Articui 2013, Atualitât

Ni «forconi», ni «porconi», ni «forchettoni»

L’invît ae Zonte regjonâl a fâ alc di sest in cont de tutele des minorancis linguistichis e in particolâr de comunitât furlane e de sô lenghe pal moment nol à ricevût une rispueste vere.
Forsit par vie che la richieste e je stade fate indenant de bande dal Comitât-Odbor-Komitaat-Comitato 482 in maniere serie e documentade? Cussì la cuistion ‘lenghe fulane’ e ven doprade in maniere avonde furbe di cualchidun de oposizion o e reste argoment di demagogjie, di dibatiments e di çavariaments in rêt.
Alore, par cui che nol veve let il post di passe cuindis dîs indaûr Lenghe furlane e Regjon: «Debora, fai una cosa di sinistra. Una cosa di civiltà. Una cosa…», vuê sul Quotidiano o sin tornâts sul argoment, cun cualchi piçul inzornament, cemût che o podês lei ancje chi disot.

LENGHE FURLANE. CHE LA REGJON E FASI ALC DI SEST, CEMÛT CHE I DOMANDE IL COMITÂT 482

Ni «forconi», ni «porconi», ni «forchettoni»

Si visaiso di Nanni Moretti, che tal film ‘Aprile’ al domandave a D’Alema: «Dì una cosa di sinistra. dì una cosa anche non di sinistra, di civiltà. Dì una cosa»? Une domande sù par jù compagne – ancje se in chest câs l’invît al è soredut a fâ e a movisi – e je chê fate ae Zonte regjonâl de bande dal Comitât-Odbor-Komitaat-Comitato 482.

Ai 25 di Novembar stâts il comitât, che al ten dongje associazions e altris entitâts espressions des comunitâts furlane, slovene e gjermaniche dal Friûl, al à presentât un document là che si marche che la gnove aministrazion regjonâl, almancul fint cumò, no à fat ancjemò nuie tal setôr de tutele des minorancis linguistichis – e in cheste suaze soredut in cont de comunitât di lenghe furlane – e che la sô azion e risulte pericolosamentri in continuitât cun chê di prime che in cinc agns e à maltratât lenghis e dirits linguistics.

In cont di chest argoment o vevin za scrit alc tal nestri blog (https://eurofurlan.wordpress.com), ma nus somee di sest tornâi parsore cumò, stant che, se nol cambie alc in chestis ultimis setemanis tra deliberazions de Zonte e Finanziarie regjonâl, chê continuitât di imobilisim e prejudizis e riscje pardabon di marcâ in maniere negative dut il 2013 e di meti une ipoteche ancje sul avignî, no dome a dam di lenghis, culture e dirits.

Cun di fat, la mancjance di une azion serie de bande de Regjon in chest setôr e je a palês une abdicazion de metude in vore de autonomie speciâl e duncje, cemût che o vin ricuardât za timp indaûr, al è di bant lamentâsi des menacis cuintri de specialitât regjonâl cuant che la stesse autonomie no ven metude in vore de bande di cui che al comande a Triest e sul Friûl.

E je une cuistion che e à une valence gjenerâl, stant che la tutele des minorancis linguistichis e tocje la valorizazion de diversitât culturâl, la garanzie di dirits di fonde e la metude in vore di une strategjie di disvilup sociâl, economic e politic che e je inovative, sostignibile e democratiche. Ma propit par chest e à une impuartance inmò plui grande par cui che al è al guvier dal Friûl-VJ, massime se si declare democratic e progressist.

Il Comitât-Odbor-Komitaat-Comitato 482, in maniere serie, concrete e documentade, al denuncie l’imobilisim de Regjon, ma soredut al mostre la prospetive positive de metude adun di un sisteme scolastic plurilengâl e di cualitât e al marche che chê dai tais e de mancjance di strategjie in chest setôr e je une politiche suicide. In struc, al domande ae politiche di fâ politiche pardabon: di lavorâ pe ‘polis’, pe int, pai dirits di ducj.

