Atualitât, Friulanofobie, Media, Politiche

‘Minorancis nazionâls’ e ‘comunitâts regjonâls’. «Continuiamo così, facciamoci del male»

Îr sul MV e je saltade fûr la pagjine ‘Marilenghe’, che si vierç cun chest articul là che si fevele di minorancis linguistichis e leçs eletorâls.

Al è un articul interessant, ancje se al palese cualchi contradizion e cualchi imprecision.
In particolâr, propit lant daûr di chel, nus tocje marcâ il fat che nol è dome il Stât talian che «al à inmò di cjapâ at dal test de Costituzion dal 1948». Cun di fat, a àn ancjemò di fâlu ancje tancj di lôr che a scrivin sui gjornâi, par talian e magari ancje par furlan. E magari ancje cun chê di promovi la lenghe, la culture e i dirits dai furlans.
Dut chest si palese juste intun passaç di chest articul (che magari cussì no, a chel pont nol è dome interessant ma al fâs ancje vignî i sgrisui) là che si fevele di presumudis «minorancis nazionâls» e altris presumudis «comunitâts regjonâls».

L’articul 6 de Costituzion al proferìs il principi di fonde che «la Republiche e tutele lis minorancis linguistichis cun normis di pueste»: «minorancis linguistichis» e vonde.
No esist nissune distinzion tra presumudis «minorancis nazionâls» e altris presumudis «comunitâts regjonâls». O tornìn a scrivilu: a son dutis «minorancis linguistichis», e vonde.

Il fat che tal cjâf di cualchi politic talian e esisti (ancjemò…!!!) cheste presumude distinzion, che e puarte a fâ fîs e fiastris tra lenghis e comunitâts – prime tra tutele «extra-costituzionâl» e mancjance di tutele e po tra tutele «extra-costituzionâl» e mancjade metude in vore de Leç 482/1999 (par esempli tal cjamp dal servizi public radiotelevisîf) – nol è un bon motîf ni par crodi ni, ancjemò di mancul, par fâ crodi ae int che cheste vision ideologjiche e sedi la realtât. E propit parcè che – cemût che al è scrit tal articul stes – cheste «e je une cuistion di principi!»…

La etichete «minorancis linguistichis” (cu la zonte di “storichis”, daûr de Leç 482/1999) e vâl par dutis lis popolazions ricognossudis tal articul 2 di chê stesse Leç (che a sedin defininidis cuntun agjetîf etnic o tant che «parlanti» une des lenghis che a son elencadis nol cambie nuie), daûr dal principi di fonde proferît cul articul 6 de Costituzion. A son dutis «minorancis linguistichis», e vonde.

Se impen si va daûr de Convenzion cuadri pe protezion des minorancis nazionâls dal Consei de Europe, che e je stade ratificade de bande dal Stât talian ancjemò tal 1997, dutis chês comunitâts (cu la zonte di rom e sinti, dismenteâts fin cumò de normative taliane) a son calcoladis tant che «minorancis nazionâls» e la lôr tutele (di dutis, no dome di chês che a fevelin chê stesse lenghe che dilà dal clap e je chê dominante e uficiâl) al è l’impegn che la Republiche taliane e à cjapât sù propit cu la ratifiche fate daûr de Leç 302/1997 e che magari cussì no e à manignût une vore pôc, massim cun rifgeriment aes comunitâts furlane e sarde.

Lis peraulis a son impuartantis. Si à di fâ atenzion. Soredut se si à chê di di promovi la lenghe, la culture e i dirits dai furlans.

Se di no, par dîle ancjemò cun Nanni Moretti: «Continuiamo così, facciamoci del male».

Advertisements
Standard
Atualitât, Politiche

«Pacatamente», «democraticamente», e… «friulanamente»: No, Ne, Nein, No! E vonde

si

Finalmentri e je daûr a finî la campagne eletorâl pal referendum di domenie.
A chest pont, dopo vê letis e sintudis di ogni sorte, si permetìn di fâ cualchi piçule riflession.

