Mittelfest, si spietavin un segnâl: a son i “Segnali” e dome un segnalut

Sabide ai 19 di Lui e je stade screade la edizion 2014 dal Mittelfest.
Il program de manifestazion al è avonde interessant, par sigûr miôr di chel des edizions dai ultins agns: a son plui Europe e Mitteleurope e in cheste suaze si viôt ancje un pôc di Friûl.

Nol è mancjât il spazi ancje par un pôc di “mainstream” talian di cualitât, cence fevelâ dal conciert di Redipuie dai 6 di Lui, che al è stât un event musicâl e mediatic cuntun impat grandonon, ancje se no si pues che jessi in cunvigne cu lis riflessions fatis dal diretôr de Vite Catoliche e ricuardadis ancje de bande dal Comitât pe Autonomie e pal Rilanç dal Friûl in cont di chê iniziative e plui in gjenerâl di cemût che al ven memoreât il centesim inovâl dal inviament de Prime Vuere Mondiâl.

Chel che, magari cussì no, no si à viodût nancje chest al è l’ûs di dutis lis lenghis de regjon Friûl-VJ – furlan, sloven, todesc e talian – tes azions di comunicazion istituzionâl dal Mittelfest, che a son dome par talian e in part par inglês.

Un mês e mieç indaûr si vevin sbelançâts su chest cantin, palesant un ciert otimisim. Si spietavin pardabon un segnâl in chest sens, ma a son rivâts dome “Segnali”. E salacor ancje un “segnalut”, stant che il gnûf president di Mittelfest te cerimonie di scree dal program di chest an al à tacât cul saludâ par furlan, par sloven e par todesc.
Isal avonde par jessi contents? Si puedial dî «alc al è alc, nuie al è nuie?».

“Nazionalisti”? Sigûr. “Friulani”? Nancje fevelâ

A son za un pôcs di mês che inte rêt e in part ancje su lis pagjinis dai gjornâi locâi a son un pôcs di lôr che a fasin fevelâ di se e che si cualifichin tant che “Nazionalisti friulani”.

Un non di cheste fate al fasarès pensâ a un grup o a un moviment che al fâs riferiment a une nazion furlane, a un popul furlan e salacor a un teritori “nazionâl”, il Friûl. Cussì, chel dai nazionaliscj furlans, in gjenerâl, al varès di jessi un grup o un moviment che si propon di difindi lis specificitâts linguistichis, storichis, identitariis e duncje i dirits e i specifics interès di cheste “nazion”, che za vie pal Nûfcent si à ricognossude tâl e che cussì – nazion, nazionalitât, nazion cence stât – e je stade ricognossude in cualchi maniere ancje di fûr, cemût che si pues lei ancje te sagjistiche dedicade a chei che a vegnin clamâts “nazionalisims periferics” (tra chescj: chel basc, chel catalan, chel galês, chel scozês, chel galizian, chel sart, chel frison e, apont, chel furlan), massime a tacâ dai agns Setante dal secul passât: vêso presint, par esempli, il libri “Le nazioni proibite” di Sergio Salvi ?

In realtât, chê stesse denominazion, che e je dome par talian, e ancjemò di plui un scandai in rêt tra sîts web e social networks a mostrin che chescj “Nazionalisti friulani” a son dute une altre robe. Chel fat indenant nol è nuie altri che une declinazion nancje masse origjinâl di un ciert nazionalisim talian e in particolâr di chel nazionalisim talian estremist che te storie al à fat tancj dams ae Italie e ancjemò di plui al Friûl.

Par sigûr nol è une gnove butade furlane di chel che in Europe un pôcs di agns indaûr al vignive clamât, par inglês, “ethnic revival”. Pluitost, al è une gnove manifestazion de alienazion culturâl, identitarie e politiche che a àn patît tancj di lôr, in particolâr in Friûl.

Magari cussì no, alienazion e confusion a tocjin ancje cui che su la stampe o in internet, magari par analizâ e criticâ il fenomen, al scrîf in cont di chescj che al massim a son nazionaliscj talians “italianissimi” in Friûl.
Un esempli in chest sens, che al fâs vignî i sgrisui ancje parcè che al è scrit par furlan, al è saltât fûr pôcs dîs indaûr, cemût che si pues lei achì.