Rispuindi a chê domande al vûl dî sielzi, cjapâ decisions di sest e fâ cressi la cuote dal belanç regjonâl pe lenghe furlane di chel vergognôs 0,02 % di cumò. Al è alc che, in chel stes, al è facil e complicât. Ma soredut al è alc che al covente fat.

O vino di pensâ che si puedi sielzi dome tra «forconi», «porconi» e «forchettoni»?

EURO FURLAN
eurofurlan@gmail.com

13/12/2013

Standard
Articui 2013, Atualitât

Sino speciâi o sino dome cocâi?

E va un grum di mode chê dal «caro estinto». O ben, par jessi plui precîs: chê dal «caro (quasi) estinto». Magari al è par vie a son stadis che nol è tant la Gnot dai Muarts o – al dipent dai guscj… – chê di Halloween, ma al è dut un vaî il muart: la autonomie speciâl de Regjon Friûl-VJ; l’Ufici Scolastic Regjonâl; la lenghe furlane.

In cont de lenghe, «in vie di estinzion» daûr dai risultâts di une tesi di lauree presentade cualchi dì indaûr e deventade un câs mediatic za vie pal Istât, o tornarìn a scrivi in curt.
In chê ocasion o viodarìn ancje di cierts zombies che a son ator.

A proposit: cemût mai che il president dal organisim di politiche linguistiche pe lenghe furlane si inacuarç dome cumò che dal 2009 in cà la Regjon e à ridusût i bêçs a disposizion pal furlan?
O provìn a rispuindi. Al pues stâi che al fos masse cjapât a coordenâ lis operazions par meti adun il Plan gjenerâl di politiche linguistiche, pensant che al fos cuincuienâl par vie che a àn di coventâ cinc agns par fâlu e no parcè che al à di cuvierzi cinc agns.

Vuê sul Quotidiano al è saltât fûr chest nestri articul in cont dal pericul de disparizion dal Ufici Scolastic Regjonâl. La cuistion e je serie e no tocje dome la scuele o il furlan a scuele.
Su chest argoment, a viodi cemût che si compuartin cierts sorestants di chenti, al vignarès di dî: «chi è causa del suo mal, pianga se stesso». Pecjât che il mâl al è nestri e la responsabilitât no je di ducj noaltris (magari di tancj, ma no di ducj). Buine leture.

SCUELE E AUTONOMIE. LA SPECIALITÂT DE REGJON NO SI DIFINT A PERAULIS, SI LE MET IN VORE CUI FATS

Sino speciâi o sino dome cocâi?

La svearine e torne a sunâ: rivarìno a dismovisi? Cheste considerazion e diven de gnove saltade fûr tai ultins dîs de sopression dal Ufici Scolastic Regjonâl (USR) pal Friûl-VJ. La decision fate indenant de bande dal Ministeri de Istruzion di fâ un USR unic a Vignesie che al vedi competencis sei sul Venit che su la nestre regjon e jere tal aiar za di timp. Cumò si le viôt scrite, neri su blanc, dentri dal stampon dal Decret dal President dal Consei dai Ministris che al tocje la riorganizazion dai uficis ministeriâi.
Daûr di une tradizion consolidade i tais a tocjin dome la periferie e no ancje i uficis centrâi e duncje al ven avonde facil berlâ cuintri dal «centralismo romano», soredut tes sôs cuincis plui resintis là che prassi e ideologjie si platin daûr de sante scugne di sparagnâ e des etichetis de «spending review» e de «razionalizazion».

I politics di chenti – tra Regjon e Ents locâi– a àn fat sintî la lôr vôs. Lu à fat la Zonte regjonâl, lu àn fat conseîrs regjonâi di ducj i colôrs e no àn mancjât di vierzi bocje ancje chei altris specialiscj tes declarazions altitonantis. Si son zontâts ancje i sindicâts, segnalant diviers pericui: si pierdin puescj di vore tal setôr de istruzion, la scuele di chenti e funzionarà piês e i coscj, invezit di calâ, a cressaran ancjemò. Ducj cuancj, dentri e fûr dai palaçs, a àn marcât soredut une robe, ven a dî che chest al è un atac ae autonomie speciâl de nestre Regjon.