La prime e tocje la clime gjenerâl in stîl ‘Mille e nion più Mille’.

La seconde, leade ae prime, e je in cont de polarizazion – al è normâl: o No o Sì – e de trasversalitât dai schieraments e duncje de presince, di une bande e di chê altre di compagniis no masse racomandabilis.

La tierce si riferìs ae demagogjie e al terorisim ideologjic fats indenant in cont di chestis compagniis, massime de bande di chei a pro dal Sì. Al è evident che se si à di sielzi tra No e Sì, si sielç o une o chê altre opzion daûr di criteris diferent e cun vision diferentis.
La plui part di chei a pro dal Sì a motivin cheste sielte su la fonde di un orientament governatîf ‘a prescindere’. Chest al sucêt ancje par vie che il Guvier e soredut il President dal Consei a àn vût cjamât il cuesît referendari di chest significât: Sì, a pro dal Guvier; No, cuintri. Par chel nol è di ce smaraveâsi se tancj di lôr a disin di votâ No par fâi cuintri al guvier.

Chei a pro dal Sì a justifichin e a promovin la lôr posizion cul fat che «si à di cambiâ» e che «si à di movisi», ancje se la plui part di lôr no mostre di savê pardabon ce che si cambie e cemût che si movisi e in ce direzion…

Tra i argoments fats indenant di chei a pro dal Sì a son la «semplificazion», la «riduzion dai coscj de politiche», il «superament dal bicameralisim perfet», la «eficience», la «eliminazion dai ‘enti inutili’»….

Dopo vê let il test de riforme e dopo vê scoltât ce che a pensin chei a pro dal sì, nus somee che a sedin dome sprocs cence contignûts, se no piês. Par esempli si cjatìn in cunvigne cun cui che in cont dal presumût «superament dal bicameralisim perfet» al fevele ‘par talian’ di «monacameralismo».

La uniche veretât che o cjatìn tes peraulis di chei che a son a pro dal Sì e je chê in cont des autonomiis locâls e regjonâls, dal lôr «ridimensionament», de lôr «riduzion» e de lôr «eliminazion».

Par chel e pal «monacameralismo» che al saltarès fûr se al passàs il Sì, si cjatìn in cunvigne cun cui che, a pro de difese e soredut dal esercizi cussient e positîf de autonomie de Regjon che e ten dongje la plui part dal Friûl cun Triest, al à lis ideis claris in cont dal referendum.

«Pacatamente», «democraticamente», e… «friulanamente», o pensìn che si vedi di votâ No, Ne, Nein, No!

E vonde.

Standard
Atualitât, Friulanofobie, Media, Politiche

Jù lis mans di Giulio Regeni, jù lis mans de Patrie dal Friûl

 I siacai e lis jenis no mancjin mai. No fevelìn dome di bestiis, ma soredut di umans, di chei umans (si puedial clamâju cussì?) che pûr di vê chei che Andy Wharol ju clamave i cuindis minûts di celebritât a profitin di dut e a strumentalizin dut e ducj.

Tra chescj a son par sigûr ancje chei che si son butâts cuintri dal Comun di Gardiscje e dai organizadôrs de Fieste de Patrie dal Friûl di chest an par fâ une polemiche vergognose e autoreferenziâl.

No vin nuie a ce fâ cun nessun di chei che i àn lavorât daûr o no vin nessun interès ni a difindi, ni a promovi, ni a fâi cuintri a dinissun, però no podìn fâ di mancul di palesâ un pont di viste diferent.

Domenie a Gardiscje, cuant che o vin viodût cemût che a fasevin par meti fûr la bandiere su la terace dal teatri, o vin nasât che cualchi siacal al varès sbitiât pe ocasion. E cussì al è sucedût.

Cun di plui, al è colât inte vuate ancje cualchidun che, pal so curriculum e cu la sô innomine, no i varessin di coventâ ni cinc, ni cuindis minûts di celebritât fondade sul vueit, sul prejudizi e su la voie di fâ polemiche par no savê ce fâ.

