»!

A tacâ dal 2000 chê dai 21 di Fevrâr e je la Zornade internazionâl de lenghe mari.

Cheste ricorence e je stade proclamade de bande de Conference Gjenerâl de UNESCO ae fin dal 1999. Il so intindiment al è chel di promovi il valôr de diversitât linguistiche e il dirit di doprâ la lenghe proprie.

La impuartance de cuistion e salte fûr ad in plen de date sielzude de UNESCO, a pro des lenghis e dal dirit ae lenghe. Cun di fat, ai 21 di Fevrâr al cole l’inovâl di une grande manifestazion fate tal 1952 dai students de Universitât di Dhaka a pro dal ricognossiment de lenghe bengalese (‘bangla’) tant che lenghe uficiâl.
In chê dì diviers manifestants a forin copâts de bande des fuarcis di polizie dal Pakistan, che in chê volte al cjapave dentri ancje il Bangladesh, deventât indipendent dome tal 1971.

Magari cussì no, si scuen scombati ogni dì par chest dirit.
E ogni dì a vegnin fats indenant ostacui e prejudizis di ogni sorte cuintri di chest dirit e plui in gjenerâl cuintri dal pluralisim linguistic.

Chest al sucêt ancje – e in maniere particolâr – in Friûl.

Une testemoneance di cheste situazion – che e fâs vignî i sgrisui, pal nivel di ignorance e di arogrance e che ur fâs cuintri no dome ai dirits e al plurilinguisim ma ancje al bon sens – e je chê
che si pues lei su Facebook, achì. O sin solidaris cun cheste famee.

Par chest ategjament, une vore presint tal Stât talian, e je stade cjatade ancje une definizion.
Al ven clamât «monolinguismo isterico» e al cjape sù diviersis formis, cemût che si lei achì, achì e achì.
Un fenomen che al è simpri plui «isterico».
Plui che «monolinguismo», al è «monalinguismo».

Standard
Atualitât, Dome pal blog, Musiche

The Great Rock’n’Roll Swindle… ancjemò plui grant

An Englishman in Friûl. Il passaç di Glen Matlock tai dîs passâts a Pordenon e a Udin al à vût un ciert rivoc mediatic.
Lis sôs comparsadis tra scuelis e ambients, conferencis e concierts, a fevelâ e a cjantâ, a son stadis contadis dai media di chenti, soredut chei plui tradizionâi e gjeneraliscj, tant che aparizions mistichis.
Matlock, che al figure tra i fondadôrs dai Sex Pistols, al è stât piturât tant che un guru e un ‘mêtre a penser’ dal rock e dal punk, intindût – no si capìs masse ben – se tant che mode, gjenar musicâl, tindince culturâl o ategjament viers de vite e dal mont.

Il so curriculum tant che musicist al è par sigûr significatîf – The Strand, Sex Pistols, The Rich Boys, colaborazions cun Iggy Pop e partecipazions a une schirie di grups, di progjets e di regjistrazions – però al è però.

Cun di fat, la impression e je chê che cualchidun al vedi vendût ator tant che diamants tocs di plastiche o di veri.
La figure di Matlock tai Sex Pistols no je par sigûr chê plui significative. Anzit, al somee che nol fos masse ben volût, in particolâr di Steve Jones e di Johnny Rotten, che lu vevin parât vie dal grup…a pidadis tal cûl.

Par chest, che e sedi une operazion di marketing o une sorte di riabilitazion o di svindic dal puar Matlock (che pal fat di jessi stât parât vie e di jessi stât calcolât pôc dentri e fûr de band no si pues che vê almancul un tic di simpatie e di solidarietât par lui), par sigûr al ven di pensâ che il ‘plui grant imbroi dal rock’n’roll’ nol sedi ancjemò finît. E che al sedi ancjemò daûr a cressi.

Standard
Articui 2014, Atualitât

Une candidature falide, une candidature falade

Al jere za un pôc di timp che o vevin chê di scrivi alc in cont de candidature di «Venezia con il Nordest capitale europea della cultura 2019». La ocasion e je saltade fûr dome cumò, cun chest articul publicât vuê sul Quotidiano.

Cemût che o podês lei, si fevele di chei che par nestri cont a son i limits di fonde di chê inziative. Al è alc che al vâl ancje par altris iniziativis, che a mantegnin chel stes ategjament e chê stesse vision, che in teorie e in pratiche a dismentein il Friûl o lu dinein dal dut.
Buine leture.

2019. NUIE CE FÂ PAR VIGNESIE E PES REGJONS DAL “NORDEST” «CAPITÂL EUROPEANE DE CULTURE»

Une candidature falide, une candidature falade

Si visaiso de candidature di «Venezia con il Nordest capitale europea della cultura 2019»? Tra la fin dal 2010 e l’imprin dal 2011 i rapresentants istituzionâi des Regjons dal Venit e dal Friûl-VJ, des Provinciis autonomis di Trent e di Bolzan e dal Comun e de Provincie di Vignesie a vevin firmât un protocol di intese di pueste e po a vevin metût adun un comitât specific, che di in chê volte al à tacât a inmaneâ une schirie di iniziativis par sapontâ chê candidature. Par sù par jù doi agns, a son stadis fatis centantis azions di informazion e promozion, sei a nivel teritoriâl che cjalant difûr e su la candidature a àn investît un pôcs ducj i ents teritoriâi des trê regjons di chel che a clamin “Nordest”.

