Atualitât, Friulanofobie

Corieris e Universitât, lis gnovis pontadis di «Mamma, ho perso il friulano»

Se l’innomenât cine american, che par talian al è cognossût cul titul di «Mamma, ho perso l’aereo», al à vût une schirie di ‘sequels’, une vore di plui ancjemò a son lis evoluzions di chê docufiction (anzit: nuie fiction, dome documentari, stant che no je nissune invenzion, ma e je dute realtât) che si podarès intitulâle, simpri par talian, «Mamma, ho perso il friulano».

No je par sigûr une gnove, par vie che chê di dismenteâ o di pierdi la lenghe furlane e plui in gjenerâl lis lenghis ‘altris’ dal Friûl e je une tindince simpri une vore presinte. E soredut no je une buine gnove.

In particolâr, vie pai ultins dîs, a son stâts diviers episodis che a àn confermât la vivarositât (si fâs par mût di dî) e la banalitât di cheste ande.

Al à tacât l’Ateneu che al varès di jessi la «Universitât dal Friûl», che al à lançât la gnove edizion di «Conoscenza in festa». Compagn che tal 2015 e tal 2016 – o salacor ancjemò di plui – in cont di chê manifestazion che si presente tant che il ‘G7 de cognossince’ nus tocje dî ancjemò «senza e vonde»

Si à zontât ancje la SAF. Daûr di ce che al salte fûr di diviersis segnalazions, cemût che si lei ancje tal blog dal Comitât pe autonomie e pal rilanç dal Friûl, al sarès un câs par «Chi l’ha visto?». Cun di fat, intant che ancjemò vie pal an passât su lis corieris si podeve lei lis regulis di viaç ancje par furlan cumò a son dome par talian e par inglês. Parcè? Cemût? Cemût mai? Par iniziative di cui?
A son dutis domandis legjitimis…

Ancje il sît dal Mittelefest, che al promet di dâ fûr informazions sul program de edizion dal festival di chest an ancje par furlan, par sloven e par todesc, in realtât almancul fintremai vincjecuatri oris indaûr, ‘al fevelave’ dome par talian e par inglês.
La situazion e je cambiade de buinore di vinars ai 16 di Jugn, cuant che finalmentri il clic tes hotwords cui nons des lenghis ‘altris’ dal Friûl al à tacât a vierzi almancul une pagjinute par furlan, une par sloven e une par todesc, intant che altris pagjinis a son ancjemò dome par talian e par inglês o ben a àn dome cualchi toc tes lenghis che a varessin di jessi.

Cundut di cheste confusion, e je une buine gnove. No dome parcè che si dîs che «alc al è alc, ma nuie al è nuie». E nancje par vie che a varessin di jessi prontadis ancje lis sezions che a mancjin ancjemò e che , almancul par chel, si pues dî chel il Mittelefest nol è dome un Italfest.

E je une buine gnove soredut parcè che nus da almancul un fregul di sperance che dopo des tantis pontadis di «Mamma, ho perso il friulano» e puedi tacâ une gnove serie che il so titul al conti di un furlan tornât a cjatâ.
In spiete di un plurilinguisim visîf e formâl che al sedi pardabon normâl e «sano e consapevole», par dîle cu lis peraulis dopradis di un innomenât cjantant talian.

Standard
Atualitât, Friulanofobie, Media, Par ridi (?), Politiche

Ancjemò ‘pride’, ancjemò ‘sgrisui’

Tal 2011 su la stampe locâl al saltave fûr un nestri articul che il so titul al jere «Furlan pride» e «Furlan sgrisui» (là che la peraule «Furlan” e vignive doprade ae inglese vie). In chê ocasion o fasevin indenant une schirie di fats che a justificavin une cierte braùre furlane ma ancje cualchi motîf di aviliment. Chel articul al tornave fûr, in rêt, doi agns plui tart, cun altris argoments a pro de braùre e magari cussì no ancjemò une volte ancje cun alc di ce sgrisulâsi.

Al passe il timp, ma a son ancjemò resons sei pal «pride» che pai «sgrisui».