O pensìn che cui che i ten ae memorie di Giulio Regeni e che al vûl savê la veretât al pues cjapâse cun cualchidun altri, in Egjit, a Rome, a Londre o ancje inaltrò.

Cussì, ai siacai, aes jenis e ai variûi, che a sedin (o che si sintin) talians, talianonons, ‘italianissimi’, ‘internazionalisti tricolore’ e parafurlans trivenetiscj adriatics alpins, si sintìn di di dîur dome chest: «Jù lis mans di Giulio Regeni, jù lis mans de Patrie dal Friûl!».

Standard
Atualitât, Politiche

Conoscenza o ‘con o senza’? O ‘senza’ e vonde?

Dai 3 ai 5 di Lui Udin al è stât l’«ombelico del mondo» academic talian. Cun di fat te Capitâl dal Friûl si à davuelte la prime edizion di Conoscenza in festa, event di trê dîs dedicât ae cognossince, ae universitât e al rapuart tra savê e societât che al à clamât dongje i retôrs des Universitâts dal Stât talian, professôrs e studiôs innomenâts e altri esperts e ‘opinion leaders’ talians.

La iniziative e à puartât a Udin tante int – o fevelìn di relatôrs e di esperts – che in diviers câs e je pardabon interessante, a tacâ di Mauro Ceruti, Edgar Morin, Vito Mancuso e Andrea Segrè. In altris câs la robe e à cjapât sù une ande plui televisive e «fuffosa», cemût che e dîs une nestre amie, ma cheste e somee jessi une carateristiche di ducj chescj grancj events, là che a contin une vore i nons e i «testimonials». Tra chescj – almancul intal program che al zirave sei in rêt che ator par Udin – al jere previodût ancje il president dal Consei dai ministris dal Stât talian, che – al plasi o mancul – al è impuartant «a prescindere», però no si lu à viodût e nissun si à inacuart de sô mancjance.

Daûr des declarazions fatis in plui ocasions de bande dal retôr dal Ateneu furlan, Alberto Felice De Toni, a Udin si à fate la «Cernobbio della conoscenza e dell’università» e si àn metudis jù lis fondis «per il rilancio del sistema Paese».
Al vignarès di domandâsi se al è propit chel ce che i covente ae nestre Universitât. Par nestri cont, lis rispuestis a son almancul dôs.

La prime e je positive: par sigûr la operazion Conoscenza in festa e à un ciert valôr politic par promovi l’Ateneu a nivel talian. In chest sens l’impat de iniziative, però, si podarà stazâlu dome chi di un pôc: par esempli se al cambiarà alc in cont dal finanziament statâl dasl nestri Ateneu o se al vignarà fat chel piçul inzornament normatîf che al covente par che a Udin si puedi fâ finalmentri la formazion dai insegnant ‘di’ e ‘in’ lenghe furlane. Viodarìn.

La seconde e je di segn contrari: al è une vore fuart il dubi che e sedi stade plui une ocasion di promozion personâl di cualchidun e soredut e je fuartonone la sensazion che dentri di dute cheste cognossince al mancjàs alc di (avonde?) impuartant, ven a dî chel che al ven clamât il teritori e che tal nestri câs al à un non precîs: si clame Friûl.

Ancje in cheste ocasion, chê che par furlan nus plâs clamâle Universitât dal Friûl, cun dut de sô storie, de sô leç istitutive e dal so statût, e à mostrât di jessi soredut (o dome) une Universitât che no sa ce che e je e dulà che si cjate e chel di Conoscenza in festa si à palesât tant che un «format» bon par cualsisedi ateneu «dalle Alpi al Lilibeo», cuntun efiet ‘Visitor’ che al lasse la bocje garbe.

E jere le ocasion di tirâ fûr lis lenghis (furlan, sloven e todesc) te comunicazion, di marcâ la vocazion europeane e internazionâl dal Friûl e de sô Universitât e di meti in relazion il Friûl cu la Italie su chestis fondis. Impen l’unic rapuart ricognossût al è il fat che cent agns indaûr «Udine era la capitale della guerra»… Ce figade! No mo?

