Eri così Favino…. proprio un amore di Balillino?

O vin une vore di stime e di simpatie pal atôr talian Pierfrancesco Favino. O pensìn che al sedi un brâf professionist e ancje une persone di sest.
Cundut achel, no podìn fâ di mancul di palesâ cualchi perplessitât dopo vê let un pâr di sôs intervistis (par esempli cheste), fatis intai ultins dîs in ocasion de presentazion dal gnûf cine che di chel al è il protagonist, Il comandante.

Magari lis sôs intenzion a jerin buinis – mostrâ atenzion e solidarietât par chei che par rivâ in Europe de Afriche e de Asie a riscjin di murî in mâr; marcâ che si à di rispietâ la leç dal mâr e di dâur socors a cui che al riscje di murî tal Mediterani; palesâ une posizion a pro des organizazions di volontaris che chel socors lu dan ducj i dîs, cundut di une normative (chê taliane…) e une politiche (chê dal guvier talian….) che i fâs cuintri ae lôr azion – però lis sôs peraulis, strucadis tal titul dal articul di Repubblica «Aiutare chi è in difficoltà, questo significa essere italiani» nus somein pardabon fûr scuare.
Cun di fat «aiutare chi è in difficoltà» al vûl dî jessi personis, jessi umans. Nol vûl dî jessi talians…

Espressions tant che chês dopradis di Favino a ricuardin un tic masse chê solfe dai «italiani brava gente» o ben dal «primato nazionale degli italiani».
O podìn – e o volìn – pensâ che no jere chê la sô intenzion, ma il risultât al è chel.
Al è pôc ce dî.

Favino si presente tant che un che al confont la umanitât – che e je universâl: e je di ducj, ancje se no ducj le metin in pratiche in maniere compagne… – cu la italianitât e no si vise che tal mont no son dome i talians. E di ce che al à declarât al salte fûr che al è un che al pense (o che al mostre di pensâ) che la umanitât e sedi une componente esclusive de italianitât e no che ancje i talians a son (o almancul a varessin di jessi) umans.

Magari al è dome che o sin masse sensibii viers di cierts argoments, ma al somee pardabon dificil dineâ il fat che chê espression e pant un nazionalisim ancje pluitost esaltât. Un nazionalisim che al ven condividût di tancj di lôr, tacant di chei gjornaliscj che a àn fat chês intervistis, che no àn vût cûr di domandâi se al jere pardabon sigûr che chê e fos une escusive de italianitât. Al somee che chê dal «soccorso come valore fondante dell’identità italiana» e sedi une sorte di leitmotiv, cemût che si lei ancje inaltrò, dulà che la atenzion e je pontade dome in part sul «soccorso» intant che la prioritât e chê de «identità italiana».

No si fale se si pense che chê dai «italiani brava gente» o ben dal «primato nazionale degli italiani» e sedi alc di condividût de bande di tancj di lôr.

Si lu viôt dapardut e une conferme di cheste fate e rive ancje di chê altre declarazion fate di Favino vie pai ultins dîs in cont dal fat che massime tai cines americans i personaçs talians a vegnin interpretâts di atôrs forescj e impen a varessin di jessi fats di atôrs talians. Ancje in chest câs in tancj di lôr i àn dât reson, però – par fortune – al è ancje cui che al à ricuardât che no je une cuistion di nazionalitât o di divignince gjeografiche e culturâl, ma ben di capacitât dai atôrs. Il stes Favino al è stât bulo inte interpretazion di personaçs che dispès a jerin avonde lontans dal so contest culturâl specific, par vie che al è un brâf atôr…

Magari in chest câs Favino al veve dome chê di marcâ il fat che i atôrs talians no son masse promovûts ator pal mont, però l’efiet al è simpri chel: «primato nazionale» in chel instès esaltât e vaiùs.

O podìn ancjemò pensâ che no jere chê la sô intenzion, ma il risultât al è chel.
Al è pôc ce dî.

Al è di domandâsi se e je une cuistion di convinzion personâl e di nazionalisim istintîf che al salte fûr cence pudôr intune clime politiche e culturâl simpri plui segnade di une vision dal mont di cheste fate, o se e je une cuistion di marketing, leade ai contignûts dal cine Il comandante, o ben se a son dutis dôs is robis, une dongje di chê altre. O ancjemò se Favino, di atôr brâf e impegnât, al sedi ancjemò cjapât ad in plen dal personaç dal “comandante” Salvatore Todaro, che al jere un militâr talian impegnât inte Seconde Vuere mondiâl.