O podìn vê braùre, par esempli, in continuitât cun ce che o scrivevin cualchi an indaûr, par vie de gnove App dal Grant Dizionari Bilengâl Talian Furlan, che e met a puartade di smartphone, di tablet, di iPhone e di iPad sù par jù setantemil lemis par furlan e ancjetancj par talian e che e mostre che lavorâ pe promozion di une lenghe minorizade (par che e sedi mancul minorizade) e dai dirits linguistics di cui che al è stât «libar… di scugnî no doprâle» al è ben e al conven.

O podìn jessi braurôs ancje pal festival Suns Europe, une iniziative di cualitât nassude in Friûl su la fonde des specificitâts e des rivendicazions linguistichis di chenti. Juste dôs setemanis indaûr chê manifestazion e a vût gnûfs ricognossiments istituzionâi in ocasion di doi incuintris che a son stâts a Strasburc tra une delegazion di chei che a inmanein la rassegne dedicade ae creativitât tes lenghis di minorance e rapresentants dal Consei de Europe e dal Parlament european. E juste doman di sere a Udin, inte suaze di chel stes progjet, a Udin al sarà un biel conciert, cun musiciscj dal Friûl e dal Gales.

O podìn jessi braurôs ancje par chel event che al è za di timp che si fevele di lui, ven a dî il Pride (cul P maiuscul) che al varà juste in chescj dîs lis sôs manifestazions plui impuartantis.
Al è une biele ocasion par tornâ a marcâ une cierte atenzion specifiche dal Friûl pai dirits e pal rispiet de(s) diversitât(s).
Al è ancje un spieli des tantis contradizions che a son propit su chescj cantins e di une situazion là che no mancjin i motîfs par sgrisulâsi.

Un prin motîf al è il non stes dal Pride, che si clame «FVG».
Lu vessino scrit almancul cu la liniute («F-VG»)…
Magari cussì no cheste brute usance le àn in tancj di lôr, no dome chei dal Pride.
Cun di plui a son usâts a definilis cuntune schirie di letaris – «LGBTQIA» (cence liniutis) – ancje lis diviersis identitâts sessuâls dal Pride… e alore forsit no si pues nancje pretindi masse (si fâs par mût di dî….).

Par sigûr al è di sgrisulâsi cuant che si lei o che si sint ator – par fortune al sucedeve une vore di plui cualchi mês indaûr, cumò dome ogni tant – che chest al varès di jessi il Pride «triveneto» (aaargh!!!).
Ancje in chest câs, magari cussì no, e je une usance une vore pandude, che in tiermins ideâi e je leade a fuart cun chê altre dal «effevuggismo senza limitismo» (par dîle ae Francesco Salvi vie…) e che salacor ancjemò di plui e marche in maniere schizofreniche, cuntune definizion fantagjeografiche leade a periodis bruts de storie de Europe e dal Stât talian, là che pai dirits e pes diversitât(s) nol jere nissun rispiet, une manifestazion che impen e varès di jessi a pro dai dirits e de(s) diversitât(s).

Un resonament di cheste fate si podarès fâlu ancje in cont dal fat che il stes event al ven comunicât dome par talian, cundut che sul sît uficiâl si rive a vualmâ un tentatîf (preseabil, ma pardabon limitât e pastroçât) di doprâ ancje chês altris lenghis dal Friûl.

Ma soredut al ven di sgrisulâsi cul lei e cul scoltâ des iniziativis e des cjoltis di posizion di tancj di lôr cuintri dal Pride e des lôr motivazions.
De menace de rivade in Friûl di un trop di «visitors» de cjançon e de politiche taliane e talianone aes interogazions in Consei regjonâl, fintremai al dibatiment sureâl di îr tal Consei provinciâl di Udin, al somee pardabon di jessi dentri di un cine dal orôr, o ben intune situazion che il so titul al podarès jessi chel dal film american «Dumb and Dumber», però cence nuie ce ridi, ma dome tant ce sgrisulâsi…

Lu scrivìn cun convinzion, parcè che o savìn ben che – dit par talian, cussì soredut cui che nol vûl capî nol pues dî che nol capìs – «friulanofobia e omofobia son la stessa porcheria».