Se in cont dal Mittelfest si domandìn ancjemo se nol sedi dome Italfest, in chest câs la ‘Conoscenza’ e devente ‘Cono…senza’ o ‘Con o senza’ – se si vûl cjapâ dentri chel alc di positîf che al salte fûr de cjançon dai Carnicats fate di pueste par promovi lis iscrizions te Universitât, là che si incrosin il furlan, il talian, l’inglês e il latin (tal titul Hic sunt futura) – o ben ‘senza’ e vonde, pe mancjance (colpevule) dal Friûl.

Standard
Atualitât

Puce di fogne, puce di carogne

O sin za ad in plen dentri des celebrazions dai cent agns di chês «radiose giornate di maggio», ma chi di cualchi dì il nivel dal çavariament de retoriche e de mistificazion al cressarà ancjemò.
Di ce che si viôt ator, massime chi di nô, di cà e di là dal confin statâl di cent agns indaûr, il nivel di sigurece al è za stât passât.
Par dîle par talian, «la m… è già montata in scagno» e al è il pericul di jessi scjafoiâts.

La date dai 24 di Mai si svicine e plui che il cisicâ de Plâf si sintin altris rumôrs e soredut altris odôrs. E je la puce di chel fanatisim, che magari cussì no o cognossin ancje masse ben, tai siei pinsîrs, tes sôs oparis e tes sôs omissions (a tacâ de omission plui grande: chê di finîle e di domandâ scuse).

Nus vegnin i sgrisui a pensâ che chest al sedi «solo l’inizio» e che la robe e ledi indenant cussì fintremai tal 2018 e magari slargjantsi ancjemò: tal 2019, cuntune biele celebrazion ancje dai 23 di Març di cent agns prime, e tal 2022, ator dai 28 di Otubar.

Si sint une brute puce di fogne. E di carogne.

Al è ben che il Friûl si dismovi prime di scjafoiâ, intosseât di chest aiar malsan (e no dome di chel…).

Standard
Atualitât, Dome pal blog, Friulanofobie, Musiche

Parcè? Parcè? Parcè?!?

O viodìn cun gran plasê che la produzion musicâl par furlan si fâs cognossi e preseâ in diviers contescj.

De vitorie di Loris Vescovo alì dal ‘Premio Tenco’ ae tournée di Fabian & Orko Trio fintremai ae ativitât promozionâl, informative e organizative di Radio Onde Furlane, tra la etichete Musiche Furlane Fuarte e manifestazions tant che il Prmi Friûl e Suns, che la sô edizion di chest an si davuelç Udin propit doman, a son tancj mutîfs par tirâ fûr alamancul un tic di «Furlan pride», di braùre furlane.

Però al è un però…
Parcè il disc par furlan di Loris Vescovo pal ‘Premio Tenco’ isal une opare «in dialetto»?
Parcè cuant che si fevele di Friûl, di minorancis, di nazions cence stât, di lenghis minoritariis cierts media talians no rivino a fâ di mancul di scrivi di «piccola patria» o «piccole patrie»?

Parcè?

Domandìnsi parcè

Standard
Atualitât, Dome pal blog

Fuarce Costa Rica! Fuarce Uruguay! Fuarce Friûl?

O vin di confessâ un pâr di robis: nus plâs une vore il zûc dal balon, ma di passe vincj agns no rivìn a vê nissune simpatie pe rapresentative calcistiche dal Stât talian.
La prime par sigûr no je une colpe. La seconde, impen, e ven calcolade di tancj di lôr tant che une colpe gravone, un crimin penç, un delit esecrabil! Pardabon!

Al pues stâi che dopo des ultimis partidis il numar di chei che le pensin compagn di nô al sedi cressût, ancje se su la fonde di motivazions diviersis des nestris.

