Articui 2011, Atualitât, Politiche, Storie

E dopo de Fieste de Patrie, metìn fûr la bandiere dal Friûl ancje pai 25 di Avrîl, pal Prin e pai 9 di Mai

Lu vevin scrit za uns pôcs di agns indaûr e o tornìn a publicâlu cumò, tal 2016, dopo de Fieste de Patrie e pôcs dîs prime de Fieste de Liberazion. Ve chi un articul dal 2011 che al tocje i 25 di Avrîl, il prin di Mai e i 9 di Mai.
Trê fiestis furlanis, pe storie ma ancjemò di plui pe atualitât e pal avignî. Zornadis che si varès di meti fûr la bandiere dal Friûl. Cence dismenteâ nancje il cuarantesim inovâl dal taramot dal 1976

RESISTENCE, LIBERAZION, EUROPE, FRIÛL. CUANT CHE IL LUNARI AL JUDE A CAPÎ

Prin di Mai, 9 di Mai e 25 di Avrîl: fiestis furlanis

Ogni mês si fâs la lune e ogni dì si impare une. Cun di plui, ogni dì, o almancul ogni setemane, a son un inovâl o une ricorence di memoreâ. Il lunari, massime chest an, al ufrìs une schirie di datis che a son pardabon impuartantis, o ben che cussì a vegnin calcoladis.

La ocasion par fâ fieste e soflâ dentri de trombe de retoriche e ven simpri cjapade sù, in cualchi câs ancje cuntun boreç che al somee in chel stes moment masse esagjerât e masse pôc justificât. Chês par ricuardâ, capî, resonâ, discuti, cognossi e pensâ, invezit, si lis cjape sù con mancul facilitât.
Lu vin viodût plui voltis propit in chescj ultins mês. Su chest sfuei o vin za marcât, un mês indaûr, cemût che ancje pai 3 di Avrîl, moment bon par pandi une braure furlane libare, positive e dinamiche, nol è mancjât cui che al è rivât a esprimi il so “Furlan Pride” dome a sotan vie: poleç e no acuile.
No si podeve pratindi miôr cualchi setemane prime, pai 150 agns de proclamazion dal Ream di Italie: anzit, al à fat maravee che al sedi stât almancul un piçul svôl di acuile, ancje se in realtât al jere chel di un dordul.
Par no fevelâ de memorie platade, e tornade a discuvierzi, de “Joibe Grasse” dal 1511. In chel câs la fieste e je stade fate ma la retoriche e je lade inte direzion contrarie e cussì al è stât dit che al jere un fat storic impuartant ma che no si veve di fâ masse scjas par vie di dute chê violence e dut chel sanc. Propit chest an che a massalicis e becjârs ur vegnin garantididis cetantis celebrazions “in pompa magna”!

Une ocasion che e je buine par ricuardâ, resonâ e fâ fieste, cun sintiment e cence pôre, e rive de zornade di vuê. Propit ai 9 di Mai al cole l’inovâl di chel che al ven calcolât tant che l’inviament concret de costruzion de unitât europeane. In chê dì dal 1950 il Ministri pai afârs forescj dal Stât francês, Robert Schuman, al veve sclarît che cul metisi adun si podeve sghindâ il pericul di gnûfs conflits e creâ lis cundizions par un bon disvilup economic e sociâl e pe incressite de democrazie. Un an plui tart e nassè la Ceca (Comunitât europeane dal Cjarbon e dal Açâl) e di in chê volte, pûr tra contradizions e dificoltâts, o sin rivâts ae Union europeane di cumò. Forsit chest nol è il moment miôr pe Europe, cundut achel cheste dimension, che no pues esisti cence pâs, dirits, unitât e diversitât, e reste chê di riferiment pal Friûl di vuê e par chel di doman. Une Fieste de Europe, duncje, che no pues che jessi ancje fieste furlane.

Il lunari, tai dîs passâts nus à lassât ancje la possibilitât di tornâ a pensâ sul taramot e soredut su la ricostruzion: un model di coesion e partecipazion, soredut par vie che al jere ce che e voleve la int di chenti. Altris datis ancjemò: prin di Mai e 25 di Avrîl. E ancjemò altris ocasions par resonâ in particolâr di lavôr, dirits, paritât, autonomiis, tutele des minorancis, justizie, libertât, solidarietât, Costituzion. Cun passion, cun preocupazion, cun cussience, cun atenzion. Tant a dî: Resistence, Europe, Friûl. Storie e avignî.

EURO FURLAN
eurofurlan@gmail.com

09/05/2011

Advertisements
Standard
Atualitât, Politiche

Referendum dai 17 di Avrîl, par furlan si vote “Sì”

Domenie ai 17 di Avrîl e je zornade di Referendum. I citadins a son clamâts a esprimisi in cont di une cuistion che e tocje il tacuin e no dome chel.
Si à di dî se si è a pro o cuintri de modifiche di chê norme che e previôt che i concessionaris di ativitâts di estrazion di idrocarburis tes zonis di mâr, che a stan dentri des dodis miis nautichis, a puedin gjoldi di chê concession fintremai al esauriment dal jaciment.