Intun passaç dal cine Todaro al dîs: «Sono italiano e gli altri non hanno, come me, duemila anni di civiltà sulle spalle». Si podarès comentâ che in confront cui votmil agns di italianitât che al conte chel gjenerâl talian che al à dât fûr un libri che nol è tant il “comandante” Todaro al somee un minimalist…

Cence jentrâ tai contignûts dal cine, che sul plan cinematografic al è preseabil e che al conte un episodi di gjenerositât e une storie che e vûl jessi educative e esemplâr ma e riscje di fâ dismenteâ il contest dal Fassisim e de Seconde Vuere mondiâl, nus torne iniments une cjançon dai CCCP e, cuntune ironie liberatorie, nus ven di cjantâ:
«Eri cosi Favino, proprio un amore di Balillino».

(O isal miôr:«Eri cosi Favino, proprio un Balilla di ragazzino»?)

Triveneto? No, grazie

Sù par jù doi mês indaûr o vevin publicât un articul che, almancul par cualchidun che nus à scrit, al veve un titul masse «criptic» e «talianon»…, stant che al menzonave un vecjo sketch di Roberto Benigni.

Chel toc – «Achille, cambia nome!» – al veve chê di invidâ cualchi istituzion a cambiâ non e soredut al voleve pandi preocupazions motivadis in cont de fantomatiche denominazion di «triveneto», dal so ûs e de sô difusion e di une propueste di riorganizazion teritoriâl dal Stât che e veve chê di meti adun une regjon aministrative cun chel non.

Magari cussì no, nus tocje cjapâ at che, cundut dal timp passât, chel articul al è ancjemò une vore atuâl.

O podês tornâ a leilu achì.

Tu quoque, Vita Cattolica

Inte suaze dal panorame gjornalistic e editoriâl di chenti o vin une stime particolâr pe “Vita Cattolica”.
Dal setemanâl de Diocesi di Udin nus plâs soredut la atenzion pal Friûl inte sô unitât e inte sô pluralitât.

Cun di fat, cundut che al cuvierç dome il teritori de Diocesi di Udin, il gjornâl al mostre di vê avonde clâr il fat che il Friûl al è plui grant, des Alps ae Marine de Livence al Timau.
La Vita Cattolica e ten cont ancje de diversitât linguistiche di chenti, cun articui, rubrichis e pagjinis par furlan, par sloven e par todesc e la plui part dai tescj par furlan publicâts e je ancje scrite doprant la grafie uficiâl in maniere corete, cemût che al è just in cualsisedi lenghe.
Cu la coretece e la atenzion che a coventin, i siei gjornaliscj par solit a scrivin ancje il non de regjon inte maniere juste, in coerence cu la storie, cu la gjeografie e cul dirit, ven a dî cu la liniute tra “Friuli” e “Venezia Giulia”.

Al è daûr di dutis chestis considerazions che o sin restâts scaturîts a viodi il “Calendario della Fede. Chiese e pievi del medioevo in Friuli Venezia Giulia” (sic!), lunari dât fûr in zonte dal prin numar di chest an dal setemanâl. Parcè che al è dome par talian, parcè che il non de regjon al è scrit cemût che al è scrit e parcè che par ogni mês e je une detule par furlan che e je scrite cence rispiet pes regulis, cun caratars, acents e apostrofs semenâts cence criteri.
Cun di plui il “Calendario” al permet di fâ ancje cualchi biele discuvierte. Par esempli, che la Fieste de Patrie dal Friûl e cole sei ai 3 di Avrîl che ai 3 di Fevrâr o che il Püst, il Carnavâl rosean, si lu fâs a Mugle.

Tal “Calendario”, dongje dal logo de “Vita Cattolica” al è ancje chel di TurismoFVG…

O sin ducj Charlie. E vonde

Al è sucedût alc, îr a Parîs.

E je une brute storie, di cualsisedi bande che si le cjali.
Massime pe muart di dodis di lôr, pe violence fate cuintri di cui che al pense, che al scrîf, che al dissegne, che al lavore, che al vîf, pal fanatisim e pe clime di vuere sante che si nase ator.

O sin ducj Charlie. E vonde.

I doi problemis di fonde de çampe taliane

Ogni dì che al passe al è simpri plui clâr: la çampe e à cualchi probleme.
La robe no nus fâs par nuie plasê, par plui motîfs.

In gjenerâl – e in particolâr dentri dal Stât talian – al è simpri plui evident che il so prin probleme al è chel di jessi masse pôc çampe.

