Articui 2011, Atualitât

Balon, balis e bufulis. Memorie, sperance e avilizion

Ve chi un articul saltât fûr doi agns indaûr, tal mês di Otubar dal 2011.
A son altris timps e no dome par vie che l’Udin al à tacât malut la stagjon, cul pericul di jessi parât vie de Europa League dopo de partide di Joibe stade a Triest cul Slovan Liberec e cu la sconfite patide a Rome cuintri de Lazio.
O viodarìn chi di cualchi setemane se al sarà alc di plui di Friûl e di furlan a Friuli Doc. E se tes scuelis si sintarà ancjemò l’impat de gjestion de scuele fate di cui che al veve chê di cori dentri te galarie tra il Gran Sasso e Gjinevre e dai tecnics e dai politics che no rispietin lis leçs e la Costituzion. O sperìn che al sedi alc di miôr, ma o vin pôre che soredut a scuele la ande e resti chê dai ultins agns. Sperìn in ben.

LENGHIS. IN EUROPE SI FÂS FIESTE, IN FRIÛL SI DISMENTEE IL VALÔR DI FURLAN, SLOVEN E TODESC

Tutele des minorancis e scuele pierdudis te galarie tra Gran Sasso a Gjinevre

Mancul mâl che al è l’Udin! La scuadre di balon furlane e je prime in classifiche tal campionât e e je ben metude ancje te Europa League. Chescj fats, par lôr cont, a son za alc e ce, ma salacor a deventin ancjemò plui impuartants intal contest gjenerâl.
O savìn che, par doprâ lis peraulis di mister Guidolin, o varessin dut câs di «stâ calmuts» e di pensâ che cumò a mancjaran dome vincjenûf ponts par rivâ a chê «cuote cuarante» che si à di jonzi par restâ in serie A ancje l’an che al ven. Però no podìn fâ di mancul di gjoldisi il moment e il fat che il blanc e il neri udinês, e cun lôr il zâl e il blu furlans – che magari cussì no no si viodin tes divisis di chel che ogni tant nus samee pardabon il nestri Barça o il nestri Athletic Bilbao – a sedin cussì lusints e sflandorôs nus permet di frontâ miôr il grîs che, a pet des cundizions atmosferichis, al è il colôr dominant di chestis zornadis.

O vin iniment, par esempli, il lunc “day after” di Friuli Doc cul dibatiment a tantis vôs, sù par jù compagnis, là che al saltave fûr che al jere stât dut un sbevaçâ e barufâ. Di chest pont di viste, si podarès dî une “no notizie”, stant che di simpri si fevele di cheste kermesse tant che di «Friuli Cjoc». Magari cussì no, no je une novitât che no sin plui bogns, massime cualchidun, di fâ fieste, di stâ insieme, gjoldint dal mangjâ ben e dal bevi bon: lu vin za viodût sei a Friuli Doc sei inaltrò.
Si è dit che e coventarès plui culture: juste, di chê no ‘nd è mai avonde. O crodìn ancje che, in particolâr, al coventi plui Friûl, magari ancje par che al sedi pardabon Doc e un pôc mancul Cjoc. Chest al vâl sei pe forme, cu la publicizazion di dute la manifestazion ancje par furlan, par sloven e par todesc, sei pe sostance, cun events e iniziativis specifichis.
Al va dit che cualchi piçul pas indenant al è stât fat. Par esempli, e jere une postazion mobile di Radio Onde Furlane e i siei gjornaliscj a ziravin ator par stands e taulis a intervistâ la int di ca e di là dai bancuts e te programazion musicâl tra un redivîf Umberto Tozzi e une cover band, a àn cjatât spazi ancje Ulisse e i Ciclopi e i Arbe Garbe. Par sigûr un pas indenant rispiet ae “Notte Bianca”, là che la atrazion plui grande in Place Sant Jacun e jere «la tribute band ufficiale di Lucio Battisti»…

Al è clâr che compagn che pal vin e pal mangjâ ancje pe lenghe e pe culture nol è avonde che a sedin furlans. La lenghe si à di doprâle ben e cu la lenghe si à di fâ alc di bon.
E al è chi che la situazion no je dome grise: e je ancje grivie. In ducj i cjamps, ma soredut te istruzion. L’an scolastic al è partît e par un altri an no si sa cemût che a vignaran metudis in vore lis leçs di tutele, intant che a Migjee e je stade scancelade ancje la prime elementâr, cuintri de leç, de Costituzion e dal bon sens. In ocasion de Zornade europeane des lenghis, però, o vin rivât a capî parcè. Lu à sclarît la ministre Gelmini: lis minorancis linguistichis e la scuele in gjenerâl si son pierdudis te galarie che e va dal Gran Sasso a Gjinevre.

EURO FURLAN
eurofurlan@gmail.com

03/10/2011

Standard
Articui 2011, Atualitât, Friulanofobie

No TAV, Sì FUR

Si torne a fevelâ di TAV te Basse Furlane. Achì, compagn che inaltrò, la int e palese di jessi cuintri de grande opare par resons pratichis e no par vie de cussì clamade sindrome NIMBY.
Cun di fat, stant che in Slovenie al somee propit che no si fasarà, si si domandisi parcè si aial di fâ dut chest batibui te tiere tra i flums Livence e Timau: par fâ cori un pôc plui svelts un pâr di trens di Vignesie a Triest, che tra lis altris no fasaressin nancje une fermade par dut il Friûl?