Chest argoment di fonde e ancje chês altris preocupazions che a son stadis pandudis a àn mani, a son justis e salacor sacris e santis. Cun dut achel a saltin fûr altris domandis in cont des scuelis e de specialitât regjonâl: chi di nô lis scuelis fasino ad in plen ce che a varessin di fâ? E ce robe ise cheste specialitât? Cemût ise? A ce coventie? Par fâ ce?
Cjalant in muse la realtât, si cjatin rispuestis che no son tant bielis, ni in cont di scuelis e USR ni par ce che al tocje la autonomie de Regjon e la maniere che cheste e ven doprade. Al è fintremai cui che al pense che nol è un mâl che nol sedi un ben, stant che no je diference tra Vignesie e Triest e che il gnûf ufici interregjonâl si clamarès dome «Veneto e Friuli».

La cuistion e je plui serie e la situazion des lenghis minoritariis e di chê furlane in particolâr te scuelis le sclarìs ad in plen, Su chest cantin, tai ultins agns, dutun cui sorestants regjonâi di prime e cun chei di cumò che no si àn ancjemò mots, l’USR nol à fat nuie e il Plan par fâ jentrâ il furlan tes scuelis, za clopadiç par so cont, nol è mai jentrât in vore.

Cussì, plui che difindi la autonomie regjonâl al covente metile in vore. Plui che difindi l’USR al covente contindi al Stât la competence primarie su la istruzion parcè che a une regjon speciâl e covente une scuele speciâl.

La Regjon e varès di movisi in cheste direzion, cemût che al à dit ancje cualchi conseîr regjonâl. Si movaraie? O sino dome cocâi speciâi?

EURO FURLAN
eurofurlan@gmail.com

15/11/2013

Standard
Articui 2013, Atualitât, Dome pal blog

Pieri Piçul e il piçul Pieri

Apontament cu la storie contemporanie dal Friûl, usgnot a Glemone.
L’Istitût Ladin Furlan “Pre Checo Placerean” e il Comun di Glemone – Sportel sorecomunâl pe lenghe furlane dal Glemonàs, inte suaze de rassegne ‘Puints 2013. Incuintris su lenghe, identitât e autonomie’, a inmanein l’incuintri di presentazion dal libri dedicât a bons. Pietro Londero (Pieri Piçul) ‘Un document pe storie. Pieri Piçul e la mozion dal clericât dal 1967’.
L’apontament al è a tacâ di vot e mieze, li de ex Glesie di S. Michêl, dongje dal Domo.

E somee une serade interessante, stant che a vegnin memoreâts un dai fats e un dai personaçs plui impuartants, almancul par nestri cont, dal secont Nûfcent in Friûl.
Pieri Piçul, par ce che al à fat tant che predi, insegnant, tradutôr e scritôr a pro dal Friûl, al merete calcolât un dai “Grancj” de nestre Patrie.
A viodi, a sintî e a lei ce che al fâs ogni dì chel so omonim che al crôt di jessi ‘Grant’ e fintremai il miôr, si capìs cetante diference che e je tra un Pieri Piçul e un piçul Pieri.
God save Friûl… dai furlans (o miôr, e soredut: di chei ‘padani’)

PS. A proposit… Tal blog o vin scrit tai dîs passâts in cont de Catalogne e de ‘Diada’. Chel argoment, cun cualchi zonte ancjemò che si pee ad in plen a chel di chest post, al ven frontât ancje tal articul saltât fûr vuê sul Quotidiano del Friuli-VG (www.ilquotidianofvg.it/getlatestpdf.php).
O podês leilu chi da pît.

11.09: UNE ZORNADE, TANCJ INOVÂI. DES ‘TWIN TOWERS’ AE ‘DIADA’ FINTREMAI AES CRONACHIS EUROPEANIS

Catalogne “is not padania”. E je Europe

Chê dai 11 di Setembar e je une date che e ufrìs diviers argoments di riflession. Cemût che si sin visâts un pôc ducj cuancj, ancje par vie des tantis manifestazions memorativis, al è stât l’inovâl dai atentâts dal 2001 fats di Al Qaida cuintri dai Stâts Unîts di Americhe e dal mont intîr. In chê dì cuatri scuadris di teroriscj suicidis a vevin dirotât cuatri avions par mandaju a sbati cuintri di obietîfs unevore sensibii, in tiermins simbolics e concrets: il Pentagon, colpît in maniere limitade, la Cjase Blancje, ma in chest câs no vevin rivât a jonzi il bersai, e lis tors zimulis dal World Trade Center, rivant a semenâ muart, terôr e devastazion tal cûr di New York e in direte televisive.

