Martars ai 16 di Jugn e je stade presentade a Milan la edizion 2015 dal Mittelfest. La manifestazion e je par sigûr une des plui impuartantis di chês che si fasin in Friûl, par plui resons. Par esempli: pe cuantitât di risorsis che e impegne, pal numar dai events che e cjape dentri, pe innomine di tancj dai siei protagoniscj. Cundut achel, o pensìn che il Mittelefest al sedi alc di impuartant soredut par alc altri: pe sô storie, pe sô ispirazion e pe sô vocazion (mittel)europeane, che e varès di vê chê di scjavaçâ confins, di ricognossi e meti dongje lis diversitâts culturâls e lis lôr diviersis espressions creativis che a son tal mont (e dal mont) e che in particolâr a son di (e in) cheste part dal continent che e cjape dentri ancje il Friûl.
Se si dâ un cuc al program, si pues preseâ il fat che cheste vocazion si palese in maniere avonde clare e fuarte in plui di cualchidun dai passe sessante apontaments che si davuelzaran a Cividât dai 18 ai 26 di Lui. A confermin chest ategjament ancje la sielte dal teme de aghe – tant che risorse, tant che element, tant che ispirazion, tant che fonde di vite – e l’apel fat indenant de bande dal president e dal diretôr dal Mittelfest par che la Europe e sedi plui Europe e par che si compuarti di Europe in particolâr denant des gnovis ondadis di imigrazion e di profugance.
Magari cussì no, cheste vocazion no si le viôt ancjemò intun aspiet fondamentâl: la comunicazion istituzionâl dal Mittelfest.
Al è za di cualchi an che o cjalìn cun atenzion cheste manifestazion, propit pe sô impuartance, ancje sot di cheste cjaladure specifiche, e la situazion e je su par jù simpri chê. Cun dut che il Mittelfest si fâs in Friûl e che al à une vocazion europeane e internazionâl, al continue a comunicâ dome par talian e forsit un pôc par inglês.
Ogni an o sperìn che al sedi chel bon, par che si doprin e duncje si viodin ancje chês altris lenghis dal teritori (il furlan, il sloven e il todesc: lenghis “altris”, lenghis “nestris”, ma ancje lenghis che nus metin in contant cun chei altris e che nus fasin ricognossi di chei altris), però fin cumò o vin viodût dome cualchi piçul segnalut.
Se nol cambie alc tai prossims dîs, o vin pôre che chest an no sedin nancje i segnaluts.
La robe nus diplâs, in gjenerâl e soredut par doi motîfs: parcè che propit cuindis dîs indaûr cul cussì clamât Tren des lenghis, finalmentri la linie feroviarie tra Udin e Cividât e à tacât a mostrâ – e a rispietâ – la muse plurâl di cheste tiere e de sô int e cumò chel difiet di fonde dal Mittelfest si lu viôt ancjemò di plui, e parcè che dal president dal Mittelefest di cumò, cu la sô storie e cu la sô sensibilitât, si spietavin che la rassegne e fasès finalmentri chel salt indenant, viers de Mittel(Europe) e dal mont e in chel istès viers dal Friûl e de regjon Friûl-VJ, cuntune comunicazion plurilengâl dinamiche, inovative e insom normâl.
Sperìn che si movi alc, magari dome in zone Cesarini. Se di no, al è simpri plui legjitim il suspiet che, za di timp, plui che di Mittelfest si vedi di fevelâ dome di Italfest.