Il percors al è stât imbastît cun mistîr, cun mieç potents e cun tancj events e soredut cuntun grant lavôr par ce che al tocje la comunicazion. Cun di fat, ducj i apontaments e dutis chês altris azions metudis adun dal comitât promotôr e dai siei orghins diretîfs e operatîfs a àn gjoldût simpri di un rivoc mediatic fuart e positîf. Tra il 2011 e il 2013 stampe, radios, televisions e gnûfs media, tal dâ notizie di ognidun di chei events e incuintris plui o mancul publics, a vevin marcât cuntune vôs uniche lis «sorti progressive» de candidature, la sô validitât e cuasit ancje la sigurece di sucès. Impen e je lade a finî intune altre maniere, stant che ai 15 di Novembar, pocjis oris dopo de audizion a Rome de delagazion dal comitât promotôr, al è saltât fûr che la candidature e vignive boçade aes preselezions.

A pet di dut il scjas mediatic des diviersis fasis de promozion de candidature, chê gnove clamorose dai 15 e dai 16 di Novembar dal an passât e je passade une vore a cidin. E al è un pecjât, parcè che lis motivazions fatis indenant de comission di valutazion a meretin cognossudis e su chês al merete fat un pensament.
La candidature e je stade fermade par un probleme di abondance, stant che il riferiment a une citât cun trê regjons aministrativis e almancul cinc ambits teritoriâi al leve une vore innà des dimensions de “citât capitâl”.
La cuistion no je dome formâl, cemût che a àn marcât i “supporters” de candidature, ma e à une valence sostanziâl, in tiermins no dome di abondance ma ancje di mancjance, in particolâr cuntune cjaladure furlane.

Chest al è par vie che cun dut des declarazions in cont di pluralisim teritoriâl, culturâl e linguistic – si cjatave ancje un riferiment al fat che ta chestis tieris a vivin dongje «italiani, tedeschi, ladini, friulani, sloveni…» – masse dispès te comunicazion e saltave fûr une idee vecje e pôc rispietose dal pluralisim e de realtât. La stesse che si viôt in ciertis propuestis di riorganizazion des regjons dal Stât talian che a zirin in chescj dîs: chê des “Venezie”, dal “Triveneto” e dal “Nordest” «uno e trino», là che nol è puest par chê part de Europe e dal mont che si clame Friûl.

EURO FURLAN
eurofurlan@gmail.com

14/02/2014

Standard
Dome pal blog, Politiche

Un piçul pas de Zonte regjonâl, un salt indenant pe lenghe furlane

Un piçul pas de Zonte regjonâl. O magari ancje une lungje traviersade tal desert, stant che i à metût nûf mês, nancje che al ves vût di nassi un frut…
Par sigûr un salt indenant pe lenghe furlane.
Di ce fevelìno? Dal fat che finalmentri, ai 24 di Zenâr stâts, la Zonte e à fat buine la delibare in cont de composizion dal gnûf consei di aministrazion de ARLeF, la Agjenzie Regjonâl pe Lenghe Furlane.
Lorenzo Fabbro al è stât nomenât president e tal cda a son ancje Roberto Dapit, Walter Tomada, Geremia Gomboso e Alessandra Burelli.

E jere ore. E je une robe che e coventave fate e che si spietavisi che e vignìs fate daurman.
Se il guvier regjonâl al ves cjapât sù cheste iniziative za in chê volte o varessin sparagnât un pôc di timp e o varessin fat di mancul di diviersis declarazions fenomenâls
e di altris çavariaments publics e privâts, che a son il spieli de situazion che e diven di chê mancjance di une politiche linguistiche di sest che o vin patît tai ultins agns.

Forsit e je vere, cemût che al dîs Lorenzo Fabbro in cheste interviste
saltade fûr sul Novi Matajur, che nol è mai masse tart e che i sorestants di Triest i an pensât parsore tant ma ae fin a àn rivât a fâ ben.
In efiets, de sielte dal president e dal cda e salte fûr une rispueste di sest ae domande di cambiament fate indenant di cui che i ten ae lenghe e ai dirits linguistics. Une rispueste che e je in linie ancje cun chel impegn che al jere stât pandût ancjemò prime des elezions de bande di chê che e je deventade la maiorance in Consei regjonâl.

E soredut Fabbro al mostre di vê lis ideis claris in cont des tantis robis che a coventin fatis, cuntune vision strategjiche e cuntun ategjament une vore concret.

Al è pardabon cetant ce fâ par che la lenghe furlane e tachi finalmentri a gjavâsi fûr di chel pantan là che e jere stade butade tai ultins agns.

Ce che al nas al devente. Sperìn in ben.

Standard