Ai 11 di Setembar al colave ancje l’inovâl dal golpe che tal 1973 al à viert la lungje ditature di Pinochet in Cile. In chest câs, cun dut de ricorince ‘taronde’, chel fat al è stât memoreât une vore di mancul, ancje se lis sôs consecuencis a son stât ancjetant significativis e dolorosis.

Ai 11 di Setembar al è ancje cui che al fâs fieste in memorie di un fat storic: a son i catalans che si visin di cuant che, in chê di, tal 1714, inte suaze de Vuere de sucession spagnole i borbonics a rivarin a ocupâ Barcelone e cun chel a scancelâ lis istituzions catalanis di in chê volte.

Cemût che o vin ricuardât ancje tal nestri blog (https://eurofurlan.wordpress.com) l’inovâl di chê disfate al è ocasion par pandi con braure sei un sens positîf di identitât che une volontât fuarte di autoguvier. Chest aspiet al à marcât soredut lis celebrazions plui resintis de ‘Diada’: chest an sù par jù un milion e sîscent di lôr si son dâts dongje inte ‘Via catalana’, une cjadene umane di passe 400 chilometris a pro de indipendence.
La manifestazion e à vût un impat planetari, sei sul plan politic che par ce che al tocje i media. In chest câs l’argoment al è stât frontât ancje dai media talians. La plui part di lôr lu à fat ‘a talian vie’, pontant la atenzion plui su la maiute cu la ‘estelada’ che a vevin intor i leghiscj in Parlament a Rome che su lis manifestazions catalanis e su lis lôr motivazions. Tant a dî: “Catalogna e Padania pari sono”. E invezit nol è cussì, par resons storichis, culturâls e politichis e i àn tignût a marcâlu ancje chei de Assemble Nacional Catalana, che a àn inmaneât la ‘Via’.

La ANC e à dât fûr un comunicât dulà che e à pandût la sô contrarietât e la sô preocupazion, marcant di cjatâsi de bande opueste rispiet a chel partît talian «di drete estreme, xenofobi e omofobi». Tant a dî: “Catalonia is not Padania”.
E o pensìn che al sedi il câs di tornâ a dî ancje: “Friûl is not Padania”.

Pluitost: Friûl e Catalogne a son Europe. Cun di fat ai 11 di Setembar il Parlament european al à fate buine une gnove risoluzion pe garanzie dai dirits linguistics e pe promozion des lenghis minoritariis e dal lôr ûs e insegnament tes scuelis. Ma i media talians no si son inacuarts di nuie.

EURO FURLAN
eurofurlan@gmail.com

20/09/2013

Standard
Articui 2013, Atualitât, Friulanofobie

La «friulanofobie» e fâs mâl. Si à di curâle

Tal Stât talian e je une incressite continue de intolerance e da prejudizis cuintri de diversitât. Il colôr de piel, la divignince etniche e nazionâl, la lenghe, la religjon, l’orientament sessuâl, magari cussì no, a son mutîf di discriminazion cun peraulis, oparis e omissions. De cuistion, par “merit” – si fâs par mût di dî – di un che al è stât ministri de Republiche taliane e che cumò al è vicepresident dal Senât, si è inacuart ancje l’Alt comissari pai dirits umans de ONU, cemût che o vin viodût pôcs dîs indaûr.

Razisim e intolerance si palesin in diviersis formis: de omofobie ae friulanofobie, cemût che o savìn ancje masse ben.
Tai dîs passâts o vin vude la ocasion di tornâ a lei e sintî cheste vecje e brute cjançon. Sul argoment al è saltât fûr, sul Quotidiano di vuê (www.ilquotidianofvg.it) chest articul, che cumò o podês lei ancje achì di sot.

