Atualitât, Politiche

La Patrie, la Fieste e la propueste di leç regjonâl

Tra mancul di un mês e sarà une altre volte la zornade dai 3 di Avrîl, la “Fieste de Patrie dal Friûl”.
O pensìn che chê date e sedi impuartantone pal Friûl, no dome te sô storie e pe sô storie, ma ancje pal so avignî. Lu vin za scrit plui voltis, cemût che si pues lei achì e achì.

In chescj dîs propit la cuistion de “Fieste de Patrie” e je une vore di atualitât tal dibatiment politic e mediatic. Cun di fat, chê propueste di leç regjonâl par memoreâ la “Fieste de Patrie dal Friûl” fate indenant un an indaûr di trê conseîrs regjonâi e je stade frontade che nol è tant inte Comission pe culture dal Consei regjonâl e in curt si varès di discorile e di fâle buine.

Par dut chest nus somee di sest tornâ sul argoment e provâ a fâ un pâr di domandis e cualchi resonament.

La prime domande e je cheste: «Covential memoreâ l’inovâl de atribuzion dal podê temporâl al patriarcje Siart de bande del imperatôr Indrì IV?»
La rispueste no pues che jessi afermative, cemût che o vin za scrit.
In cont des motivazions a pro, o zontin ancjemò la segnalazion di altris riflessions su la cuistion che si cjatiin rêt.

Velis chi:
http://www.lapatriedalfriul.org/wp-admin/
http://www.lapatriedalfriul.org/?p=8777/
http://www.istitutladinfurlan.it/fiestedepatrie/
http://www.friulinelmondo.com/assets/files/anni_2000/570-03-2002.pdf
http://ladinsdalfriul.blogspot.it/

La seconde domande e je: «Coventie une leç di pueste par memoreâ la “Fieste de Patrie dal Friûl”?».

Di un ciert pont di viste, si podarès dî che une leç di pueste no je prioritarie. Prime di meti dongje une gnove leç, al sarès miôr meti in vore ben une schirie di leçs regjonâls (par esempli chês che tocjin la tutele des minorancis linguistichis furlane, slovene e gjermaniche) che, cundut che a son formalmentri in vore za di agns, a son ancjemò daûr a cirî une vere aplicazion.

Cundut achel, si podarès ancje zontâ che une formalizazion normative de “Fieste de Patrie dal Friûl” no sarès mâl. Se la memorie no nus tradìs, par esempli, in Sardegne “Sa die de sa Sardigna” e ven memoreade propit daûr di une leç regjonâl…

Però al è un però. La leç regjonâl pe “Fieste de Patrie dal Friûl” e à di jessi fate ben: e à di jessi pe “Fieste de Patrie dal Friûl” e no par alc altri. Magari cussì no, nus somee che il test – sei inte sô version origjinâl, sei chel jessût fûr de Comission – al fasi avonde confusion. Par chel, se nol cambie, al podarès fâ ancjemò plui dams.

In particolâr vie par dut il test (e ancje tal dibatiment e tes cjacaris che di chel a son buridis fûr) si confont il Friûl, che e je chê entitât storiche, gjeografiche e teritoriâl, che propit a tacâ dai 3 di Avrîl dal 1077 e cjapave sù une sô specifiche autonomie politiche e istituzionâl e e rinfuartive la sô unitât e unitarietât, cul teritori dulà che si fevele par furlan, che di chel Friûl al è dome une part.

Duncje l’ambit di atuazion de leç su la Fieste de Patrie nol pues jessi chel dai comuns zonizâts pe lenghe furlane, ma chel che al cjape dentri – almancul pes competencis del Regjon autonome Friûl-VJ, che no tocjin ancje il Mandament di Puart – ducj i comuns che in dì di vuê a son tes provinciis di Pordenon, di Udin e di Gurize.

La Fieste de Patrie dal Friûl e je la fieste di une Patrie che no je «ni piçule ni extralarge»; e je la fieste di un Friûl unitari sul plan storic e gjeografic, la fieste di un Friûl che propit in chei trê secui e mieç al definive il so profîl multietnic e multilengâl e duncje la fieste di un Friûl – furlan, sloven, todesc e talian – che ae europeane vie si pues definîlu «unît inte diversitât» e che al è “Patrie”, ven a dî “cjase” e “tiere”, di ducj chei che culì a vivin.

Se no si comede chest fal di fonde de propueste di leç, il pericul al è chel di fâ dam al Friûl intîr e soredut al Friûl di lenghe furlane, stant che cualchidun al podarès pensâ che la tutele dai dirits linguistics si pues fâle cul permeti di meti fûr une bandiere une dì ad an e cul fâ cualchi incuintri, conference o studi sul stât patriarcjâl, lassant in bande la metude in vore, pardabon, de L.R: 29/2007.

Tal dibatiment di chescj dîs a saltin fûr diviersis manifestazions di chest pericul: a son tendincis di veteronazionalisim talianon miscliçadis cun campanilisims di ogni sorte, là che si palesin pôre de diversitât, pôre de storie, pôre dal avignî e pôre dal Friûl, che si zontin cun chê friulanofobie e cun chê slovenofobie che o cognossin za masse ben.