Ma a nivel talian al è ancjemò alc altri.
Juste une setemane indaûr o vin scrit alc in cont di chest argoment, cun riferiment particolâr ae iniziative fate indenant in Parlament de bande di un deputât roman che al fâs part di un partît che al varès di jessi progressist e che, cemût che al salte fûr dal so cognon, al è di divignince furlane.

Chest fat e altris ancjemò, plui o mancul resints , nus fasin pensâi parsore cetant.

Dopo vê let i resoconts dai intervents fats tai dîs passâts, a Triest, in Consei regjonâl, e in particolâr dopo vê let chest, nus ven spontani fâ une riflession, che e tocje in particolâr la regjon Friûl-VJ.

La çampe taliane no à dome il probleme di jessi masse pôc çampe.

E ‘nd à ancje un altri: saraial chel di jessi masse taliane?

Parcè? Parcè? Parcè?!?

O viodìn cun gran plasê che la produzion musicâl par furlan si fâs cognossi e preseâ in diviers contescj.

De vitorie di Loris Vescovo alì dal ‘Premio Tenco’ ae tournée di Fabian & Orko Trio fintremai ae ativitât promozionâl, informative e organizative di Radio Onde Furlane, tra la etichete Musiche Furlane Fuarte e manifestazions tant che il Prmi Friûl e Suns, che la sô edizion di chest an si davuelç Udin propit doman, a son tancj mutîfs par tirâ fûr alamancul un tic di «Furlan pride», di braùre furlane.

Però al è un però…
Parcè il disc par furlan di Loris Vescovo pal ‘Premio Tenco’ isal une opare «in dialetto»?
Parcè cuant che si fevele di Friûl, di minorancis, di nazions cence stât, di lenghis minoritariis cierts media talians no rivino a fâ di mancul di scrivi di «piccola patria» o «piccole patrie»?

Parcè?

Domandìnsi parcè

Une cjançon pai 4 di Novembar

Chê altre dì a jerin i 4 di Novembar. Chel inovâl al è stât memoreât intune maniere intrigose e stomeaose, soredut se si pense che o sin tal 2014.

in chê ocasion si à dit pardabon di dut, fûr che la uniche robe che e coventave dite, ven a dî che in chê dì si sierave finalmentri chê che il pape Benedet XV le veve batiade «inutile strage».

Cun cualchi dì di ritart, o memoreìn ancje nô chel inovâl. In musiche e cu la traduzion par talian, par che no si disi che no si capissin lis peraulis…

«Mamma, ho perso il Friuli» (Ancjemò…)

Ogni mês si fâs la lune, ogni dì si impare une.
Vuê, par esempli, o discuvierzin che salacor bielzà tra i secui XV, XVI e XVII e esisteve chê robe fantomatiche, in realtât inventade tal secul passât, che e ven clamade “Isontino” e che soredut no veve – e no à – nuie ce fâ cul Friûl… (gulp!!!)
Nus al insegne il titul di un comunicât stampe dât fûr de Universitât che a chest pont no savìn plui cemût clamâle (dal Friûl? dal Isontino? di palaç Antonini, sezion periferiche dal ateneu «triveneto»?), che al fevele – cemût che si lei achì – dal «Reportage dal Friuli e dall’Isontino durante la Repubblica di Venezia».

Se a dânus cheste informazion e je la istituzion che par leç e varès di jessi il centri de ricercje e de cognossince storiche dal Friûl, o sin a puest. Nus tocje tornâ a dî: «Mamma, ho perso il Friuli».

A proposit di savints, savês e mont academic, doman a Udin al tache ancje il Mimesis Festival. Arte, Filosofia, Diritto. Il program al è interessant e i materiâi di publicizazion a son preseôs, ma oviamentri a son dome par talian…

I reladôrs stes a son pe plui part talians, a ‘nd è ancje cuachidun di chenti e dome l’artist Tadej Pogačar, che al è sloven, al da, almancul su la fonde de cjarte di identitât, chel “quid” di internazionalitât che dispès si domande a iniziativis di cheste fate.
O tornìn a marcâ che la manifestazion nus somee interessante – e je la prime volte che e ven inmaneade – ancje se no podìn fâ di mancul di nasâ l’odôr di une sorte di version udinese di “Pordenone… sielzêt voaltris cuâl che al è il verp che us plâs di plui”.

Cjalant il program o cjatìn une robe interessante: te pagjine 18, là che si presente une conference in cont de “La filosofia di Miles Davis” il non de regjon “Friuli – Venezia Giulia” al devente “Friuli Venezia – Giulia”…

La manifestazion e je inmaneade di “Territori delle idee”.
Al vignarès di dî: «Lis ideis a son tantis – forsit! – ma i teritoris e la idee di teritori…dulà sono?»