Passe vincj agns indaûr ator pal Friûl al zirave un sproc antirazist, furlan e a pro dal furlan: «Nô o sin blancs, ma la nestre lenghe e je nere».
Al vâl ancje in dì di vuê. Cun di plui, daûr de gnove cjolte di posizion de bande de Cort Costituzionâl, o podìn zontâ ancjemò une frase: o podìn ricuardâ che «la nestre lenghe e je nere» e che «la nestre lenghe e je une lenghe».

LENGHIS E TUTELE. AL COVENTE LIBERÂSI DI PREJUDIZIS PATOLOGJICS. LU DÎS ANCJE LA CORT COSTITUZIONÂL

La «friulanofobie» e fâs mâl. Si à di curâle

«The song remains the same». No podevin fâ di mancul di vierzi chest intervent cuntune frase par inglês, che tra lis altris e je divierse di «the pen is on the table», ven a dî la uniche che te opinion di cualchidun (ce origjinalitât…) o saressin in stât di dî in tancj di nô. Nol è tant un omaç plui o mancul platât ai Led Zeppelin, cul riferiment al titul di un lôr film e di un lôr disc dal vîf. Pluitost al è un riclam esplicit a cualchidune des plui resintis manifestazions di chê patologjie, avonde difondude in Friûl e inaltrò tal Stât talian, che si pues clamâle «friulanofobie», là che «friulano» nol è il non di un vin, ma il non talian de lenghe furlane.
Cun di fat, in cont di dut chest, o varessin podût scrivi «A contin simpri chê dal ors», ma dopo vê cjapade ancje nô une piçule dose di chel virus, o vin pensât che dome se si scrîf par inglês, si vierzisi al mont…

In chescj dîs chestis e altris «tonterías» (sino o no sino plurilengâi?) si son sintudis e letis ator ben e no mâl.
Par esempli, uns vot dîs indaûr, su lis pagjinis dal “Fatto Quotidiano” («Tu quoque!». Sì, ancje par latin…): il furlan cuintri dal inglês, il furlan che al sarès un «dialetto», il furlan che nol covente, che al sarès une straçarie insegnâlu a scuele e doprâlu in ogni dontri…e chê e simpri chê. Stesse musiche in Consei regjonâl, cu la zonte de contraposizion, pardabon fastidiose, no dome tra lenghis ma ancje tra dirits di fonde: i dirits linguistics cuintri dai dirits dai lavorents («intant che a Ursinins di Çopule la Ideal Standard e siere, achì o fevelìn di furlan») e i dirits linguistics cuintri di chei dai disabii.

In ducj i câs «the song» e reste chê: friulanofobie imbombade di nazionalisim e di ignorance cence timp. Patologjie grâf, massime tal tierç câs, cemût che e mostre ancje la letare là che une conseire regjonâl dal M5S e sclarive lis motivazions, «altis», «modernis», «ecuilibradis» di chel emendament par spostâ inaltrò i bêçs pal furlan a scuele.
Su chel test o tornarìn tal nestri blog (https://eurofurlan.wordpress.com), pal moment si limitìn a un coment in struc: piês il tacon de buse.
E salacor piês ancjemò des peraulis di un sotsegretari dal guvier Monti che al definive la tutele des minorancis «questione di oneri aggiuntivi» e di chei tecnics dal guvier tecnic che un an indaûr te «spending review» a vevin fat fîs e fiastris tra minorancis di serie A e di serie B.

Sun chê robe cence sens si à esprimude ancje la Cort Costituzionâl cuntune sô sentence dade fûr ai 18 di Lui, marcant propit chês sôs cualitâts e il fat di jessi discriminatorie viers de comunitât furlane. Tant a dî che la friulanofobie e fâs tant mâl, ma che si pues vuarî: al baste informâsi e documentâsi, liberâsi di lûcs comuns e prejudizis e meti in vore lis leçs cemût che al covente. Par cognossi e doprâ plui lenghis. Par vê plui dirits. Par jessi plui citadins e plui personis.

EURO FURLAN
eurofurlan@gmail.com

26/07/2013

Standard
Articui 2013, Atualitât

“Botteghe Oscure” di chenti…

Al è jessût vuê su Il Quotidiano del Friuli-VG”. Velu chì!

