Articui 2013

Ancjemò chê dal ors

Tornait a lei chest articul, saltât fûr ai 8 di Març di chest an. Di un ciert pont di viste al somee jessi passât un secul, cun dut che chei fats e chês cjoltis di posizion a meretin simpri jessi tignudis in cont.
Di chê altre bande, lis declarazions dadis fûr dal president de Provincie un pôcs di dîs indaûr in cont de simpri plui fantomatiche Agjenzie europeane des lenghis minoritariis a rindin chest toc ancjemò atuâl, no dome tant che un “promemoria”.

BALOTIS E VERETÂTS. LA AGJENZIE CHE NO ESIST E CUI CHE I FÂS CUINTRI A DIRITS E AUTONOMIE

Fantasimis, macroca**dis e straçariis

Ogni ete e à lis sôs fantasimis. Tal 1848 Karl Marx e Friedrich Engels a scrivevin che ator pe Europe al zirave il spirt dal comunisim. Di sù par jù cinc agns incà in Friûl, almancul intes peraulis di un pôcs di lôr, e zire la fantasime de cussì clamade Agjenzie europeane pes lenghis minoritariis. Autôrs di cheste liende metropolitane furlane a son un trop di politics dal centridrete, atîfs a nivel regjonâl e no dome, che le tirin fûr ogni volte par jemplâsi chê bocje che par solit e je vueide di peraulis di sest in cont di Europe, Friûl, lenghis e dirits linguistics.

Il prin al jere stât Franco Frattini, intant de campagne eletorâl pes politichis tal 2008. L’ultin de serie, che e cjape dentri sei chei dal Pdl che i verts padans, al è il candidât sindic di Udin di chê coalizion, che pôcs dîs indaûr al à fat indenant la propueste di meti la fantomatiche Agjenzie a Udin, te ex sede de Bancje di Italie, intant che pal assessôr regjonâl De Anna chê stesse Agjenzie e varès di vignî logade a Passarian, in Vile Manin, cuntune sede ancje in Slovenie.

Silvana Schiavi Fachin, che tant che esperte di plurilinguisim e professore universitarie di inglês e di didatiche des lenghis, e cognòs avonde la Europe, lis istituzions europeanis e la lôr azion in cont di diversitât linguistiche, tutele des minorancis, culture e istruzion, e à fat zirâ une note, in rêt e pe stampe. Di chê al salte fûr che, di ce che i à fat savê Belèn Bernaldo de Quirós, de Unitât pal multilinguisim de Comission europeane, no esist e no esistarà nissune Agjenzie de UE pes lenghis, ni in Friûl ni inaltrò, e che la candidature fate indenant di pueste tal 2005 no jere stade cjapade in considerazion, stant che tal Stât talian a son za altris dôs agjenziis europeanis.

Par fâ i “ghostbusters” i voleve dade une voglade a Bruxelles, cun dut che al è za avonde clâr cetant che a son lontans de Europe e dal Friûl de diversitât linguistiche e culturâl i nestris (?) sorestants logâts a Triest (e no dome). Al baste pensâ a ce che al è saltât fûr des conferencis regjonâls su furlans e slovens, des previsions des finanziariis regjonâls dai ultins agns e de mancjance sostanziâl di une politiche linguistiche serie. Dut chest al cjate une sô rapresentazion tes declarazions fatis di Tondo la setemane stade a Radio Tri(e)ste, là che il “governatore” al vût dit che la tutele de lenghe furlane e je une «ca**de» e une straçarie, palesant la sô mancjance di rispiet, ancjemò prin che pai furlans e pal furlan, pe Costituzion, pal Statût regjonâl, pe normative di tutele, pai dirits linguistics, par principis democratics di puartade universâl.

A proposit di ca**dis e straçariis, ve ca dôs domandis. Ce fasevial il president de Regjon autonome Friûl-VJ a Sirmione ai 16 di Fevrâr? Cui aial fat il pat cun Tremonti che al oblee la nestre Regjon – ven a dî ducj noaltris – a dâi al guvier talian 370 milions ad an in cambi di nuie?


EURO FURLAN
eurofurlan@gmail.com

08/03/2013

Standard
Articui 2013

Une Regjon divierse par un Friûl diferent (…)

O vevin dit che o varessin scrit alc in cont des elezions. O vin provât a fâlu chê altre dì su lis pagjinis dal “Quotidiano”.
Cualchi letôr, dopo che e je saltade fûr la gnove de definizion de gnove Zonte regjonâl, nus à scrit che o jerin stâts masse otimiscj.