Ma o vin dome un dubi: lu sano ancje chei tancj di lôr che in chescj dîs a fevelin, justementri, di dirits e di diversitât(s)? Cuissà?

Standard
Atualitât, Friulanofobie, Par ridi (?), Politiche

Nuie acuilis, o sin cocâi

Si visaiso di chê comedie britaniche, che e je devantade ancje un film, che il so titul al è «No Sex Please, We’re English»? Nus à tornade iniments sù par jù cuindis dîs indaûr cuant che o vin let cheste gnove che e rivave di Triest, in cont de decision de Zonte comunâl di gjavâ vie il simbul cu la acuile de Regjon des divisis dai vigjii urbans di lenti là.

Nus à vignût di ridi e di pensâ: «Nuie acuilis, o sin triestins». Ma massime dopo vê letis lis motivazions di une cjolte di posizion di cheste fate, o vin pensât, plui in detai: «Nuie acuilis, o sin cocâi». Oviementri, cence ofese par nissun, massime pai uciei.

Ce che nus à colpît nol è tant il fat che pal vicesindic di Triest e par dute al Zonte che e à fate buine chê deliberazion e covente tornade a meti la cussì clamade «alabarda di San Sergio» par rispiet de storie e de identitât de citât e dal so cuarp di polizie locâl. Anzit, cuntune cierte cjaladure, nus à someât alc di interessant e salacor ancje positîf.

O sin restâts scaturîts soredut par vie di alc altri. L’intindiment de Zonte triestine al jere chel di marcâ la distance e la diference di Triest rispiet al Friûl e soredut chel di contestâ il fat che – a tacâ de acuile regjonâl (sic!) – al sarès masse Friûl te Regjon (sic!!). Tant a dî che no je dome la Patrie dal Friûl (sic!!!) – che e varès di jessi rapresentade di chê acuile regjonâl…(sic!!!) – ma al è ancje Triest, che però al sarès scjafoiât di chest Friûl che al è dapardut (sic!!!!).

Pecjât che chê acuile no à propit nuie a ce fâ cul Friûl. Cun di fat a saressin une vore plui di motîfs par contestâle propit cuntune cjaladure furlane, cemût che al ven ricuardât ancje achì.

In sumis, un altri esempli di ignorance in storie e gjeografie, che al tocje sei la politiche – evidentementri – sei la informazion, stant che ni di là ni di cà de bocje dal Timau, tal moment di sparniçâ la gnove ator, nissun al à vût alc ce dî. E une conferme di une cierte ande che si veve palesade za cualchi timp indaûr.
Tant a dî che a Triest (ma ancje in Friûl) a son tancj marzins e soredut che i marzins no son marzians, ma magari cussì no a son tiericui compagn di ducj nô.

Dongje di cheste ignorance “ideologjiche” , che par fortune almancul cualchidun al à contestât in cheste ocasion compagn che ai timps des marzinadis di Març , nus à lassât un tic cu la bocje vierte ancje il cidinôr di dutis lis vestâls de sacre «unità della Regione» che denant di un atac cussì esplicit, intun dai siei simbui, a chê che a tancj di lôr us plâs clamâle «FVG», no àn dit (ni scrit) un et, cun dut che par solit o sin usâts a sintîju berlâ, in non dal «progrès» e dal «bon» e dal «just», cuintri di chel che lu clamin identitarisim «divisivo» e «localista».

Però, stant che la iniziative e rivave di chê citât che – par dîle cu lis peraulis di un innomenât senatôr«e je speciâl e straordenarie» e che «par merit sô cheste regjon e je speciâl», la nestre sorprese si à distudade daurman. Cun di fat si vin visâts che chel che al ven clamât identitarisim localist, divisîf, brut, sporc e trist al è dome chel che al rive dal Friûl e des tribùs barbarichis dal… Furlanistan.

Cundut achel, a proposit di vigjii, di Regjon, di Friûl, di Triest, al net de ignorance e de arogance di cualchidun, nus ven di fâ ancjemò cualchi pensament.