IL “BRAND” MIÔR. PAR FÂSI COGNOSSI E RICOGNOSSI ATOR AL COVENTE TIRÂ FÛR LA LENGHE

“Botteghe Oscure” di chenti e altris provincialisims

Si visaiso di “Botteghe Oscure”? No fevelìn dal innomenât palaç di Rome, sede dal PCI, ma o fasìn riferiment al titul di une rubriche dal periodic satiric “Cuore”, che dal 1989 al 1996 al è stât il sfuei di “resistence umane” a nivel talian. Chê rubriche e jere dedicade aes insegnis des buteghis e aes denominazions des impresis plui fantasiosis e une vore dispès ancje plui assurdis. La idee e jere chê di dâ spazi a chei nons, magari intun inglês fantasiôs e clopadiç, che a tacâ di in chê volte si cjatavin in ogni dontri. L’intindiment al jere dâ cont dal spirt dai timps e menâ ator chê tindince che e je lade indenant fintremai al dì di vuê.

Lant ator pal Friûl, nus ven di pensâ avonde dispès che une rubriche di cheste fate e cjatarès ancje cumò nons, buteghis e vitrinis di contâ. Un câs emblematic al è chel di chê iniziative imprenditoriâl, che tal invier passât e à viert un so spazi propit tal centri di Udin, in Place dai Grans. Cualchidun al podarès dî che a son tancj nons une vore piês di chel e o sin in cunvigne cun cheste osservazion, ma si permetin di tignî cont di “Eat Friuli” propit par vie che daûr di une denominazion flape (piês ancjemò se e fos stade “Eat FVG”) al è progjet interessant. Cun di fat, cemût che si lei ancje tal sît internet, la societât e ten dongje diviers produtôrs di chenti che si dan adun par promovi i lôr prodots tal setôr enogastronomic, marcant la lôr ecelence, la lôr tipicitât e la lôr cualitât. Pecjât che lu fasi cuntun non – un “brand”, cemût che a disin i esperts – che al somee une copie smavide di chel de innomenade cjadene di buteghis inventade di Oscar Farinetti e che al sune sù par jù compagn di chel di iniziativis similârs inviadis inaltrò. Mancul mâl che e je la peraule «Friuli», però ancje tal test des declarazions programatichis fatis passe dîs agns indaûr di un president de Regjon Sardegne si cjatave ca e là la peraule «Sardegna», ma si si fevelave di Alps e des undis provinciis de Lombardie…

A coventaressin plui cûr e plui snait e une vore di mancul di chel provincialisim che al puarte in maniere automatiche a simiotâ modei talians o forescj, fintremai a clamâ “musetto” chel che al è il muset e duncje a clamâ “Eat Friuli” ce che al podarès jessi clamât doprant ancje peraulis golosis tant che “Bon”, “Gust” e “Friûl”. Ognidun al à la libertât di dâsi il non che al à miôr, però soredut te promozion de nestre tiere, dai siei prodots e de sô ufierte turistiche, par marcâ pardabon tipicitât e cualitât, al coventarès doprâ di plui e miôr, in maniere visibile, creative e normâl, lis sôs lenghis, che a son par nature une marcje di tipicitât.

Al è par chest che e sune simpri plui provinciâl e vecje chê cjançon che e met une cuintri di chê altre lis lenghis: il furlan, l’inglês, il talian… Vuê a coventin dutis chês e altris ancjemò: par capî, par fâsi capî e soredut par fâsi cognossi e par fâsi ricognossi.

EURO FURLAN
eurofurlan@gmail.com

Standard
Articui 2013

Lenghis e sport: a pro dal sport, des lenghis e dai dirits

La scuadre di balon feminin dal Tavagnà sabide stade e à vinçût la Cope Italie. In cualchi maniere i vin puartât bon ancje nô stant che vinars al è saltât fûr su IL QUOTIDIANO DEL FRIULI-VG un nestri articul che al fevelave propit di chest sport là che il Friûl a nivel talian al è presint cun trê scuadris (Tavagnà, Cjasielis e Pordenon) e soredut cuntune di chês al rive a vê risultâts sflandorôs.