Cence dismenteâ il fat che propit te costruzion dal profîl multietnic e multilengâl dal stât patriarcjâl e cjate spazi ancje la definizion de fisionomie origjinâl de lenghe furlane, la “Fieste de Patrie” no pues jessi dome la fieste de popolazion di lenghe furlane. E à di jessi la “Fieste dal Friûl”: di dut il Friûl e dal Friûl di ducj.

In chest sens no pues jessi nancje la Fieste de Patrie “friuliveneziagiuliana” – e chest al è un altri pericul – parcè che no esist: une robe a son la storie e la «invenzion de tradizion»; une altre la ignorance e la mistificazion.
Però, propit tant che “Fieste de Patrie dal Friûl” (e vonde) e podarès jess alc di bon ancje par chê part de regjon Friûl-VJ che no je Friûl. In non de storie, de diversitât linguistiche e culturâl, des relazions tra la “Patrie” e chei altris teritoris, in chê volte e in dì di vuê.

Par chest la leç su la “Fieste de Patrie dal Friûl” e à di jessi clare e juste. A pro di dut il Friûl, dal Friûl di ducj e dal Friûl cun ducj. Cence pôre che al sedi Friûl.

Advertisements
Standard
Atualitât

Une altre biele gnove pal Friûl

A proposit di bandieris e di bielis gnovis. Nus àn segnalât che chê altre dì a Sacîl di Rude, in ocasion de manifestazion in ricuart dai siet partigjans de Intendence Montes copâts dai nazifassiscj, a jerin ancje chês de Patrie.

Nus fâs plasê. O calcolìn chest fat tant che alc di positîf e tant che une altre biele gnove.

In spiete di viodi ancjemò plui bandieris dal Friûl in ocasion dai 25 di Avrîl e dal prin di Mai, cemût che o scrivìn za di cualchi timp.

Standard
Atualitât, Friulanofobie, Politiche, Scuele

Un velo pietoso

In Italie e plui in gjenerâl tal Stât talian – cemût che o savìn ben achì in Friûl – si fâs pardabon une fature mostre a rispietâ la diversitât e ancjemò prime a dâi acet e a ricognossile.

Di chest o vin vût conferme ancjemò cuindis dîs indaûr, in particolâr in doi setôrs – chel dal sport e chel de scuele – che impen a varessin di vê une funzion strategjiche propit a pro dal disvilup di relazions tra lis personis e duncje a pro de integrazion, de educazion, de convivence e de citadinance.

Di une bande a son lis declarazions fatis in ocasion de ultime edizion dal Torneu di Viareggio de bande dal innomenât alenadôr di balon Arrigo Sacchi. In cont di chês peraulis, che a fasin vignî i sgrisui, si cjatìn ad in plen in cunvigne cu lis riflessions fatis indenant di Max Mauro tal so blog, che us conseìn di lei.

Di chê altre e je la circolâr dade fûr de bande dal preside dal Istitût Malignani di Çarvignan, che al ten dongje plui scuelis superiôrs de Basse Furlane, cul diviet di «ostentazione» e «esibizione» dai «segni esteriori della propria confessione religiosa», cun riferiment al «fazzoletto o velo che copre talvolta il capelli e parte del viso delle ragazze mussulmane», parcè che «può essere colta come una provocazione e suscitare reazioni di ostracismo, disprezzo o rifiuto».

Leint chestis peraulis al vignarès di domandâsi se ancje une colane cuntune crôs si pues calcolâle tant che une ostentazion dai «segni esteriori della propria confessione religiosa». Ma no dome: daûr de insistence fate te circolâr sul argoment de «provocazione», e salte fûr une pôre de diversitât che e fâs vignî i sgrisui.
Al è un ategjament che si cjate in tantis ocasions. Vêso inaments frasis tant che «Non sono razzista, è lui che è negro (o zingaro)…!», «Non sono omofobo, è lui che è frocio…!», «Non sono contro la lingua friulana, ma non può essere usata in pubblico e insegnata a scuola….» ?. La cuistion e je simpri chê: la pôre de diversitât.

Il fat di Çarvignan al à fat une vore di scjas, a son intervignûts i vertiçs istituzionâi de scuele (l’Ufici scolastic regjonâl) e il Garant regjonâl dai dirits de persone e cussì la circolâr e je stade ritirade. A chest pont o podaressin fevelâ di chest fat dome “al passât” e duncje «stendere un velo pietoso». In realtât al è ben no pierdi di viste la cuistion, stant che e je impuartantone e penze e che no tocje dome il vêl…

Nus somee interessant, a chest pont, viodi ce che al saltarà fûr tal incuintri che si fasarà li dal liceu “A. Einstein” di Çarvignan ai 9 di Març.

E nus ven su ancjemò une domande: tal câs de circolâr dal Malignani l’Ufici scolastic regjonâl e il Garant regjonâl dai dirits a son intervignûts daurman e a àn fat ben. Parcè no àno fat (e no fasino) compagn tal câs de friulanofobie des nestris scuelis?

Standard