Daûr de atribuzion des deleghis o scugnìn ameti che cualchi dubi lu vin vût ancje nô. Par esempli al ven di domandâsi dulà che a son ladis a finîle lis lenghis minoritariis e la lôr tutele, stant che no si cjatin menzonadis di nissune bande, almancul par cumò. E chest nol è un biel segnâl.

Cun dut achel, daûr de esperience dai ultins 5 agns, o sin sigûrs che cuntune altre maiorance o saressin metûts inmò piês…

E alore, zontant trê ponts di sospension tra parentesi al titul origjinari e tornant a domandâ che almancul cualchidun al fasi il “beau gest” di zurâ ancje par furlan, par sloven o par todesc par marcâ une prospetive di cambaiment, ve chi l’articul saltât fûr Vinars stât.

ELEZIONS. I RISULTÂTS A MOSTRIN LA ATUALITÂT E LA COMPLESSITÂT DE CUISTION FURLANE

Une Regjon divierse par un Friûl diferent

Lis votazions aministrativis no si son ancjemò sieradis dal dut. Cun dut achel, daûr di ce che al è saltât fûr des urnis dôs setemanis indaûr a son za avonde elements par fâ une riflession, soredut di un pont di viste furlan.

Il prin dât che al salte fûr al è chel dal astensionisim. Si pues calcolâlu no dome in linie cun chê tendence gjenerâl che e viôt in dut il Stât talian un numar simpri plui alt di citadins che no van a votâ, ma ancje tant che une conferme di chê mancjance di rapresentance e di rapresentazion che par nestri cont e je une des dificoltâts di fonde dal Friûl.
Chest probleme al jere stât frontât ancje de bande dal diretôr dal mensîl “La Patrie dal Friûl” che tal numar di Avrîl, prime des votazions, al veve scrit di un «Friûl dineât te urne».

Chê valutazion e jere par sigûr valide cuant che e je stade fate indenant. Cun di fat, almancul a cjalâ simbui e listis, di Friûl te urne si’nt cjatave pardabon pôc. Sul plan dai nons e dai simbui nol jere tes regjonâls e si rivave a viodilu in cualchi maniere dome tes elezions provinciâls, tra la sigle dal MAF (“Movimento autonomista friulano”) e chê dal Front Furlan (FF): il prin, adun cu la Lega Nord e cui varis partîts di centridrete inflochetâts di tricolôrs (ma chei di “Identità e Innovazione” no vevino scrit che «il peggior nemico … è il nazionalismo»?); il secont a cori par so cont cuntune cierte confusion programatiche e cualchi buine idee, a tacâ de alteritât declarade rispiet ae vision “italopadana” de coalizion di centridrete. Cheste clarece, pûr limitade, e je stade premiade, cun 10mîl vôts pal FF e 2mîl vôts di plui pal so candidât president, intant che il MAF, che piês di chel (2,06%) e à fat dome la liste “Scelta adesso”, al à paiât lis sôs contradizions e chês de sô coalizion, che però e a cjapât la Provincie.

Tes regjonâls il Friûl nol jere tai simbui ma vie pe campagne eletorâl al è saltât fûr tes cjoltis di posizion cuintri de fantomatiche «macroregione del nord» e a pro di dirits, lenghis, sostenibilitât economiche e coesion sociâl. Diviers candidâts dal centriçampe si son esprimûts in cheste maniere e une base teoriche e programatiche di cheste fate – e cun chê cualchi candidât tes listis che a poiavin Debora Serracchiani – e je stade ufierte a chê coalizion de bande dal gnûf progjet politic “Un Friûl Diferent”.

Il centriçampe al à cjapât vôts soredut tes areis metropolitanis e tes zonis cussì clamadis “rossis” – e duncje no in dut il il Friûl – ma chest nol vûl dî ni che il Friûl al va a drete ni che il Friûl al sedi stât «dineât». Anzit: il sucès di cierts candidâts plui atents viers chescj temis, il ridimensionament di cierts “visitors” che a son vignûts «in Frìuli» e l’impat limitât sul vôt pes regjonâls dai pastroçs che in chei dîs si fasevin in Parlament a Rome a confermin la atualitât e la complessitât de “cuistion furlane”, massime intune prospetive di cambiament.

EURO FURLAN
eurofurlan@gmail.com

03/05/2013

Standard