O publichin il toc ancje tal blog, par tornâ a fevelâ di lenghis e sport: un argoment par nestri cont une vore impuartant, daûr di diviersis cjaladuris, ch magari cussì no la nestre societât e soredut il mont sportîf di chenti no àn rivât a frontâ inmò cun snait e cun sintiment.
Saraial ancje par vie che la cuistion e je stade frontade intune cunvigne estemporanee là che la robe plui “a teme” – si fâs par mût di dî – e je stade la performance coreutiche di un (ex) assessôr regjonâl?

ILFRIÛL AL VA IN EUROPE CUL UDIN E CUL TAVAGNÀ. RIVARAIAL A FÂ COMPAGN ANCJE CUL FURLAN?

Cualchi proponiment pe gnove stagjon

«Non ci sono più le mezze stagioni», si dîs par talian. Se lis robis, sul plan metereologjic a van indenant cussì, chi di un pôc si zontarà che no esistin plui nancje lis stagjons interiis. E la uniche stagjon che e restarà e je chê sportive, chê agonistiche. Par esempli chê dai campionâts talians di balon, che ai nivei plui alts a son finîts che nol è tant. E che par ce che al tocje il Friûl – o scugnìn dîlu cun plasê – nus àn dât ancje chest an cualchi biele sodisfazion. Cui che al lei al pensarà daurman al finâl di campionât gloriôs dal Udin vuidât di Francesco Guidolin. E je vere, ma lis sodisfazions no si fermin alì. Cun di fat a tocjin ancje il balon feminin, che al viôt il Friûl rapresentât di ben trê scuadris: Tavagnà, Cjasielis e Pordenon.
Dutis trê si confermin in serie A, intant che il Tavagnà, secont in classifiche, al larà ancje in Champions League, cence dismenteâ che chê stesse scuadre furlane e à di zuiâ juste doman la finâl di Cope Italie cuintri dal Verone. Si fevele pôc des feminis che a zuin di balon e chest al è un pecjât: al è un moviment sportîf interessant che al merete atenzion, e no dome par vie che chi di nô al rive ancje a jonzi risultâts pardabon impuartants. Un proponiment pe prossime stagjon…

In spiete di viodi cemût che e larà a finîle doman a Forlì, al merete tornât a fâ un pensament sul finâl de stagjon dal Udin, che al à sierât il so campionât in cuinte posizion e al è rivât adore a tornâ in Europe. Al è un risultât che daûr di cemût che e jere tacade la stagjon a jerin in pôcs a spietassal e che vie pal an la stesse societât e l’alenadôr di Castelfranco a mostravin di no crodîi masse. A un ciert pont al è cambiât alc e cussì e à sierât la stagjon cuntune schirie di risultâts positîfs, cun vot vitoriis une daûr di chê altre, cul conciert sinfonic li de “Scala del calcio” a Milan e cu la fieste a Udin.
Cumò si à di fâ in maniere di no straçâ chest patrimoni di energjiis e di risultâts. Parcè che al è biel lâ in Europe, ma al è ancjemò plui biel restâ in Europe. Sperìn che l’Udin al vedi la scuadre che e covente.

Nus plasarès che l’Udin al les in Europe ancje daûr di altris cjaladuris. Timp indaûr, propit su chestis pagjinis, o vevin za scrit alc su cetant che al sarès biel he l’Udin al someàs un tic di plui al Barcelona o al Athletic Bilbao par cemût che chês scuadris a rapresentin chês comunitâts e chei teritoris, doprant te lôr comunicazion uficiâl e dentri dai lôr implants sportîfs lis lenghis propriis des lôr tieris e de lôr int. Si visaràno di chest aspiet, par esempli cumò che a varan di tornâ a fâ sù il stadi? O pensìn che ce che si lei tes declarazion programatichis dal sindic Honsell – che la lenghe furlane e je un valôr, un dirit e une oportunitât – al vali pe citât, pal Friûl, pe sô int e ancje pe sô scuadre di balon. Un altri proponiments pe gnove stagjon.