Par esempli: a chest pont cualsisedi Comun furlan al varès dutis lis resons par fâ compagn dal Comun di Triest e fâ svualâ vie des divisis dai siei vigjii chê acuile ‘no furlane’ e ‘cuintrifurlane’. Ise vere?

Cun di plui si podarès pardabon cambiâi non ae Regjon che e ten dongje la plui part dal Friûl cun Triest e clamâle «Friûl e Triest», lassant in bande la fantagjeografie nassude tal Votcent e doprade vie pal secul stât. No saressie ore?

E magari la sô bandiere e podarès jessi in part blu cu la acuile dal Friûl (chê vere) e in part rosse cu la alabarde. Cuissa?

Ma a proposit de alabarde, ve chi une altre domande e salacor, tal cjâf di cualchidun, un altri probleme: ce fasaressino a Triest se a savessin che in realtât ancje chê e je furlane?

Standard
Atualitât, Politiche

«Pacatamente», «democraticamente», e… «friulanamente»: No, Ne, Nein, No! E vonde

si

Finalmentri e je daûr a finî la campagne eletorâl pal referendum di domenie.
A chest pont, dopo vê letis e sintudis di ogni sorte, si permetìn di fâ cualchi piçule riflession.

La prime e tocje la clime gjenerâl in stîl ‘Mille e nion più Mille’.

La seconde, leade ae prime, e je in cont de polarizazion – al è normâl: o No o Sì – e de trasversalitât dai schieraments e duncje de presince, di une bande e di chê altre di compagniis no masse racomandabilis.

La tierce si riferìs ae demagogjie e al terorisim ideologjic fats indenant in cont di chestis compagniis, massime de bande di chei a pro dal Sì. Al è evident che se si à di sielzi tra No e Sì, si sielç o une o chê altre opzion daûr di criteris diferent e cun vision diferentis.
La plui part di chei a pro dal Sì a motivin cheste sielte su la fonde di un orientament governatîf ‘a prescindere’. Chest al sucêt ancje par vie che il Guvier e soredut il President dal Consei a àn vût cjamât il cuesît referendari di chest significât: Sì, a pro dal Guvier; No, cuintri. Par chel nol è di ce smaraveâsi se tancj di lôr a disin di votâ No par fâi cuintri al guvier.

Chei a pro dal Sì a justifichin e a promovin la lôr posizion cul fat che «si à di cambiâ» e che «si à di movisi», ancje se la plui part di lôr no mostre di savê pardabon ce che si cambie e cemût che si movisi e in ce direzion…

Tra i argoments fats indenant di chei a pro dal Sì a son la «semplificazion», la «riduzion dai coscj de politiche», il «superament dal bicameralisim perfet», la «eficience», la «eliminazion dai ‘enti inutili’»….

Dopo vê let il test de riforme e dopo vê scoltât ce che a pensin chei a pro dal sì, nus somee che a sedin dome sprocs cence contignûts, se no piês. Par esempli si cjatìn in cunvigne cun cui che in cont dal presumût «superament dal bicameralisim perfet» al fevele ‘par talian’ di «monacameralismo».

La uniche veretât che o cjatìn tes peraulis di chei che a son a pro dal Sì e je chê in cont des autonomiis locâls e regjonâls, dal lôr «ridimensionament», de lôr «riduzion» e de lôr «eliminazion».

Par chel e pal «monacameralismo» che al saltarès fûr se al passàs il Sì, si cjatìn in cunvigne cun cui che, a pro de difese e soredut dal esercizi cussient e positîf de autonomie de Regjon che e ten dongje la plui part dal Friûl cun Triest, al à lis ideis claris in cont dal referendum.

«Pacatamente», «democraticamente», e… «friulanamente», o pensìn che si vedi di votâ No, Ne, Nein, No!

E vonde.