Culachidun al podarà dî che almancul e je une liniute…

«Le cazzate sono come le ciliegie: una tira l’altra (2)»

Alc al è alc e nuie al è nuie. Tai ultins dîs il comitât promotôr dal fantomatic referendum pe indipendence dal Friûl al à fat savê che chel nol sarès ni un referendum ni un plebissît, cemût che impen al saltarès fûr dal non dal sît internet, ma dome une consultazion par viodi se e je une tendince indipendentiste o almancul a pro di une autonomie fuarte pal Friûl.

La precisazion e stice daurman un pâr di domandis. Saltie fûr de cjolte di cussience che la iniziative e je clopadice sul plan dai contignûts e ancjemò di plui des proceduris? O ise dome la conseguence che, ancje par ducj chescj motîfs, forsit no je masse int che e à voie di notâsi e di votâ?
In cualsisedi maniere: al è un pas indenant o – par tornâ al titul e al contignût dal nestri articul di cualchi dì indaûr… – une çariese di mancul.

Coerentementri cul nestri otimisism, o cirìn di viodi ancje cualchi element positîf. Par esempli il fat che si vedi inviât un ciert dibatiment, cemût che si viôt tal profîl Facebook de Patrie dal Friûl, o che la iniziative e vedi fat fevelât di se ancje tal forest, cemût che a mostrin i articui saltâts fûr su Vilaweb e su Nationalia.
Ancje cun cheste cjaladure, però, a restin i dubis che o vin palesât cualchi zornade indaûr e cun chei la preocupazion che, in cualsisedi maniere, la robe no zovi al Friûl e ae sô int.

In chê ocasion, a proposit di… çariesis, o vevin cjapât sù ancje l’impegn di tornâ a dâ un cuc a chei doi coments cjatâts in rêt in cont di Scozie e Friûl, che o vevin segnalât juste parcè che nus vevin colpît pe superficialitât e pe concentrazion altonone di prejudizis, fâi e lûcs comuns.

Ognun al bale cun sô agne e duncje le pense a so mût: no vin pretesis di dâ judizis, però si permetìn di fâ indenant cualchi osservazion, ancje se no cognossìn personalmentri nissun dai doi autôrs.

Al va dit che il prin dai doi al à ancje une so coerence di fonde. Par nestri cont le spare gruesse cuant che al scrîf che «la Scozia ha detto no, con un’affluenza altissima e un risultato omogeneo che lascia poco spazio a discussioni e dibattiti», però – e chest al è ben – nus somee che al ricognossi il fat che la volontât di autoguvier dai scozês e salte fûr sei dal «sì» che dal «no».

Par sigûr al fâs vignî il pêl dret cuant che al scrîf di «piccole patrie» e di «piantare nuovi, inutili confini e nuove, inutili divisioni», parcè che al dopre categoriis e al fevele di prospetivis che no valin par sigûr ni pe Scozie e pai indipendentiscj scozês e nancje pal Friûl, almancul par cemût che lu viodìn nô.
Però di un autôr che si palese tai siei scrits tant che un «piccolo fan» di Ronald Reagan e Silvio B – e o doprìn la espression «piccolo fan» cence ofese par nissun – al è dificil spietâsi alc di plui e di miôr: il so resonament in cont de propueste di clamâ ‘Friûl e Triest’ la Regjon che e ten dongje il Friûl e Triest, o des posizions di chei che a son a pro di scrivi ‘Friuli-VG’simpri cu la liniute tal mieç, , cemût che al è just e che si lei tal articul 131 de Costituzion,lu conferme ad in plen.

Insom, ce che i da fastidi al autôr dal articul su Scozie e Friûl al è soredut il fat che i sostignidôrs dal “sì” in Scozie a sedin progressiscj e che impen, chi di nô e plui in gjenerâl tal Stât talian, chei che si àn declarât «piccoli fans» – ancje lôr … – di «Yes for Scotland» a son di drete, a tacâ dai leghiscj.

Al à reson: il sì pe Scozie indipendente al jere un vôt progressist. Al lasse scaturît che no lu vedin capît tancj progressiscj di chenti, cemût che al salte fûr propit tal secont dai coments che o vin segnalât, là chel il so autôr al palese dificoltâts di comprension grandononis no dome in cont de Scozie, ma soredut in cont de realtât furlane.
Ma di chest o tornarìn a scrivi cun plui calme chi di cualchi dì, te tierce pontade dedicade aes çariesis.