EURO FURLAN
eurofurlan@gmail.com

01/06/2013

Standard
Articui 2013

Ancjemò chê dal ors

Tornait a lei chest articul, saltât fûr ai 8 di Març di chest an. Di un ciert pont di viste al somee jessi passât un secul, cun dut che chei fats e chês cjoltis di posizion a meretin simpri jessi tignudis in cont.
Di chê altre bande, lis declarazions dadis fûr dal president de Provincie un pôcs di dîs indaûr in cont de simpri plui fantomatiche Agjenzie europeane des lenghis minoritariis a rindin chest toc ancjemò atuâl, no dome tant che un “promemoria”.

BALOTIS E VERETÂTS. LA AGJENZIE CHE NO ESIST E CUI CHE I FÂS CUINTRI A DIRITS E AUTONOMIE

Fantasimis, macroca**dis e straçariis

Ogni ete e à lis sôs fantasimis. Tal 1848 Karl Marx e Friedrich Engels a scrivevin che ator pe Europe al zirave il spirt dal comunisim. Di sù par jù cinc agns incà in Friûl, almancul intes peraulis di un pôcs di lôr, e zire la fantasime de cussì clamade Agjenzie europeane pes lenghis minoritariis. Autôrs di cheste liende metropolitane furlane a son un trop di politics dal centridrete, atîfs a nivel regjonâl e no dome, che le tirin fûr ogni volte par jemplâsi chê bocje che par solit e je vueide di peraulis di sest in cont di Europe, Friûl, lenghis e dirits linguistics.

Il prin al jere stât Franco Frattini, intant de campagne eletorâl pes politichis tal 2008. L’ultin de serie, che e cjape dentri sei chei dal Pdl che i verts padans, al è il candidât sindic di Udin di chê coalizion, che pôcs dîs indaûr al à fat indenant la propueste di meti la fantomatiche Agjenzie a Udin, te ex sede de Bancje di Italie, intant che pal assessôr regjonâl De Anna chê stesse Agjenzie e varès di vignî logade a Passarian, in Vile Manin, cuntune sede ancje in Slovenie.

Silvana Schiavi Fachin, che tant che esperte di plurilinguisim e professore universitarie di inglês e di didatiche des lenghis, e cognòs avonde la Europe, lis istituzions europeanis e la lôr azion in cont di diversitât linguistiche, tutele des minorancis, culture e istruzion, e à fat zirâ une note, in rêt e pe stampe. Di chê al salte fûr che, di ce che i à fat savê Belèn Bernaldo de Quirós, de Unitât pal multilinguisim de Comission europeane, no esist e no esistarà nissune Agjenzie de UE pes lenghis, ni in Friûl ni inaltrò, e che la candidature fate indenant di pueste tal 2005 no jere stade cjapade in considerazion, stant che tal Stât talian a son za altris dôs agjenziis europeanis.

Par fâ i “ghostbusters” i voleve dade une voglade a Bruxelles, cun dut che al è za avonde clâr cetant che a son lontans de Europe e dal Friûl de diversitât linguistiche e culturâl i nestris (?) sorestants logâts a Triest (e no dome). Al baste pensâ a ce che al è saltât fûr des conferencis regjonâls su furlans e slovens, des previsions des finanziariis regjonâls dai ultins agns e de mancjance sostanziâl di une politiche linguistiche serie. Dut chest al cjate une sô rapresentazion tes declarazions fatis di Tondo la setemane stade a Radio Tri(e)ste, là che il “governatore” al vût dit che la tutele de lenghe furlane e je une «ca**de» e une straçarie, palesant la sô mancjance di rispiet, ancjemò prin che pai furlans e pal furlan, pe Costituzion, pal Statût regjonâl, pe normative di tutele, pai dirits linguistics, par principis democratics di puartade universâl.

A proposit di ca**dis e straçariis, ve ca dôs domandis. Ce fasevial il president de Regjon autonome Friûl-VJ a Sirmione ai 16 di Fevrâr? Cui aial fat il pat cun Tremonti che al oblee la nestre Regjon – ven a dî ducj noaltris – a dâi al guvier talian 370 milions ad an in cambi di nuie?


EURO FURLAN
eurofurlan@gmail.com

08/03/2013

Standard