Standard
Atualitât, Friulanofobie, Politiche, Scuele

«Mamma, ho perso il friulano» (e no dome chel)

Une altre pontade di chês telenovelas, che si podarès dâur il titul di «Mamma, ho perso il Friuli» e «Mamma, ho perso il friulano» e che o cognossìn avonde ben su chescj schermis za di un pôc di timp, e je lade in onde sul sît internet dal Ufici Scolastic Regjonâl (USR) dal Friûl-VJ.

Su la homepage dal sît istituzionâl il sorintendent dal USR, Pietro Biasiol, al à fat i auguris ai students e a dutis lis fameis pal gnûf an scolastic.

Une biele idee. Par francês si disarès: «un beau geste».

Al è clâr che intune regjon là che a son cuatri lenghis, si spietisi che chest salût al vegni fat doprantlis dutis cuatri. Cun di plui che, pûr in maniere une vore divierse une di chê altre, daûr des leçs statâls e regjonâls che a metin in vore un principi di fonde dal ordenament de Republiche taliane, chês stessis lenghis a varessin di vignî dopradis e insegnadis tes scuelis.

Impen, magari cussì no, il dotôr professôr sorintendent Biasiol a’nd à dopradis dome dôs: il talian e il sloven.

Se di une bande no podìn che jessi contents che dongje de lenghe dominante e sedi stade doprade ancje chê slovene (cundut che nus somee che in chel câs il mes al sedi stât plui curt, cence la part plui… apassionade), di chê altre nus vegnin i sgrisui a pensâ che tal 2016 si ledi ancjemò indenant a fâ fîs e fiastris.

Che al sedi fat cun tristerie o dome a sdavàs, no si pues fâ di mancul di marcâ ce che al sucedût.

Par chel si cjatìn ad in plen in cunvigne cun cui che al à protestât e cun cui che al à rispuindût cuntune sbeleade a cheste macacade. Massime dopo vê let lis argomentazions fatis indenant de bande dal sorintendent cuintri di cui che lu à criticât.

Cun di fat, ancje chês a mostrin di jessi une misture di arogance, di tristerie e di sdavàs: un riferiment ai uficis, un altri al fat che tes scuelis di chenti lis lenghis di insegnament e di ûs aministratîf a son dome il talian o il sloven e un altri ancjemò ae pluralitât linguistiche te sô complessitât, cul efiet (se no propit cun chê intenzion) di meti cuintri une di chê altre lis tantis identitâts, lenghis e culturis che si cjatin te regjon che e ten dongje la plui part dal Friûl cun Triest, tra chês che si podarès clamâlis ‘storichis’ e chês che si podarès definîls ‘gnovis’.

O pensìn che nissune furlane e nissun furlan cun almancul un tic di sintiment e di cussience a puedin colâ te vuate de contraposizion e fâsi cjapâ tal tramai de mistificazion.
Al vâl ancje in dì di vuê – e salacor ancjemò di plui – chel sproc di passe vincj agns indaûr: “Nô o sin blancs ma la nestre lenghe e je nere”.

E alore o cjapìn at che l’auguri di bon an nol è stât fat a ducj e par ducj. I nestris fîs e lis nestris fiis a vivin distès…

Par chel, di une bande si freìn di dut chest e di chê altre cumò o vin a clâr che se la lenghe furlane tes scuelis no je ancjemò presinte cemût che al è just che al sedi, no dome in teorie ma ancje daûr des leçs, al è par vie che il bon esempli (si fâs par mût di dî) al rive ‘dal alt’.

E cussì, compagn di Totò, i disìn (par talian, cussì ancje il sorintendent al è content):

toto

Standard
Friulanofobie, Par ridi (?), Politiche

Coppola e cappello. ‘Smart’, smuart e smamît

Se un stupit al dîs macacadis al pues no plasê masse, però, in som in som, al è just che al sedi cussì.
Al è une vore piês cuant che lis macacadis lis dîs un che al varès di jessi di sest, a plomp, inteligjent e sgaio.

Une valutazion compagne si pues fâle in cont de politiche e dai politics. Cun di fat, di un reazionari, ancje se no ti plâs, tu ti spietis che al disi robis reazionaris, se no piês.
Però se chês robis alì tes dîs un che al varès di jessi un progressist, alore o sin pardabon malamentri.