Tra i sorestants di chenti a son chei (pôcs) che lu vuelin parcè che a son convints (ma no si sa ben di ce e parcè) e chei che a disin di volêlu, magari par lâ daûr dai ordins di scudarie che a rivin dal partît o dal sponsor, ma in realtât a’nt fasaressin di mancul. Anzit, chescj (o almancul la plui part di lôr) a saressin convints che nol covente, che al coste masse, che al è di bant e soredut che no son i bêçs par fâlu, ma a scuegnin mantignî une cierte posizion, intant che a sperin che no si fasi nuie e che al massim al vegni fat cualchi alc par potenziâ la linie esistente, che tra lis altris e risulte doprade dome pal 40% de sô potenzialitât.

Che no sedin bêçs e che al sedi une opare che no covente e che sigûr no vâl ce che e coste in tiermins di risorsis invistidis e di savoltament dal teritori lu àn dit za timp indaûr ancje personaçs che si podarès definîju “insospetabii”, cemût che o ricuardavin bielzà ta chest articul, saltât fûr tal Istât dal 2011 su Il Quotidiano (www.ilquotidianofvg.it).

Lu publichìn chi disot parcè che nus somee une vore atuâl. No dome in cont dal TAV ma plui in gjenerâl in cont di cemût che si puedin straçâ o invistî lis risorsis publichis, se si bade ai interès di pôcs o ai dirits di ducj.
Nus somee une vore atuâl ancje se si ten cont dal virus de friulanofobie che in chestis setemanis si palese une vore a fuart e al plate – si fâs par mût di dî – la sô sostance fate di prejudizis, ignorance, provincialisim e nazionalisim esasperât daûr di une muse resoneristiche, economicistiche e sparagnine.
Tant a dî: No TAV, Sì FUR (‘fur’ al è codiç internazionâl ISO 639-3 de lenghe furlane).

ESPERIENCIS E DÂTS A SUGJERISSIN UNE MANIERE DIVIERSE DI PROGJETÂ E FÂ SÙ LIS GRANDIS OPARIS

TAV. Ise cuistion di mobilitât, velocitât o aviditât?

Ai prins di Lui si è davuelte tal Friûl di Mieç une manifestazion di caratar culturâl che e veve chê di meti dongje e di confrontâ la realtât furlane e chê dal Piemont. Tai articui di presentazion di chê iniziative si ricuardavin, diviers elements di colegament tra il Friûl e chê regjon taliane. Par sigûr al è stât dismenteât un altri aspiet che, massime in chescj ultins agns, al ten dongje a fuart e a palês Friûl e Piemont: in ducj doi i câs a son teritoris che a son stâts savoltâts, e a son daûr a tornâ a jessilu, par vie de costruzion di grandis infrastruturis e di gnovis oparis publichis e che e je int che si organize par fâ cuintri a chescj progjets.

A saltin fûr daurman denant dai voi il TAV, il tren a alte velocitât, là vie te Val di Susa, ma ancje chi di nô, te Basse, o lis gnovis autostradis che ogni trop al ven fûr che si varessin di fâ, tra Cimpiel, Secuals e Glemone e tra la Cjargne e il Cjadovri, o ben ancjemò i eletrodots che di nord a sud e di soreli jevât a bonât a varessin di tressâ la Patrie.

Tai dîs passâts e je vignude fûr su internet (http://altofriuli.com/discussioni/la-val-canale-canal-del-ferro—la-nostra-val-di-susa-.htm) une riflession interessante fate di Franceschino Barazzutti, za president de Associazion dai Sindics de ricostruzion dal Friûl, propit su chescj argoments, tornant indaûr ae costruzion de autostrade di Damâr a Tarvis e al rignuviment de linie feroviarie che e passe in Cjanâl dal Fier e Val Cjanâl e e va in Austrie. Al ven fat, in particolâr, un belanç su la ferade, che al è positîf dome in part.
Se si gjave la vision di partence, daûr de prevision dal disvilup de integrazion economiche e politiche cu la Europe centriorientâl, il rest al è falimentâr: pal impat ambientâl e socioeconomic de opare, pal fat che la comunitât locâl e à subît in maniere passive chê infrastruture e soredut pal fat che la linie no je stade mai doprade ad implen.

Cheste prospetive negative e je chê che si palese, magari cussì no, ancje pal TAV. La Val di Susa za cumò e je tressade di une autostrade, di dôs stradis statâls e di une linie feroviarie, ancje chê doprade une vore di mancul di ce che si podarès. Cun di plui a son diviers studis che a mostrin che al è un progjet vecjo, prontât passe vincj agns indaûr, che nol ten cont dai flus di trafic reâi e potenziâi, che al coste une sdrume di bêçs e che al sarà fûr scjale ancje cuant che al vignarà finît. In struc: al coste tant e al rint pôc.

Chel stes al salte fûr ancje chi di nô: a part la mobilitazion popolâr par fâi cuintri, i dams ambientâi e i coscj, daûr dai studis di diviers esperts indipendents, al è stât il stes ad di FS, Mauro Moretti, a declarâ in public, timp indaûr, che il TAV, dopo Vignesie, al sarès dibant, su la fonde di criteris economics. Al sarès pardabon di pensâi parsore, di meti dongje dut ce che al covente par capî e decidi pardabon no dome cemût ma ancjemò prime se si àn di fâ cierts intervents.
Pe vite, pai dirits, pal disvilup e pe mobilitât di ducj. E no dome pe aviditât di cualchidun.

EURO FURLAN
eurofurlan@gmail.com

18/07/2011

Standard