Crodi che i “Nazionalisti friulani” a sedin nazionaliscj furlans al è compagn che pensâ che la ‘La Voce di Furlania’, publicazion “italianissima” dal 1944, e vedi alc a ce fâ cu la ‘Patrie dal Friûl’ fondade tal 1946 di pre Bepo Marchet e di Felix Marchi, che a jerin furlans e antifassiscj.

Debora, cambia verso

Ancje Euro Furlan al va in feriis. Cumò, però, o sin tornâts, e cussì, par cui che al ves pierdût il nestri articul saltât fûr sul Quotidiano dai 3 di Lui, lu metìn sù ancje tal blog.

Si fevele di autualitât e di Regjon. In chest câs nol covente che la presidente de Regjon e mostri la muse, al baste dome che Zonte e Consei si dedin une dreçade.
Buine leture.

LENGHE FURLANE. SEDIS ENTITÂTS ASSOCIATIVIS DI CHENTI I DOMANDIN AE REGJON DI DÂSI UNE DREÇADE

Debora, cambia verso: fai qualcosa di sinistra

Al è passât zaromai plui di un an di cuant che si à inviade la ativitât de gnove Zonte regjonâl. Cualchi setemane indaûr il guvier de Regjon al à fat indant il so prin belanç anuâl, palesant une buine dose di sodisfazion. E je divierse la valutazion di tancj di lôr, massime tra chei che a vevin votât a pro de coalizion di centriçampe tes elezions dal 2013. Il nivel di sodisfazion dai citadins al è par sigûr plui bas e in tancj setôrs al samee che l’esecutîf al vedi decidût di no decidi e fintremai di movisi in continuitât cu la Zonte di prime.

Si à cheste sensazion in particolâr se si stâ daûr di ce che e à fat – e soredut che no à fat – la Zonte regjonâl tal cjamp de tutele des minorancis linguistichis. Alc dal gjenar lu veve metût in evidence un pôcs di mês indaûr ancje il Comitât/Odbor/Komitaat/Comitato 482. Vinars passât, chel stes comitât e altris cuindis associazions e entitâts culturâls e agregativis di lenghe furlane a àn tornât a bati su chel cantin cu la presentazion di un document che al fotografe la situazion e che al fâs indenant une schirie di propuestis, in maniere clare, serie e documentade.

La domande di fonde pe Zonte e pal Consei regjonâl e je chê di un cambi di mentalitât, a pro di lenghe, culture e dirits, ma ancje a pro de autonomie de Regjon, che in dì di vuê si le difint dome se si le met in vore pe sô reson e pe sô finalitât di fonde: la tutele des minorancis linguistichis (slovens, gjermanics e, apont, furlans). Ta chest an di guvier de Zonte Serracchiani, che si cjatave a gjestî la ereditât penze dal esecutîf di prime, si à viodût cualchi pas indenant, ma la liste dai elements negatîfs e je une vore plui lungje: no son stadis presentadis lis relazions su la metude in vore de leç sul furlan; si àn gjavât ducj i fonts pe cartelonistiche e pe comunicazion istituzionâl; lis sieltis sui sportei linguistics a riscjin di scancelâ esperiencis positivis e di premiâ realtâts che no produsin grancj risultâts; no si àn criteris clârs par assegnâ lis risorsis ai ents impegnâts pe lenghe; si doprin criteris discriminatoris par assegnâ i fonts pe culture; lis politichis pai media a pidimentin propit chei mieçs di comunicazion che di plui e miôr a àn lavorât in chescj agns cun e pe lenghe furlane. Par no fevelâ de istruzion: nuie insegnament curicolâr e nuie formazion sistematiche pai insegnants di/par furlan.

In chest setôr la Regjon e varès di impegnâsi par cjapâ sù la competence primarie e lis risorsis che a coventin par metile in vore. Plui in gjenerâl la Regjon e à di dâsi une dreçade cun politichis linguistichis seriis e cun invistiments di pês: cun cualitât, cun cuantitât e cun continuitât, e no dome cun chel misar 0,02% che la finanziarie regjonâl e da ae lenghe furlane. Si à di «cambiare verso» e fâ «qualcosa di sinistra». E daurman: a tacâ des variazions di belanç e de aprovazion dal Plan Gjenerâl di Politiche Linguistiche.

EURO FURLAN
eurofurlan@gmail.com
03/07/2014