Cui che al vote “Sì” al met in discussion il sisteme in vore cumò, che al lasse aes compagniis petrolifaris lis mans libaris di fâ ce che a vuelin, cence nissune scjadince.
Cui che al vote “Sì” al domande che chês struturis estrativis a lavorin in maniere rispietose di regulis certis e daûr dal interès comun e no dome di chel des compagniis petrolifaris stessis.
Cui chel vote “Sì” al vûl che a sedin ancjemò plui garanziis di sigurece ambientâl e che si ledi indenant pardabon cu lis energjiis rinovabilis.

Diviers aspiets de cuistion a vegnin sclarîts ben achì (ilsole24ore, no un sfuei antagonist…!).
Cemût che si pues lei, nol esist nissun “scuintri di civiltât” tra “ecologjiscj fanatics e primitîfs”, di une bande, e “int di sest che i ten al disvilup”, di chê altre.

Cun di plui, al merete ricuardât che la iniziative referendarie e je stade cjapade sù de bande di nûf Regjons e che in maniere plui o mancul direte une des cuistions su la taule e tocje ancje ancje il rapuart tra Stât e Regjons in cont des competencis su la energjie e su la gjestion de presince des struturis e des infrastruturis di produzion e di distribuzion energjetiche.

Vie par chestis setemanis e je saltade fûr une cierte confusion sui argoments dal Referendum, che salacor al à cjapât sù une valence politiche une vore fuarte, ancje di plui di ce che al varès vût.
Cheste valence e diven de sielte dal Guvier di jentrâ ad in plen te campagne eletorâl cun chê di promovi l’astensionisim e duncje di rindi inutil il Referendum stes.
Cheste sielte, palesade de bande des declarazions dal President dal Consei dai ministris, a chest pont e permet di capî ancje il parcè di une altre decision cjapade sù de bande dal esecutîf, ven a dî chê di convocâ il referendum par so cont, disleât des Elezions aministrativis dai 5 di Jugn: cul risultât di dopleâ lis spesis pe organizazion dal vôt (e straçâ i bêçs de coletivitât) e cul intindiment che la consultazion e ledi strucje.

Se a’nd jerin za avonde motivazions di sest par lâ a votâ e par votâ “Sì”, cumò a’nd è ancjemò cualchidune di plui.

Si à di votâ “Sì” a pro de partecipazion democratiche e cuintri di chê creature mostruose, simpri plui mostruose, che si clame Partito della Nazione.
Si à di votâ “Sì” a pro dal Friûl, di un Friûl che nol è sotan, di un Friûl che al à dignitât, di un Friûl diferent, di un Friûl che al è Friûl.

Al è par chel che o pensìn che domenie di vedi si votâ di furlans e par furlan.

Al è par chel che, in chest câs, o scrivìn: par furlan si vote “Sì”.

Standard
Atualitât, Friulanofobie, Media, Politiche

Jù lis mans di Giulio Regeni, jù lis mans de Patrie dal Friûl

 I siacai e lis jenis no mancjin mai. No fevelìn dome di bestiis, ma soredut di umans, di chei umans (si puedial clamâju cussì?) che pûr di vê chei che Andy Wharol ju clamave i cuindis minûts di celebritât a profitin di dut e a strumentalizin dut e ducj.

Tra chescj a son par sigûr ancje chei che si son butâts cuintri dal Comun di Gardiscje e dai organizadôrs de Fieste de Patrie dal Friûl di chest an par fâ une polemiche vergognose e autoreferenziâl.

No vin nuie a ce fâ cun nessun di chei che i àn lavorât daûr o no vin nessun interès ni a difindi, ni a promovi, ni a fâi cuintri a dinissun, però no podìn fâ di mancul di palesâ un pont di viste diferent.

Domenie a Gardiscje, cuant che o vin viodût cemût che a fasevin par meti fûr la bandiere su la terace dal teatri, o vin nasât che cualchi siacal al varès sbitiât pe ocasion. E cussì al è sucedût.

Cun di plui, al è colât inte vuate ancje cualchidun che, pal so curriculum e cu la sô innomine, no i varessin di coventâ ni cinc, ni cuindis minûts di celebritât fondade sul vueit, sul prejudizi e su la voie di fâ polemiche par no savê ce fâ.

O pensìn che cui che i ten ae memorie di Giulio Regeni e che al vûl savê la veretât al pues cjapâse cun cualchidun altri, in Egjit, a Rome, a Londre o ancje inaltrò.

Cussì, ai siacai, aes jenis e ai variûi, che a sedin (o che si sintin) talians, talianonons, ‘italianissimi’, ‘internazionalisti tricolore’ e parafurlans trivenetiscj adriatics alpins, si sintìn di di dîur dome chest: «Jù lis mans di Giulio Regeni, jù lis mans de Patrie dal Friûl!».

Standard