Al è dai Mondiâi dal ’90 che o vin tacât a jessi stomeâts dal fanatisim nazionalist che al è cressût ator dai «azzurri».
Di in chê volte e ancjemò di plui tai ultins agns si à fate indenant une tendince che e da plui impuartance al fat che i zuiadôrs a sedin pronts par cjantâ «Siam pronti alla mooorte» denant des telecjamaris pluitost che a sedin bogns di zuiâ cun «coraggio», cun «altruismo» e cun «fantasia», cemût che al cjantave Francesco De Gregori.

Tal 1982 Zoff, Gentile, Cabrini, Collovati, Causio, Pablito Rossi e ducj chei altris no cjantavin: a zuiavin e vonde… Altris timps.

Cheste incressite di nazionalisim tal balon e tal sport, in gjenerâl, e je dome il spieli di ce che al à incarulît dute la societât dal Stât talian e al à puartât daursi revisionisims e intolerancis di ogni sorte, peadis in maniere divierse cul cult de nazion «una d’arme, di lingua e d’altare», intant che la citadinance, la societât, la Costituzion e la “polis” a levin – e a continuin a lâ – a patràs, tra robariis, prepotencis e altris cragnis ancjemò.

O vin simpatie par Prandelli, tant che om e tant che alenadôr, e ancje par almancul cualchidun dai zuiadôrs puartâts in Brasîl, di Darmian a Sirigu, però o scugnìn dî che o si contents di cemût che e je lade. Par plui motîfs.

Tra chescj e je chê tendince viers dal pinsîr unic tipiche taliane: dopo Italie-Ingletiere pe informazion Made in Italy i talians a jerin i plui bulos dal mont, Balotelli «santo subito», la scuadre un esempli di tecniche e di tignude atletiche; dopo de partide de Costa Rica al saltave fûr cualchi dubi, parcè che no si podeve fâ di mancul par vie che cualchidun dai «azzurri» al vaive par vie dal cjalt, dal umit e dal scjafoiaç; dopo dal Uruguay i erois di cuindis dîs prime a son deventâts une bande – anzit: une bande di bandis – di bogns di nuie, di pipinots e di figurinis.
«Esperando la proxima hola» – par dîle cun Manu Chao – di superomisim tricolôr…

Se te partide de Italie cuintri de Ingletiere al jere in teorie dificil sielzi par cui tignî, cul Costa Rica e cul Uruguay no vin vût nancje un dubi.

Uns pocjis di resons par sintîsi dongje dal Costa Rica a vegnin ricuardadis ancje achì.
Pal Uruguay al baste menzonâ la storie dal president Pepe Mujica, che al è une vore cognossût. Ma no dome: a son ancje i uruguayans di divignince furlane, a tacâ di chel Zuan Minut, sindacalist e poete protagonist des lotis contadinis te Basse orientâl dopo de Prime vuere mondiâl, tal 1923 libar di scugnî lâ di là de Grande Aghe, che impen lu cognossin in pôcs ancje chi di nô. E chest nol è just e par sigûr nol è un câs.

Dongje di chescj e di altris motîfs ancjemò al è ancje il fat che il mister talian ur veve domandât ai siei di jessi patriotis e patriotics… No varessial fat miôr a invidâju a jessi oms e zuiadôrs di balon: coragjôs, altruiscj e fantasiôs?

Si podaraial imparâ alc di cheste esperience, tal sport e no dome? O vin i nestris dubis, ma nus plasarès, in gjenerâl, che invezit di incjocâsi di nazion e di patrie o vessin alc altri di miôr: plui cussience civiche, plui rispiet pai dirits e pai dovês, plui atenzion pe complessitât dal mont e pes identitâts che a son plurâls e dinamichis e no àn ni jerarchiis ni sorestants.

Dut chest, par noaltris furlans, al volarès dî ancje liberâsi di chê robe assurde che nus àn usâts a clamâ «piccola patria» e vê plui cussience, vê plui dignitât e vê – e domandâ – plui rispiet.

Standard