Magari cussì no, cheste ultime situazion si ripet une vore dispès, massime in Friûl e massime tra chei che si declarin progressiscj.

Dut chest al cjate conferme in ce che nus à contât, îr l’altri, une nestre amie, che vinars passât e jere lade a Pradaman ae presentazion dal libri di Giorgio Cavallo ‘Ripensare la nazione’.

In chê ocasion, tra i intervents al jere ancje chel di un “nestri” (si fâs par mût di dî) rapresentant a Rome: propit un di chei che al varès di jessi “smart” e “progressist” e che si à palesât dut il contrari, se no piês.

Standard
Atualitât, Musiche, Politiche

Suns Europe, une braùre furlane cence confins

A son stadis setemanis di braùre furlane grandonone, di Furlan Pride a manete. Parcè? Parcè che o vin viodût cun plasê che no son dome i çavariaments targâts effevuggì e lis rievocazions/celebrazions/esaltazions di ducj i inovâi de Prime vuere mondiâl «combattuta per restituire all’Italia i suoi confini naturali» (Sic! Sù mo sù…). Cun di fat, in sù par jù vincj dîs, il Friûl al à mostrât la sô muse miôr – chê plui vere, plui trative e plui furlane – stant che al à palesât il so jessi une tiere speciâl, caraterizade dal pluralisim linguistic e culturâl, e par chel si à proponût tant che pont di riferiment par dutis chês parts de Europe che a àn carateristichis compagnis o paragonabilis.

Dai 25 di Novembar ai 12 di Dicembar a Udin, a Cormons, a Flambruç, a Sant Vît, a Cjasarse e a Manià si à davuelt Suns Europe, il prin Festival european des arts performativis tes lenghis minoritariis.
La rassegne e à cjapât dentri trê sezions diferentis: une dedicade aes produzons audiovisivis (la Mostre dal Cine), une che si à mote ae discuvierte des tantis formis de scriture creative, tra prose, poesie e teatri (Sunsûrs) e une che e je lade daûr de esperience inviade za tal 2009, cun Suns, tal cjamp de musiche.

Magari cussì no, stant che si cjatìn une vore lontans dal Friûl, no vin podût viodi nessun dai apontaments che a jerin dentri di chel program sfladorôs, che al à cjapât dentri ancje il film basc candidât pai premis Oscar, Loreak, e chê seradone che e je stade fate vinars passât alì dal teatron di Udin.
Però o vin rivât a stâi daûr un pôc cul sgarfâ in internet e un pôc cul scoltâ in streaming Radio Onde Furlane e o vin vût pui di une conferme de bontât de iniziative, sei pe cualitât de propueste culturâl (i cines, i incuintris cui autôrs, lis contaminazions tra peraule scrite, peraule cjantade e peraule contade, i grups protagoniscj dal festival musicâl), sei pal lavoron che a àn fat chei che i son stâts daûr par che dut al vignìs cemût che al è stât e che al veve di jessi, sei pe vision strategjiche che nus somee di viodi daûr di chel progjet, ven a dî chê idee – che e je ancje la nestre – che cheste piçule part de Europe e dal Mont che si clame Friûl, se e à voie di vê a ce fâ cul mont, e à di imparâ a vê a ce fâ cun se stesse, cu la sô pluralitât, cu la sô complessitât, cu la sô unitarietât e cu la sô unicitât, cence pôre e cence sudizion, ma cence nancje montâsi il cjâf.

Cun chê cussience e cun cui che chê cussience le à za di timp, il Friûl al pues fâ maraveis: events speciâi tant che Suns Europe che a àn – e che a varan ancjemò – un grant rivoc ator pal mont, ma soredut une pratiche cuotidiane di promozion de culture, di ricognossiment e di garanzie di dirits di fonde par ducj, di disvilup just e sostignibil, di coesion sociâl e di cressite in tiermins economics.

I vûl lavorât, tant. I vûl ancje scombatût, salacor ancjemò di plui.
Ma si pues fâ.

Yes, we can. Pardabon.

Standard