«Le cazzate sono come le ciliegie: una tira l’altra (1)»

Il diretôr di chel cuotidian cul non forest che si lei in Friûl nus vise che e je scatade la ‘ore X’. Cun di fat, di miezegnot e un secont o sin in plene tal mês di timp là che si podarà votâ tal fantomatic referendum pe indipendence dal Friûl.

De cuistion o vevin za scrit alc. Stant che ‘repetita iuvant’, o tornin a cjapâ sù cualchidune des riflessions fatis indenant zaromai doi mês indaûr, zontant ancje alc altri.

Prin di dut no podìn fâ di mancul di marcâ il fat che cheste iniziative referendarie nus somee alc che al è plui cuintri dal Friûl che a pro. In chest sens, si pues calcolâle o tant che la enesime manifestazion dal nivel unevore alt de alienazion culturâl, identitarie e politiche di tancj di lôr in Friûl o ben tant che la ultime azion di mistificazion, di confusion e di «distrazione di massa» metude adun propit par menâ ator il Friûl e la sô int in cont di cuistions tant che chês dal autoguvier, dai dirits e des prospetivis di fâ sù un avignî diferent, juste tal moment che chestis cuistions a cjapin sù une rilevance e une impuartance grandononis.

In chest sens ancje il fat – che par so cont al podarès jessi ancje alc di bon – che si feveli di «indipendence» cence pôris o cence tabûs in realtât al devente alc di negatîf. Cun di fat, dopo dal sputanament che in tancj agns al è stât fat de peraule «autonomie», cun cheste storie dal referendum si va a fruiâ e a sputanâ ancje une altre peraule clâf che inaltrò, de Scozie ae Catalogne, e ven doprade – tra lis altris, propit par resons che a son sù par jù compagnis di chês che a valaressin tal câs dal Friûl – cun fuarce e cun sintiment par fâ indenant rivendicazions e prospetivis di autoguvier e di autodeterminazion.

Chest al cjate conferme ancje in chei che a varessin di jessi i ponts di fuarce dal program di chescj indipendentiscj: la «jeve militâr obligatorie», il «control dal confins», lis «bariduris doganâls» e vie indenant. Isal chest ce nus covente? No, sigûr.
Cussì la indipendence fate indenant in realtât e je une vore «dipendente», «dipendentiste», sotane e une vore pôc furlane: plui dongje dal Venit, dal «triveneto» e de «padania» che de Scozie, de Catalogne e dal Paîs Basc e duncje, almancul cemût che le viodìn nô, dal Friûl.

Il fantomatic referendum pe indipendence, dongje dal jessi debil e salacor pericolôs pal Friûl sul plan dai contignûts, des prospetivis e duncje de sostance politiche, nus somee clopadiç ancje in tiermins organizatîfs e procedurâi. Ancje par chest al salte sù il dubi che lu vedin inmaneât propit di pueste par sputanâ ben e no mâl il Friûl e ciertis sôs rivendicazions e aspirazions.

Cun dut achel, un element positîf al è: cheste iniziative e partìs dal Friûl ocidentâl e cun dut des contradizions za ricuardadis e ven fate indenant in non dal Friûl. Alc al è alc.

Magari cussì no, a restin chei tancj aspiets za ricuardâts che a fasin vignî i sgrisui, ancje par vie de maniere che a vegnin frontâts de bande dai media di chenti. In cont di chest, si pues marcâ il fat che il ridicul – se no piês – al è il caratar prin ancje di cierts coments che a frontin cheste cuistion e chês, une vore atuâls, de Scozie e de Catalogne, magari ancje cun chê di fâ cualchi comparazion tra chês realtâts e chê dal Friûl.
In particolâr, in cont di Scozie e Friûl, o vin cjatât in rêt doi biei esemplis – si fâs par mût di dî – in chest sens. Ju podês lei achì
e soredut achì.

Di sgrisulâsi. Nus à tornât iniments il titul talian dal film ‘Dumb and Dumber’ e chel nestri amî che al diseve «le cazzate sono come le ciliegie: una tira l’altra»: al è dificil no dâi reson, in particolâr pal secont dai doi tescj menzonâts cumò denant. Tal nestri prossim coment si permetarìn di meti in evidence cemût che lis… çariesis no si cjatin dome tal fantomatic referendum ma ben ancje (ancjemò di plui?) inaltrò.

Par intant, par lei alc di sest in cont di Scozie e di Catalogne, us conseìn di dâ un cuc a chest coment e a chest reportage, che a àn il mert di vê une cjaladure mancul talianote, plui europeane e duncje plui furlane.